Rom 16 | KaaIBT22L | STEP | Kenxreyadaǵı iseniwshiler jámáátiniń xızmetshisi bolǵan Fiba apamızdı sizlerge tapsıraman.

‏ Romans 16

Arnawlı sálemler

1 Kenxreyadaǵı iseniwshiler jámáátiniń xızmetshisi bolǵan Fiba apamızdı sizlerge tapsıraman. 2 Onı muxaddeslerge minásip túrde, Iyemizdiń atı menen qabıl qılıńlar. Jáne de, onıń qanday mútájligi bolsa da, járdem etińler. Óytkeni ol da kóp adamlarǵa, sonıń ishinde maǵan járdemshi boldı.

3 Meniń menen birge Masiyx Iysaǵa xızmet etiwshi Priskilla hám Akilaǵa sálem aytıńlar. 4 Olar meniń janım ushın óz ómirin qáwip astına qoydı. Bunıń ushın tek men emes, al basqa milletlerdiń hámme iseniwshi jámáátleri de olarǵa minnetdar. 5 Olardıń úyindegi iseniwshiler jámáátine de sálem aytıńlar. Aziya úlkesinen ^{▼▼ Aziya úlkesi – házirgi Turkiya eliniń qubla-batıs bóleginde bolǵan bir úlke.} birinshi bolıp Iysaǵa isengen súyikli tuwısqanım Epenetusqa sálem aytıńlar. 6 Sizler ushın ^{▼▼ Sizler ushın – Bazı qoljazbalarda «Bizler ushın».} kóp miynet etken Máriyamǵa sálem aytıńlar. 7 Masiyxtıń elshileri arasında abıraylı bolǵan, mennen burın Masiyxqa isengen milletleslerim hám qamaqta birge bolǵan doslarım Andronik penen Yuniyaǵa sálem aytıńlar.

8 Iyemizge tiyisli bolǵan súyikli tuwısqanım Ampliyatusqa sálem aytıńlar. 9 Bizler menen birge Masiyxqa xızmet etetuǵın Urbanusqa hám súyikli tuwısqanım Staxiyaǵa sálem aytıńlar. 10 Sınaqtan ótip, Masiyxqa ılayıqlı dep tabılǵan Apellisqa sálem aytıńlar. Aristobuldıń úy-ishine sálem aytıńlar. 11 Milletlesim Hirodionǵa sálem aytıńlar. Narkistiń úy-ishindegi Iyemizge tiyisli bolǵanlarǵa sálem aytıńlar. 12 Iyemizdiń xızmetinde miynet etip atırǵan hayallar: Trifen hám Trifosqa sálem aytıńlar. Iyemizge xızmet etiw jolında kóp miynet etken hayal – súyikli tuwısqanım Persiske sálem aytıńlar. 13 Iyemiz tárepinen tańlap alınǵan Rufusqa hám men ushın anamday bolǵan onıń anasına sálem aytıńlar. 14 Asinkrit, Flegon, Hermes, Patrobas, Hermas hám olardıń janındaǵı tuwısqanlarǵa sálem aytıńlar. 15 Filologus hám Yuliyaǵa, Nirey hám onıń qarındasına, Olimpasqa hám olardıń janındaǵı barlıq muxaddeslerge sálem aytıńlar. 16 Bir-birińizdi muxaddes posa menen súyip, sálemlesińler. Masiyxqa tiyisli bolǵan hámme jámáátler sizlerge sálem aytıp atır.

17 Tuwısqanlarım, sizlerge jalbarınaman, ózlerińizge úyretilgen tálimatqa qarsı shıǵıp, alawızlıq hám azǵırıw alıp keletuǵın adamlardan saq bolıp, olardan awlaq júrińler. 18 Sebebi bunday adamlar Iyemiz Masiyxqa emes, al óz qarınlarına xızmet etedi. Olar sada adamlardı maylı til hám jaǵımpazlıq penen aldaydı. 19 Sizlerdiń Qudayǵa boysınıp jasaytuǵınıńız hámmege málim boldı. Men sol sebepten quwanıshlıman hám sizlerdiń jaqsılıq islewde dana bolıwıńızdı, al jamanlıq islewde sada bolıwıńızdı qáleymen. 20 Tınıshlıq beriwshi Qudaydıń Ózi jaqın arada shaytandı ayaqlarıńızdıń astında ezip taslaydı. Iyemiz Iysanıń miyrimi sizlerge yar bolsın!

21 Meniń menen birge xızmet etiwshi Timofey, milletleslerim Lukiy, Yason hám Sosipater sizlerge sálem aytıp atır.

22 Bul xattı Paveldiń awzınan jazıp otırǵan men, Tertiy de, iseniwshi tuwısqanıńız sıpatında sizlerge sálem jollayman.

23 Men ushın hám pútkil iseniwshiler jámááti ushın óz úyinen orın bergen Gayus sizlerge sálem aytıp atır. Jáne de, qala qaznashısı Erastus hám tuwısqanımız Kuartus sizlerge sálem aytıp atır. [ 24 ^{▼▼ Bazı qoljazbalarda 24-ayat ta bar: «Iyemiz Iysa Masiyxtıń miyrimi hámmeńizge yar bolsın! Awmiyin».}]

Paveldiń juwmaqlawshı sózleri

25 Men járiyalap júrgen Iysa Masiyx haqqında Xosh Xabar arqalı, yaǵnıy Ózi áyyemgi waqıtlardan beri qupıya tutqan sırın ashıwı arqalı Quday sizlerdiń isenimińizdi bekkemleytuǵın qúdiretke iye. 26 Usı sır payǵambarlardıń Jazıwları arqalı házir ashılıp, máńgi jasaytuǵın Qudaydıń buyrıǵı boyınsha, barlıq milletlerge málim etildi. Bul barlıq milletlerdiń Qudayǵa isenip, Oǵan boysınıp jasawı ushın boldı. 27 Jalǵız hám dana Qudayǵa Iysa Masiyx arqalı máńgige dańq bolsın! Awmiyin. ^{▼▼ Bazı qoljazbalarda 25-27-ayatlar 14:23-ayattıń izine tirkelgen.}