Rom 12 | KaaIBT22L | STEP | Solay etip, háy tuwısqanlarım, Qudaydıń miyrim-shápááti haqı sizlerge jalbarınaman: denelerińizdi Qudayǵa unaytuǵın muxaddes hám tiri qurbanlıq qılıp, Oǵan baǵıshlańlar. Bul sizlerdiń Quday aldındaǵı ılayıqlı xızmetińiz boladı.

‏ Romans 12

Iysa Masiyxtaǵı jańa ómir

1 Solay etip, háy tuwısqanlarım, Qudaydıń miyrim-shápááti haqı sizlerge jalbarınaman: denelerińizdi Qudayǵa unaytuǵın muxaddes hám tiri qurbanlıq qılıp, Oǵan baǵıshlańlar. Bul sizlerdiń Quday aldındaǵı ılayıqlı xızmetińiz boladı. 2 Bul dúnyanıń adamlarına eliklemeńler. Al Qudaydıń oy-pikirlerińizdi jańalap, Onıń sizlerdi tolıq ózgertiwine jol qoyıńlar. Sonda sizler Qudaydıń jaqsı hám minsiz erkin, yaǵnıy Oǵan neniń unaytuǵının ayırıp bilesizler.

3 Qudaydıń maǵan bergen miyriminen paydalanıp, hámmeńizge aytıp atırman: ózińizdi shekten tıs joqarı bahalamańlar. Kerisinshe, hár bir adam Qudaydıń ózine bergen isenimine qaray, ózin ılayıqlı bahalasın. 4 Óytkeni denemiz bir bolsa da, múshelerimiz kóp hám múshelerimizdiń atqaratuǵın xızmeti de hár túrli. 5 Sol sıyaqlı, bizler kóp adam bolsaq ta, Masiyxtıń bir denesin quraymız hám óz ara baylanıs jasaytuǵın bir deneniń múshelerimiz. 6 Qudaydıń bizlerge bergen miyrimi boyınsha, bizler hár túrli ruwxıy sıylarǵa iyemiz. Kimniń payına payǵambarshılıq etiw sıyı tiyse, ol isenimine qaray payǵambarshılıq etsin. 7 Xızmet etiw tiyse, xızmet etsin. Tálim beriw tiyse, tálim bersin. 8 Al kimniń payına jubanısh beriw tiyse, jubanısh bersin. Úlestiriwshi bolıw tiyse, shın kewilden úlestirsin. Basshılıq etiw tiyse, ǵayrat penen basshılıq etsin. Miyrim-shápáát kórsetiw tiyse, quwanıshlı túrde miyrim-shápáát kórsetsin.

Masiyxıylıq ómir tárizi

9 Súyispenshiligińiz haqıyqıy bolsın. Jamanlıqtan qashıp, jaqsılıqqa jabısıp alıńlar. 10 Bir-birińizdi tuwısqanlıq súyispenshilik penen shın júrekten súyińler. Bir-birińizge óz ara húrmet kórsetiwge tırısıńlar. 11 Intańız páseymesin. Erinshek bolmańlar. Iyemizge jalınlı ruwx penen xızmet etińler. 12 Úmit etip, quwanıp jasańlar. Qıyınshılıqlarda sabırlı bolıńlar. Úzliksiz duwa etińler. 13 Mútájlikte jasap atırǵan muxaddesler menen barıńızdı bólisińler. Miymandos bolıwǵa tırısıńlar. 14 Sizlerdi quwdalaytuǵınlar ushın Qudaydan jaqsılıq tileńler. Ǵarǵıs emes, al jaqsılıq tileńler. 15 Quwanıp atırǵanlar menen birge quwanıp, jılap atırǵanlar menen birge jılańlar. 16 Óz ara awızbirshilikli bolıńlar. Menmenlikke berilmey, basqalar pás kóretuǵın adamlar menen qatnas jasańlar. Ózlerińizdi basqalardan aqıllı sanamańlar. 17 Hesh kimniń jamanlıǵına jamanlıq penen juwap qaytarmańlar. Hámmeniń oyı boyınsha jaqsı dep sanalǵan islerdi islewge tırısıńlar. 18 Eger múmkin bolsa, qolıńızdan kelgenshe, barlıq adamlar menen tatıwlıqta jasańlar.

19 Súyikli tuwısqanlarım! Ózińiz ushın ósh almańlar. Al bunı Qudayǵa tapsırıńlar. Sebebi Muxaddes Jazıwda Jaratqan Iye bılay deydi: «Ósh alıw Meniń qolımda, sazayın Ózim beremen». ^{▼▼ Nzm 32:35.} 20 Kerisinshe: «Dushpanıń ash bolsa, onı toydır,
Eger shóllese, suw ber.
Solay islep, onı uyaltarsań». ^{▼▼ Hkm 25:21-22.}

21 Jamanlıqtan jeńilme. Al, jamanlıqtı jaqsılıq penen jeń.