Rom 7 | KaaIBT22L | STEP | Háy, Muxaddes Nızamdı biliwshi tuwısqanlarım, men sizlerge qarata aytıp atırman: Muxaddes Nızamnıń adam ústinen tek tiri waqtında ǵana biylik júrgizetuǵının bilmeysizler me?

‏ Romans 7

Nızamnan azat bolıw

1 Háy, Muxaddes Nızamdı biliwshi tuwısqanlarım, men sizlerge qarata aytıp atırman: Muxaddes Nızamnıń adam ústinen tek tiri waqtında ǵana biylik júrgizetuǵının bilmeysizler me? 2 Mısalı: kúyewi bar hayal kúyewiniń kóziniń tirisinde oǵan nızam boyınsha baylanǵan boladı. Biraq, kúyewi qaytıs bolsa, hayal neke nızamınan azat boladı. 3 Solay etip, hayal kúyewiniń kóziniń tirisinde basqa bir erkek penen jasasa, neke hadallıǵın buzǵan bolıp esaplanadı. Biraq, kúyewi ólse, hayal nızam boyınsha azat boladı. Ol basqa bir erkekke turmısqa shıqsa da, neke hadallıǵın buzǵan bolmaydı.

4 Sol sıyaqlı, tuwısqanlarım, sizler de Basqaǵa, yaǵnıy ólimnen qayta tirilgen Masiyxqa tiyisli bolıwıńız ushın, Masiyxtıń denesiniń atanaq aǵashta ólgeni arqalı Muxaddes Nızam aldında ólgensiz. Bul hámmemizdiń Qudayǵa xızmet etip, jemis beriwimiz ushın boldı. 5 Óytkeni burın bizler gúnakar tábiyatımızǵa boysınıp jasaǵanımızda, Muxaddes Nızam sebepli payda bolǵan gúnakar qálewler denemizdiń múshelerinde háreket etetuǵın edi. Sonıń nátiyjesinde, bizler ólimge jetelewshi jemisler beretuǵın edik. 6 Endi bolsa, bizler burın ózlerimizdi baylap qoyǵan Muxaddes Nızam ushın ólip, Muxaddes Nızamnan azat boldıq. Solay etip, jazılǵan Muxaddes Nızam boyınsha basqarılatuǵın eski jol menen emes, al Muxaddes Ruwx basqaratuǵın jańa jol menen Qudayǵa xızmet etpektemiz.

Gúna menen gúres

7 Olay bolsa, ne deyik? Muxaddes Nızam jaman bolǵanı ma? Hesh qashan! Eger Muxaddes Nızam bolmaǵanda, men gúnanıń ne ekenin bilmegen bolar edim. Eger Muxaddes Nızam: «Basqa birewdiń nársesin kúseme», ^{▼▼ Shıǵ 20:7; Nzm 5:21.} – demegende, men kúsewdiń gúna ekenin bilmegen bolar edim. 8 Degen menen, gúna usı buyrıqtan paydalanıp, mende hár túrli kúsewlerdi payda etti. Sebebi Muxaddes Nızam bolmasa, gúna óli boladı. 9 Men bir waqıtları Muxaddes Nızamdı bilmey jasaǵanımda tiri edim. Biraq, Qudaydıń buyrıqların bilgenimnen soń, mende gúna tirilip, háreket ete basladı, 10 al men óldim. Solay etip, ómirge iye bolıw ushın berilgen bul buyrıqlar meniń ólimime sebepshi boldı. 11 Óytkeni gúna buyrıqtan paydalanıp, meni aldadı hám usı buyrıq arqalı meni óltirdi. 12 Solay bolsa da, Muxaddes Nızam – muxaddes, Qudaydıń buyrıqları da muxaddes, haq hám jaqsı.

13 Solay eken, jaqsı nárse maǵan ólim alıp keldi me? Hesh qashan! Gúna maǵan jaqsı nárse arqalı ólim alıp keldi. Bul gúnanıń gúna bolıp ashıq biliniwi ushın boldı. Solay etip, buyrıq arqalı gúnanıń qanshelli jaman ekeni belgili boladı. 14 Bizler Muxaddes Nızamnıń ruwxıy ekenin bilemiz. Al men gúnaǵa qul bolıp satılǵan, ótkinshi denege iye adamman. 15 Men ne islep atırǵanımdı ózim túsinbeymen. Sebebi men qálegen nársemdi emes, al jek kóretuǵın nársemdi isleymen. 16 Eger men qálemegen nársemdi islep atırǵanımda isimniń jaman ekenin moyınlasam, onda Muxaddes Nızamnıń jaqsı ekenin maqullaǵan bolaman. 17 Olay bolsa, bul isti meniń ózim emes, al ishimde jasaytuǵın gúna islep atırǵan boladı. 18 Meniń ishimde, yaǵnıy gúnakar tábiyatımda hesh bir jaqsı nárseniń joq ekenin bilemen. Ishimde jaqsılıq islewge qálew bolsa da, kúshim jetpeydi. 19 Óytkeni ózim islewdi qáleytuǵın jaqsı isti emes, al kerisinshe, islewdi qálemeytuǵın jaman isti isleymen. 20 Eger men ózim qálemeytuǵın nárseni islesem, onda onı meniń ózim emes, al ishimde jasaytuǵın gúna islegen boladı.

21 Solay etip, men ózimde mınaday nızamnıń bar ekenin bildim: men jaqsı nárseni islewdi qálegenimde, ishimdegi jamanlıq háreket etiwge tayar turadı. 22 Men ruwxım menen Qudaydıń Nızamın quwanıshlı túrde maqullayman. 23 Biraq, denemniń múshelerinde basqa bir nızamdı bayqayman. Ol meniń sana-sezimimniń nızamına qarsı urısıp, meni denemniń múshelerindegi gúna nızamına tutqın etedi. 24 Wah, sorlı basım! Ólimge jetelewshi bul deneden meni kim qutqaradı? 25 Iyemiz Iysa Masiyx arqalı tek jalǵız Quday ǵana qutqaradı! Qudayǵa shúkirler bolsın!

Solay etip, men óz sana-sezimim menen Qudaydıń Nızamına, al gúnakar tábiyatım menen gúnanıń nızamına xızmet etip atırman.