Rom 14 | KaaIBT22L | STEP | Isenimi hálsiz adamdı onıń pikirleri haqqında tartıspay qabıl etińler.

‏ Romans 14

Hálsiz hám kúshli isenim

1 Isenimi hálsiz adamdı onıń pikirleri haqqında tartıspay qabıl etińler. 2 Mısalı: birew hámme nárseni jewge boladı dep isenedi. Al isenimi hálsiz bolǵan tek palız ónimlerin ǵana jeydi. 3 Hámme nárseni jeytuǵın adam jemeytuǵın adamdı pás kórmesin. Ayırım nárselerdi jemeytuǵın adam jeytuǵın adamdı húkim etpesin. Óytkeni Quday ekewin de qabıl etken. 4 Basqanıń xızmetshisin húkim etetuǵınday, sen kimseń? Xızmetshi óz xojayınınıń aldında turadı yamasa jıǵıladı. Ol ayaqqa turǵızıladı. Sebebi onı ayaqqa turǵızıwǵa Iyemizdiń qúdireti jetedi.

5 Jáne de, birew bir kúndi basqa kúnnen áhmiyetlirek dep sanaydı, al basqa birew ushın hámme kún birdey. Hár bir adam óz kóz qarasında tolıq isenimge iye bolsın. 6 Kúnlerdi ayrıqsha qılıp belgileytuǵın olardı Iyemiz ushın belgileydi ^{▼▼ Bazı qoljazbalarda mınaday sózler de bar: «Kúnlerge itibar bermeytuǵın, Iyemiz ushın sonday qıladı».}. Al hámme nárseni jeytuǵın adam Qudayǵa shúkirlik etip, olardı Iyemiz ushın jeydi. Ayırım nárselerdi jemeytuǵın adam da Iyemiz ushın jemeydi hám Qudayǵa shúkirlik etedi.

7 Óytkeni hesh birimiz tek ózimiz ushın jasamaymız hám hesh birimiz de tek ózimiz ushın ólmeymiz. 8 Jasasaq, Iyemiz ushın jasaymız. Ólsek te, Iyemiz ushın ólemiz. Solay etip, jasasaq ta, ólsek te Iyemizge tiyislimiz. 9 Usı maqsette Masiyx ólip, ólimnen qayta tirildi. Sonlıqtan Ol ólilerdiń de, tirilerdiń de Iyesi boldı.

10 Olay bolsa, sen nege tuwısqanıńdı húkim eteseń? Nege tuwısqanıńdı pás kóreseń? Hámmemiz de Qudaydıń ^{▼▼ Qudaydıń – Bazı qoljazbalarda «Masiyxtıń».} húkim gúrsisi aldında juwap beremiz. 11 Muxaddes Jazıwda Jaratqan Iye bılay deydi: «Tiriligim haqı ant ishemen:
Hár bir adam Meniń aldımda dize búgedi.
Hár bir til Meniń Quday ekenimdi ashıq tán aladı». ^{▼▼ Iysh 45:23; 49:18.}

12 Solay etip, hár bir adam ózi ushın ózi Quday aldında juwap beredi.

Tuwısqanıńızdı azǵırıwǵa salmańlar

13 Sonlıqtan bunnan bılay, bir-birimizdi húkim etpeyik. Kerisinshe, tuwısqanıńızdı azǵırıwǵa salmawǵa hám onıń isenimine zıyan keltirmewge tırısıńlar. 14 Iyemiz Iysaǵa tiyisli bir adam sıpatında mınanı bilemen hám anıq isenemen: hesh bir nárse ózliginen haram emes. Biraq, bir nárseni haram dep esaplaǵan adam ushın sol nárse haram boladı. 15 Eger tuwısqanıń sen jeytuǵın nárse sebepli qapa bolsa, onda sen súyispenshilik penen is tutıp atırǵan joqsań. Jeytuǵın nárseń menen onıń isenimin nabıt qılma! Sebebi Masiyx bul adam ushın da ólgen. 16 Sizler jaqsı dep esaplaǵan nársege sóz kelmesin. 17 Óytkeni Qudaydıń Patshalıǵı jeytuǵın hám ishetuǵın nárselerden ibarat emes, al haqlıq, tınıshlıq hám Muxaddes Ruwx beretuǵın quwanıshtan ibarat. 18 Masiyxqa usı jol menen xızmet etetuǵın adam Qudayǵa unaydı hám ol adamlardıń maqtawına ılayıq.

19 Solay etip, ózlerimizdi tınıshlıq alıp keletuǵın hám óz ara ruwxıy kúsh beretuǵın islerge baǵıshlayıq. 20 Jeytuǵın nárse sebepli, Qudaydıń islerin buzba! Jeytuǵın hámme nárse hadal. Biraq, jeytuǵın nársesi arqalı basqa adamdı azǵırıwǵa salǵan jaman is qılǵan boladı. 21 Gósh jewiń, sharap ishiwiń yamasa basqa bir nárse islewiń tuwısqanıńdı azǵırıwǵa salatuǵın bolsa, onda bunday islerdi islemegeniń durıs. 22 Bular boyınsha isenimińdi óziń menen Qudaydıń arasında saqla. Ózi durıs dep esaplaytuǵın isti islegeni ushın, ózin ayıplamaytuǵın adam qanday baxıtlı! 23 Biraq, ekilenip jeytuǵın adam húkim etiledi. Sebebi ol bunı isenim menen islemegen boladı. Al isenim menen islenbegen hár bir is – gúna. ^{▼▼ Bazı qoljazbalarda 16-baptıń 25, 26, 27-ayatları usı bapqa 24, 25, 26-ayatlar etip biriktirilgen.}