Rom 13 | KaaIBT22L | STEP | Hár bir adam basqarıwshı húkimetke boysınsın. Óytkeni Qudaydan bolmaǵan hesh qanday húkimet joq. Bar bolǵan húkimetlerdiń hámmesi de Quday tárepinen ornatılǵan.

‏ Romans 13

Húkimetke boysınıw haqqında

1 Hár bir adam basqarıwshı húkimetke boysınsın. Óytkeni Qudaydan bolmaǵan hesh qanday húkimet joq. Bar bolǵan húkimetlerdiń hámmesi de Quday tárepinen ornatılǵan. 2 Sonlıqtan húkimetke qarsı shıqqan adam Quday ornatqan tártipke qarsı shıqqan boladı. Bunday adamlar jazaǵa ushıraydı. 3 Sebebi basshılardan jaqsılıq islewshiler emes, al jamanlıq islewshiler qorqadı. Basshılardan qorqpawdı qáleyseń be? Onda jaqsılıq isle. Sonda sen basshınıń maqtawına eriseseń. 4 Basshı – seniń paydań ushın miynet etetuǵın Qudaydıń xızmetshisi. Biraq, eger sen jamanlıq isleytuǵın bolsań, qorq! Óytkeni ol qılıshtı biykarǵa kóterip júrgen joq. Ol Qudaydıń xızmetshisi bolıp, jamanlıq islewshini Qudaydıń ǵázebi menen jazalaydı. 5 Sonlıqtan tek Qudaydıń ǵázebinen qorqqanlıqtan emes, al hújdanıń boyınsha da boysınıwıń tiyis. 6 Sizlerdiń salıq tólewińizdiń sebebi de usı. Sebebi salıq jıynawǵa biyligi bar adamlar da óz isi menen bárqulla bánt bolıp, Qudayǵa xızmet etedi. 7 Solay etip, hár kimge tiyislisin berińler: salıq jıynawshıǵa – salıq, bajı jıynawshıǵa – bajı berińler hám qorqıwǵa ılayıq adamnan qorqıp, húrmetke ılayıq adamǵa húrmet kórsetińler.

Súyiw – bul Muxaddes Nızamdı orınlaw

8 Hesh kimge qarızdar bolmańlar. Hesh qashan tolıq ótep bolmaytuǵın qarız bolǵan, bir-birewdi súyiwdi toqtatpańlar. Óytkeni basqalardı súygen adam Muxaddes Nızamdı orınlaǵan boladı. 9 «Neke hadallıǵın buzba, adam óltirme, urlıq isleme ^{▼▼ Bazı qoljazbalarda «…hesh kimge qarsı jalǵan gúwalıq berme» degen sózler de bar. Shıǵ 20:16 qarań.}, basqanıń múlkin kúseme», ^{▼▼ Shıǵ 20:13-15, 17; Nzm 5:17-19, 29.} – degen buyrıqlar hám qalǵan barlıq buyrıqlar mına sózlerde jámlengen: «Ózińdi súygeniń sıyaqlı, janıńdaǵı adamdı da súy». ^{▼▼ Leb 19:18.} 10 Janındaǵı adamdı súyetuǵın oǵan jamanlıq islemeydi. Sonlıqtan basqalardı súyiw – bul Muxaddes Nızamdı orınlaw demek.

11 Házirgi zamannıń qanday ekenin bilip, usını orınlańlar. Endi sizlerdiń uyqıdan oyanatuǵın waqtıńız keldi. Sebebi bizlerdiń qutqarılıwımız bizler isengen dáslepki waqıtlarǵa qaraǵanda, házir jaqınıraq. 12 Tún ótip, kúndiz jaqınladı. Sonlıqtan qarańǵılıqtıń islerin taslap, nurdıń sawıt-quralların taǵıp alayıq. 13 Ayshı-áshiretke hám máskúnemlikke, haramılıqqa hám buzıqshılıqqa, jánjel hám kúnshillikke berilmeyik. Kúndizge jarasatuǵın ádepli ómir súreyik. 14 Iyemiz Iysa Masiyxqa bólenińler hám gúnakar tábiyatıńızdıń jaman qálewlerine boysınbańlar.