Rom 3 | KaaIBT22L | STEP | Olay bolsa, yahudiy bolıwdıń qanday da bir artıqmashlıǵı bar ma? Ya bolmasa, súnnetleniwdiń paydası bar ma?

‏ Romans 3

1 Olay bolsa, yahudiy bolıwdıń qanday da bir artıqmashlıǵı bar ma? Ya bolmasa, súnnetleniwdiń paydası bar ma? 2 Álbette, bar. Yahudiy bolıw – hár tárepleme artıqmashlıqqa iye. Óytkeni eń aldı menen Qudaydıń sózleri olarǵa isenip tapsırılǵan. 3 Eger olardıń ayırımları Qudaydıń sózlerine sadıq bolmay shıqqan bolsa ne bolıptı? Olardıń sadıq bolmawı Qudaydıń sadıqlıǵın biykarlay ala ma? 4 Hesh qashan! Hámme adamlar ótirikshi bolsa da, Quday haq. Sebebi Muxaddes Jazıwda Quday haqqında bılay delingen: «Haq ekenińdi sózleriń menen kórseteseń,
Húkim shıǵarılǵanda jeńiske eriseseń». ^{▼▼ Zab 50:6.}

5 Biraq, bizlerdiń nahaqlıǵımız Qudaydıń haqlıǵın ashıp kórsetse, onda ne deymiz? Quday bizlerdi ǵázep penen jazalasa, ádalatsız bolǵanı ma? Men bulardı adamlardıń oyı boyınsha aytıp atırman. 6 Hesh qashan! Eger Quday ádalatsız bolsa, Ol dúnyanı húkim ete alar ma edi? 7 Degen menen, ayırımlar bılay dep soraw qoyıwı múmkin: «Eger meniń nahaqlıǵım Qudaydıń haqlıǵınıń artıp, Onıń ullılanıwına xızmet etse, sonda nege men gúnakar bolıp húkim etilmektemen?» 8 Solay etip: «Jaqsılıq shıqsın dep, jamanlıq isley bereyik», – deyik pe? Bazı adamlar bizlerge jala jawıp, usınday sózlerdi ayttı demekte. Bunday adamlar Qudaydıń jazasına ılayıqlı.

Birde bir haq adam joq

9 Endi ne dewge boladı? Biz yahudiyler basqa milletlerden artıqpız ba? Álbette, yaq! Óytkeni álle qashan dálillegenimdey, yahudiy de, basqa millet adamı da, yaǵnıy hár bir adam gúnanıń biyligi astında. 10 Muxaddes Jazıwlarda aytılǵanınday: «Hesh bir haq adam joq,
Birde biri joq.
11 Hesh bir túsinetuǵın adam joq.
Hesh kim Qudaydı izlemeydi.
12 Hámme joldan adasqan,
Barlıǵı jaramsız bolǵan.
Jaqsılıq qılatuǵın hesh kim joq.
Birde biri joq». ^{▼▼ Zab 13:1-3; 52:2-4; Waz 7:20.}
13 «Awızları ashıq bir qábir sıyaqlı,
Olar sózleri menen adamlardı ashıq górge tıǵadı».
«Maylı tilleri menen jalǵan sóyleydi,
Tillerinde jılan záhári bar». ^{▼▼ Zab 5:10; 139:4.}
14 «Awızları tolı ǵarǵıs-nálet sózlerge». ^{▼▼ Zab 9:28.}
15 «Ayaqları shaqqan qan tógiwge.
16 Olar qádem basqan jerge keler qıyralıw hám bále.
17 Bilmes olar tınıshlıq jolın». ^{▼▼ Iysh 59:7-8.}
18 «Qudaydan qorqıw da joq kewillerinde». ^{▼▼ Zab 35:2.}

19 Muxaddes Nızamda aytılǵanlardıń hámmesi Muxaddes Nızam astında bolǵanlarǵa aytılǵanın bilemiz. Solay etip, hár bir til baylanıp, pútkil dúnya Qudaydıń aldında esap beredi. 20 Sonlıqtan Muxaddes Nızamdı orınlaǵanı arqalı hesh bir adam Qudaydıń aldında aqlana almaydı. Kerisinshe, Muxaddes Nızam arqalı adam óziniń gúnakar ekenin bilip aladı.

Isenim menen aqlanıw

21 Endi bolsa, Qudaydıń adamdı aqlaytuǵın ádilligi Muxaddes Nızamǵa baylanıslı bolmay-aq ashıq kórsetildi. Muxaddes Nızam da, payǵambarlardıń Jazıwları da bul haqqında gúwalıq beredi. 22 Qudaydıń ádilligi adamlardı olardıń Iysa Masiyxqa degen isenimi arqalı aqlaydı. Bunı Ol isenetuǵın hár bir adam ushın isleydi. Sebebi adamlar arasında hesh qanday ayırmashılıq joq. 23 Óytkeni hámme gúna islegen hám Qudaydıń saltanatınan ayırılǵan. 24 Biraq, adamlar Qudaydıń miyrimi menen, Iysa Masiyxtıń qanı arqalı esheyin aqlanadı. 25 Masiyxqa degen isenim menen, Onıń qanı arqalı gúnaları keshirilsin dep, Quday Masiyxtı adamlar ushın qurbanlıqqa baǵıshladı. Quday bul arqalı Óz ádilligin kórsetti. Sebebi Quday sabırlılıq etip, burınnan beri islengen gúnalardı keshirdi. 26 Jáne de, házirgi waqıtta Ol ádilligin dálillep, Óziniń haq ekenin hám Iysaǵa isengen hár bir adamdı aqlaytuǵının kórsetti.

27 Endi bizler ne menen maqtana alamız? Hesh nárse menen. Qanday jol menen aqlana alamız? Muxaddes Nızamdı orınlaw jolı menen be? Yaq, isenim menen. 28 Óytkeni bizler adamnıń Muxaddes Nızamdı orınlaǵanı arqalı emes, al isenim menen aqlanatuǵının moyınlaymız. 29 Írasında da, Quday tek yahudiylerdiń Qudayı ma? Ol basqa milletlerdiń de Qudayı emes pe? Álbette, Ol basqa milletlerdiń de Qudayı. 30 Sebebi súnnetli yahudiylerdi de, súnnetsiz bolǵan basqa milletlerdi de tek isenim menen aqlaytuǵın Quday – jalǵız.

31 Solay etip, bizler: «Adamlar tek isenim menen aqlanadı», – dep, Muxaddes Nızamdı biykarlaymız ba? Yaq, kerisinshe, onı tastıyıqlaymız.