Rom 8 | KaaIBT22L | STEP | Solay etip, Masiyx Iysaǵa tiyisli bolǵanlarǵa qarsı endi hesh qanday húkim joq.

‏ Romans 8

Ómir beriwshi Muxaddes Ruwx

1 Solay etip, Masiyx Iysaǵa tiyisli bolǵanlarǵa ^{▼▼ Bazı qoljazbalarda «…yaǵnıy dene qálewi menen emes, al Ruwxtıń jetelewi menen jasaytuǵınlarǵa» degen sózler de bar.} qarsı endi hesh qanday húkim joq. 2 Sebebi Masiyx Iysa arqalı ómir beretuǵın Muxaddes Ruwxtıń nızamı meni gúnanıń hám ólimniń nızamınan azat qıldı. 3 Adamnıń gúnakar tábiyatı hálsiz bolǵanlıqtan, adam Muxaddes Nızamdı tolıq orınlay almadı. Sonlıqtan Muxaddes Nızam adamdı qutqara almadı, biraq onı Qudaydıń Ózi qutqardı: Quday Óz Ulın adam denesinde bul dúnyaǵa jiberip, Onı gúnalar ushın tólenetuǵın qurbanlıq qılıp baǵıshladı hám bizlerdiń gúnalarımız júklengen Óz Ulınıń denesin húkim etti. 4 Solay etip, Quday bunı gúnakar tábiyatımızdıń emes, al Muxaddes Ruwxtıń jetelewi menen júretuǵın bizlerdiń ómirimizde Muxaddes Nızamnıń ádil talapları orınlansın dep isledi.

5 Óytkeni gúnakar tábiyatınıń jetelewi menen júretuǵınlar óz gúnakar tábiyatınıń qáleytuǵın nárselerin oylaydı, al Muxaddes Ruwxtıń jetelewi menen júretuǵınlar Muxaddes Ruwxtıń qáleytuǵın nárselerin oylaydı. 6 Gúnakar tábiyat basqaratuǵın oy-pikirler ólimge, al Muxaddes Ruwx basqaratuǵın oy-pikirler ómirge hám tınıshlıqqa eristiredi. 7 Sebebi gúnakar tábiyat basqaratuǵın oy-pikirge iye adam – Qudayǵa dushpan. Ol Qudaydıń Nızamına boysınbaydı hám boysına almaydı da. 8 Kim de kim gúnakar tábiyatınıń jetelewi menen júrse, ol Qudayǵa unay almaydı.

9 Biraq, ishińizde Qudaydıń Ruwxı jasap atırǵan bolsa, onda sizlerdi gúnakar tábiyatıńız emes, al Muxaddes Ruwx basqarıp atırǵan boladı. Kim de kim Masiyxtıń Ruwxına iye bolmasa, ol Masiyxqa tiyisli emes. 10 Al eger ishińizde Masiyx jasap atırǵan bolsa, deneńiz gúna sebepli óletuǵın bolsa da, ruwxıńız aqlanǵanıńız sebepli tiri boladı. 11 Iysanı ólimnen qayta tiriltken Qudaydıń Ruwxı ishińizde jasap atırǵan bolsa, onda Masiyx Iysanı ólimnen qayta tiriltken Quday ishińizde jasap atırǵan Óz Ruwxı arqalı óletuǵın deneńizdi de tiriltedi.

12 Solay etip, tuwısqanlarım, bizler gúnakar tábiyatımızǵa boysınıp, onıń jetelewi menen júriwge parızlı emespiz. 13 Óytkeni eger gúnakar tábiyatıńızdıń jetelewi menen júrseńiz, ólesiz. Al gúnakar tábiyatıńızdıń jaman islerinen Muxaddes Ruwxtıń kúshi menen tolıq waz keshseńiz, jasaysız. 14 Qudaydıń Ruwxı menen basqarılatuǵınlardıń hámmesi – Qudaydıń balaları. 15 Sebebi sizler ózlerińizdi jáne qul etip, qorqınısh beretuǵın ruwxtı emes, al ózlerińizdi Qudayǵa bala qılǵan Muxaddes Ruwxtı qabıl ettińiz. Usı Ruwx arqalı Qudaydı: «Áke, Ákejanım!» dep shaqırasız. 16 Muxaddes Ruwxtıń Ózi bizlerdiń ruwxımız benen birlikte Qudaydıń balaları ekenligimiz haqqında gúwalıq beredi. 17 Eger bizler Qudaydıń balaları bolsaq, onda miyrasqa iye bolamız. Masiyx penen birge ullılanıw ushın, Onıń menen birge azap sheksek, onda bizler Masiyx penen birge miyrasqa sherik bolǵan Qudaydıń miyrasxorlarımız.

Keleshektegi ullılıq

18 Meniń oyımsha, házirgi qıyınshılıqlar keleshekte bizlerge beriletuǵın ullılıqqa salıstırǵanda hesh nárse emes. 19 Sonıń menen birge, pútkil jaratılıs Qudaydıń Óz balaların ashıq kórsetetuǵın kúnin intizarlıq penen kútpekte. 20 Óytkeni pútkil jaratılıs bul ótkinshi ómirge tutqın etilgen. Bul olardıń ózleriniń erki menen emes, al tutqın qılǵan Qudaydıń erki menen bolǵan. 21 Olar ózleriniń bul nabıt qılıwshı qullıqtan qutqarılatuǵınınan hám Qudaydıń balalarınıń ullı azatlıqqa erisetuǵınınan úmit etedi.

22 Bizlerge málim, pútkil jaratılıs házirge deyin birlikte tolǵaq azabın shekkendey azap shegip, nala etpekte. 23 Tek jaratılıs emes, al Qudaydıń birinshi sıyı bolǵan Muxaddes Ruwxtı alǵan bizler de perzent bolıp asırap alınıwdı, yaǵnıy denemizdiń qutqarılıwın intizarlıq penen kútip, ishimizden nala etpektemiz. 24 Sebebi bizler qutqarılǵanımız sebepli úmitke iyemiz. Eger bizler ózlerimiz úmit etetuǵın nárseni kórip turǵan bolsaq, onda ol úmit emes. Kózge kórinip turǵan nársege kim úmit etedi? 25 Biraq, ele kórmegenimizge úmit etsek, onı sabırlılıq penen kútemiz.

26 Sonıń menen birge, Muxaddes Ruwx ta hálsiz bolǵan bizlerge járdem beredi. Óytkeni bizler qalay duwa etiw kerekligin bilmeymiz. Biraq, Muxaddes Ruwxtıń Ózi sóz benen aytıp jetkize almaytuǵın dárejede nala shegip, bizler ushın Qudaydan ótinish etedi. 27 Adamlardıń kewillerinde ne bar ekenin biliwshi Quday Muxaddes Ruwxtıń oy-pikirlerin biledi. Sebebi Muxaddes Ruwx muxaddesler ushın Qudaydıń erki boyınsha ótinish etedi.

28 Quday Ózin súyetuǵınlarǵa, yaǵnıy Onıń qálewi boyınsha tańlanǵanlarǵa hámme nárseni jaqsılıq qılıp xızmet ettiretuǵının bilemiz ^{▼▼ Quday Ózin súyetuǵınlarǵa, yaǵnıy Onıń qálewi boyınsha tańlanǵanlarǵa hámme nárseni jaqsılıq qılıp xızmet ettiretuǵının bilemiz – Bazı qoljazbalarda: «Qudaydı súyetuǵınlarǵa, yaǵnıy Onıń qálewi boyınsha tańlanǵanlarǵa hámme nárse jaqsılıq bolıp xızmet etetuǵının bilemiz».}. 29 Óytkeni Quday Ózi aldınnan bilgen adamlarınıń Ulına uqsawı ushın olardı aldın ala belgiledi. Solay etip, Quday Óz Ulınıń kóp tuwısqanlar arasında tuńǵısh bolıwı ushın usılay isledi. 30 Quday Ózi aldın ala belgilegen adamların shaqırdı, shaqırǵan adamların aqladı, al aqlaǵan adamların ullılıqqa eristirdi.

Qudaydıń súyispenshiligi

31 Olay bolsa, buǵan ne deymiz? Eger Quday bizlerdi jaqlasa, bizlerge kim qarsı tura aladı? 32 Quday, hátte, Óz Ulın da ayamay, Onı bizlerdiń hámmemiz ushın qurbanlıq qılıp baǵıshlaǵan bolsa, Onıń menen birlikte bizlerge hámme nárseni bermes pe eken? 33 Qudaydıń tańlap alǵan adamları bolǵan bizlerdi kim ayıplay aladı? Qudaydıń Ózi bizlerdi aqlaydı-ǵo. 34 Kim bizlerdi húkim ete aladı? Hesh kim! Sebebi ólip, ólimnen qayta tirilgen Masiyx Iysa Qudaydıń oń jaǵında bolıp ^{▼▼ Zab 109:1.}, bizler ushın ótinbekte. 35 Masiyxtıń ^{▼▼ Masiyxtıń – Bazı qoljazbalarda «Qudaydıń».} súyispenshiliginen bizlerdi kim ayıra aladı? Hesh kim. Qıyınshılıq ta, qayǵı da, quwdalaw da, ashlıq ta, jalańashlıq ta, qáwip te, qılısh ta ayıra almaydı. 36 Muxaddes Jazıwda aytılǵanınday: «Bizler Seniń ushın hár kúni óltirilmektemiz,
Bizlerdi shalınatuǵın qoylar dep esaplaydı». ^{▼▼ Zab 43:23.}

37 Biraq, bulardıń hámmesiniń ústinen bizlerdi súyetuǵın Masiyx sebepli úlken jeńiske erisemiz.

38 Óytkeni men isenemen: ólim de, ómir de, perishteler de, hákimshilikler de, házirgi hám keleshek zaman da, kúshler de, 39 bálentlik te, tereńlik te, ulıwma, jaratılǵan hesh bir nárse bizlerdi Qudaydıń bizlerge Iyemiz Masiyx Iysa arqalı bergen súyispenshiliginen ayıra almaydı.