Rom 15 | KaaIBT22L | STEP | Isenimi kúshli bolǵan bizler tek ózimizdiń mápimizdi oylamay, isenimi hálsiz bolǵanlardıń hálsizliklerin kóterisiwge parızlımız.

‏ Romans 15

Iseniwshiler arasındaǵı qatnasıqlar haqqında

1 Isenimi kúshli bolǵan bizler tek ózimizdiń mápimizdi oylamay, isenimi hálsiz bolǵanlardıń hálsizliklerin kóterisiwge parızlımız. 2 Hár birimiz janımızdaǵı adamǵa ruwxıy kúsh beriw ushın, ol ushın jaqsı bolǵan nárseni gózlep, onıń mápin oylayıq. 3 Óytkeni Masiyx ta Óziniń mápin oylamadı. Muxaddes Jazıwda aytılǵanday: «Saǵan til tiygizgenlerdiń jaman sózleri Maǵan tiydi». ^{▼▼ Zab 68:10.} 4 Burın Muxaddes Jazıwlarda aytılǵanlardıń hámmesi de bizlerge tálim beriw ushın jazılǵan. Solay etip, bizler olar arqalı sabırlılıq hám jubanısh tawıp, úmit penen jasay alamız. 5 Sabırlılıq hám jubanıshtıń tiykarı bolǵan Qudaydıń Ózi sizlerdiń Masiyx Iysadan órnek alıp, awızbirshilik penen jasawıńızǵa járdem etsin. 6 Solay etip, sizler Iyemiz Iysa Masiyxtıń Ákesi bolǵan Qudaydı birgelikte hám bir awızdan alǵıslaysızlar.

Basqa milletler ushın Xosh Xabar

7 Sonlıqtan Qudaydıń alǵıslanıwı ushın Masiyx sizlerdi qabıl etkenindey, sizler de bir-birińizdi qabıl etińler. 8 Sebebi meniń aytatuǵınım mınaw: Qudaydıń yahudiylerdiń ata-babalarına bergen wádesin ámelge asırıp, Onıń sadıq ekenin kórsetiw ushın, Masiyx yahudiylerdiń xızmetshisi boldı. 9 Masiyx bunı basqa milletlerdiń de Qudaydıń miyrim-shápáátine erisip, Qudaydı alǵıslawı ushın isledi. Sebebi Muxaddes Jazıwda: «Seni basqa milletler arasında alǵıslayman hám Seniń atıńdı jırlayman», ^{▼▼ Zab 17:50; 2Pat 22:50.} – dep aytılǵan. 10 Muxaddes Jazıwda jáne de: «Háy, basqa milletler, Qudaydıń xalqı menen birge shadlanıńlar!» ^{▼▼ Nzm 32:43.} – delingen.

11 Taǵı da bılay delingen: «Barlıq milletler, Jaratqan Iyege alǵıs-maqtawlar aytıń!
Barlıq xalıqlar, Onı maqtań!» ^{▼▼ Zab 116:1.}

12 Iyshaya payǵambar da bılay deydi: «Ishaydan ^{▼▼ Ishay – Dawıttıń ákesi.} ósip shıqqan tamır kelip,
Basqa milletlerdi basqaradı.
Olar Onnan úmit etip jasaydı». ^{▼▼ Iysh 11:10.}

13 Úmittiń tiykarı bolǵan Quday Muxaddes Ruwxtıń kúshi menen úmitke tolıp tasıwıńız ushın, kewillerińizdi isenimińiz arqalı quwanısh hám tınıshlıqqa toltırsın.

Paveldiń elshilik xızmeti

14 Tuwısqanlarım, al endi sizlerge kelsek, sizlerdiń jaqsılıqqa tolı hám hár túrli bilimge bay ekenińizge, ásirese bir-birińizge aqıl-násiyat bere alatuǵınıńızǵa tolıq isenemen. 15 Biraq, Qudaydıń maǵan bergen miyrimi menen sizlerge esletip qoyıw ushın, bul xattıń ayırım jerlerin batıllıq penen jazdım. 16 Men Qudaydıń usı miyrimi menen, basqa milletler ushın Masiyx Iysanıń xızmetshisi boldım. Basqa milletler Muxaddes Ruwx penen muxaddes qılınıp, Qudayǵa unaytuǵın sıy bolıwı ushın, men Qudaydıń Xosh Xabarın bir ruwxaniy sıpatında járiyalap atırman.

17 Sonlıqtan men Masiyx Iysaǵa tiyisli bolıp, Qudayǵa degen xızmetim menen maqtana alaman. 18 Masiyx meniń menen birge bolıp, basqa milletlerdiń Qudayǵa boysınıwı ushın, sózlerim hám is-háreketlerim arqalı islegenlerinen basqa hesh nárse haqqında aytıwǵa batılım jetpeydi. 19 Bul isler káramatlı belgilerdiń hám tań qalarlıq nárselerdiń kúshi menen, jáne de Muxaddes Ruwxtıń qúdireti menen islendi. Solay etip, men Erusalimnen baslap Illirik úlkesine ^{▼▼ Illirik úlkesi – Adriya teńiziniń jaǵasındaǵı úlke.} deyin aralap, Masiyxtıń Xosh Xabarın hámme jerge járiyaladım. 20 Basqa bir adamnıń salǵan tırnaq tasınıń ústine imarat qurmayın dep, men Xosh Xabardı Masiyxtıń atın ele esitpegen jerlerde járiyalawǵa tırıstım. 21 Muxaddes Jazıwda aytılǵanday: «Onnan xabarsız bolǵanlar kóredi,
Esitpegenler túsinedi». ^{▼▼ Iysh 52:15.}

Paveldiń Rimge barıwǵa qarar etiwi

22 Mine, usı sebep janıńızǵa barıwıma maǵan kóp mártebe irkinish jasadı.

23 Endi bolsa, bul jerlerde men isleytuǵın hesh nárse qalmadı. Jáne de, men qansha jıllardan beri sizlerge barıwdı arzıw etkenim sebepli, 24 Ispaniyaǵa qaray jolǵa shıqsam, sizlerge barmaqshıman. Ótip baratırǵanımda aldı menen sizlerdi kórip, biraz diydarıńızǵa toyǵanımnan soń, maǵan járdem etip, sol jaqqa shıǵarıp salasız, degen úmittemen. 25 Al házir bolsa, men Erusalimge barıp, sol jerdegi muxaddeslerge járdem bermekshimen. 26 Óytkeni Makedoniya menen Axayadaǵı muxaddesler Erusalimdegi muxaddesler arasındaǵı mútájlikte jasaytuǵınlar ushın aqshalay járdem etiwdi maqul kórdi. 27 Awa, maqul kórdi. Olar haqıyqattan da, Erusalimdegi iseniwshiler aldında qarızdar. Sebebi ózleri Xosh Xabar arqalı alǵan ruwxıy jarılqawlardı yahudiy iseniwshileri basqa milletler menen bóliskenlikten, basqa millet iseniwshileri de olarǵa aqshalay járdem berip, xızmet etiwge parızlı. 28 Solay etip, jıynalǵan qárejetti olarǵa jetkizip, usı isti orınlaǵanımnan soń, jol-jónekey sizler menen diydar kórisip, Ispaniyaǵa ketemen. 29 Janıńızǵa barǵanımda, sizlerge Masiyxtıń tolıq jarılqawın aparatuǵınımdı bilemen.

30 Tuwısqanlarım, Iyemiz Iysa Masiyxtıń atı menen hám Muxaddes Ruwxtıń súyispenshiligi menen sizlerge jalbarınaman: meniń menen birge Qudayǵa duwa etip, men ushın bar jigerińiz benen sorańlar. 31 Yahudiyadaǵı isenbeytuǵın adamlardan qutılıwım ushın hám Erusalimdegi xızmetimdi sol jerdegi muxaddesler quwanısh penen qabıl alıwı ushın duwa etińler. 32 Jáne de, Quday qálese, men sizlerdiń janıńızǵa quwanısh penen barıp, sizler menen birge kewlimdi xoshlawım ushın da sorańlar. 33 Tınıshlıq beriwshi Qudaydıń Ózi hámmeńizge yar bolsın! Awmiyin.