Rom 5 | KaaIBT22L | STEP | Solay etip, isenim menen aqlanǵanımız sebepli, Iyemiz Iysa Masiyx arqalı Quday menen jarastıq.

‏ Romans 5

Quday menen jarasıw

1 Solay etip, isenim menen aqlanǵanımız sebepli, Iyemiz Iysa Masiyx arqalı Quday menen jarastıq. 2 Iysa Masiyx arqalı Qudaydıń miyrimine isenimimiz benen iye bolıp jasamaqtamız. Jáne de, Qudaydıń ullılıǵına erisiwden úmit etip, quwanamız. 3 Bizler tek bul sebepli emes, al qıyınshılıqlar sebepli de quwanamız. Sebebi qıyınshılıqlardan sabırlılıq, 4 sabırlılıqtan jaqsı minez-qulıq, jaqsı minez-qulıqtan úmit payda bolatuǵının bilemiz. 5 Sol úmit bizlerdi uyatqa qaldırmaydı. Óytkeni Quday bizlerge bergen Muxaddes Ruwxı arqalı júreklerimizdi Óz súyispenshiligine toltırdı.

6 Awa, ózlerimizdi aqlawǵa ele kúshsiz bolǵanımızda Masiyx belgilengen waqıtta qudaysız bolǵan bizler ushın óldi. 7 Hesh kim haq adam ushın janın ólimge qıymaydı. Hátte, ózine qáwender bolǵan adam ushın da janın ólimge qıyıwdı qáleytuǵın adamlar az. 8 Biraq, bizler ele gúnakar bolǵan waqtımızda Masiyx bizler ushın óldi. Bizlerge degen súyispenshiligin Quday usılay dálilledi. 9 Sonlıqtan endi Masiyxtıń qanı arqalı aqlanǵanımız sebepli, Ol arqalı Qudaydıń ǵázebinen qutqarılatuǵınımız da anıq. 10 Sebebi bizler Qudaydıń dushpanı bolsaq ta, Onıń Ulınıń ólimi arqalı Quday menen jarastıq. Endi Quday menen jarasıp, Onıń Ulınıń ómiri arqalı qutqarılatuǵınımız da anıq. 11 Jáne de, bunıń menen sheklenip qoymay, bizlerdi endi Quday menen jarastırǵan Iyemiz Iysa Masiyx arqalı Quday menen qatnasta bolıp quwanamız.

Adam-ata hám Iysa Masiyx

12 Dúnyaǵa bir adam arqalı, yaǵnıy Adam-ata arqalı gúna keldi, al gúna sebepli ólim keldi. Solay etip, hesh bir adam ólimnen qashıp qutıla almaytuǵın boldı. Óytkeni hámme gúna islegen edi. 13 Muxaddes Nızam berilmesten burın da dúnyada adamlar gúna isleytuǵın edi. Biraq, Muxaddes Nızam bolmaǵan waqıtta gúna gúna dep esaplanbadı. 14 Degen menen, Adam-atadan Muwsaǵa deyin jasaǵanlar Adam-ata islegen sol gúnanı islemegen bolsa da, ólim olardıń ústinen húkimdarlıq etti.

Al Adam-ata keliwi tiyis Adamnıń, yaǵnıy Masiyxtıń tımsalı. 15 Biraq, olar arasında úlken ayırmashılıq bar. Qudaydıń sıyı Adam-atanıń gúnasına uqsamaydı. Sebebi bir adamnıń gúnası sebepli kóp adamlar ólgen bolsa da, Qudaydıń miyrimi hám basqa bir adamnıń, yaǵnıy Iysa Masiyxtıń miyrimi menen berilgen sıydı kóp adamlar mol-molaqay etip aldı. 16 Qudaydıń sıyınıń nátiyjesi menen bir adamnıń gúnasınıń nátiyjesi birdey emes. Adam-atanıń gúnasınıń aqıbeti húkim etiliwge alıp keldi, biraq Qudaydıń sıyı sebepli, kóp gúnalarımızǵa qaramastan, bizlerge aqlanıw keldi. 17 Bir adamnıń gúnası sebepli, sol adam arqalı pútkil adamzat ústinen ólim biylik etken bolsa, endi tek bir adam, yaǵnıy Iysa Masiyx arqalı Qudaydıń mol miyrimin alıp aqlanǵanlar ústinen ómir biylik etedi.

18 Solay etip, bir adamnıń gúnası sebepli pútkil adamzat húkim etilgen bolsa, bir adamnıń haq isi sebepli pútkil adamzat aqlanıp, ómirge eristi. 19 Bir adamnıń boysınbaǵanı sebepli kóp adamlar gúnakar bolıp qalǵanınday, bir adamnıń boysınǵanı sebepli kóp adamlar aqlanadı. 20 Adamlar ózleriniń qanshelli gúnakar ekenin biliw ushın Muxaddes Nızam berildi. Biraq, gúna kóbeygen sayın, Qudaydıń miyrimi onnan da artıp bardı. 21 Solay etip, gúnanıń ólim arqalı biylik etkenindey, Qudaydıń miyrimi de aqlawı arqalı biylik etip, Iyemiz Iysa Masiyx sebepli máńgilik ómirge eristiredi.