‏ Ruth 2

Rut hám Boazdıń ushırasıwı

1Naǵıymanıń kúyewi Elimelextiń Boaz degen tiyreles aǵayini bar edi. Ol abıraylı hám bay adam edi. 2Bir kúni moablı Rut Naǵıymaǵa:

– Men atızǵa barayın. Miyrimli birewdi ushıratsam, sonıń atızınan masaq terip keleyin ▼
▼ Masaq terip keleyin – Kámbaǵallardıń terip alıwı ushın, shashılǵan masaqlar atızda qaldırılǵan. Leb 19:9-10; Nzm 24:19.
, – dedi.

– Yaqshı, qızım, bara ǵoy, – dedi Naǵıyma.

3Rut atızǵa bardı da, oraqshılardıń izinen júrip, masaq tere basladı. Bul egislik maydan Elimelextiń tiyreles aǵayini Boazdıń menshik jeri bolıp shıqtı.

4Sol waqıtta Beytlehemnen Boaz kelip, oraqshılarǵa:

– Jaratqan Iye sizler menen birge bolsın! – dedi.

Oraqshılar oǵan:

– Sizdi Jaratqan Iye jarılqasın! – dedi.

5Boaz olardıń basqarıwshısınan:

– Bul jas kelinshek kim? – dep soradı.

6Oraqshılardıń basqarıwshısı bılay dep juwap berdi:

– Bul Moab elinen Naǵıyma menen birge kelgen moablı jas kelinshek. 7Ol maǵan: «Oraqshılardıń izinen júrip, bawlardıń arasına túsken masaqtı teriwime ruxsat etiń», – degen edi. Shertekte azǵantay ǵana dem alǵanı bolmasa, erte azannan usı waqıtqa deyin tınbay atızda islep atır.

8Boaz Rutqa qarap:

– Qızım, sózime qulaq sal. Masaq teriw ushın basqa atızǵa barmay-aq qoy. Usı jerde, meniń xızmetshi qızlarımnıń qasında júrip, tere ber. 9Oraqshılar qaysı atızdı orsa, názeriń sol jerde bolıp, qızlardıń keyninen júre ber. Xızmetshilerge saǵan tiymewge buyrıq berdim. Eger shólleseń barıp, xızmetshiler toltırıp qoyǵan ıdıstan suw ishe ber, – dedi.

10Rut Boazdıń aldında et betinen jıǵılıp, tájim etti de:

– Men bir jat jerli adam bolsam da, nege siz maǵan názer awdarıp, miyrimlilik kórsetip atırsız? – dedi.

11Boaz oǵan bılay dep juwap berdi:

– Kúyewiń qaytıs bolǵannan keyin, eneńe nelerdi islegenińniń hámmesin esittim. Sen ata-anańdı hám óz watanıńdı taslap, burın óziń tanımaǵan xalıq arasına jasawǵa keldiń. 12Bul jaqsı isleriń Jaratqan Iyeden qaytsın! Sen Izraildıń Qudayı Jaratqan Iyeniń qolı astınan pana izlegen ekenseń, Onıń Ózi seni mol-mol etip sıylıqlasın.

13Sonda Rut:

– Endigiden bılay da, maǵan degen miyrimliligińiz tawısılmasın, mırzam! Men siziń shorılarıńızdıń birine de arzımayman. Biraq siz mendey qulıńızǵa jubanısh berdińiz hám jıllı sóyledińiz, – dedi.

14Túslik waqtı kelgende, Boaz oǵan:

– Berman kel, nannan alıp, sirke suwına batırıp je, – dedi.

Rut oraqshılardıń janına barıp otırdı. Boaz oǵan quwırmashtan uzattı. Rut jep toyıp aldı hám jegeninen awıstırıp alıp qoydı.

15Sonnan keyin Rut masaq teriw ushın ornınan turıp ketkende, Boaz xızmetshilerge bılay dep buyırdı:

– Rut bawlar qasınan da masaq tere bersin, onı qapa qılıwshı bolmańlar. 16Hátteki, oǵan dástelerden shashıp qaldırıp ketińler. Ol terip alsın, onıń kewline tiymeńler.

17Solay etip, Rut keshke deyin atızda masaq terdi hám tergenlerin túyip, suwırǵanda bir efaǵa ▼
▼ Bir efa – shama menen 22 l.
 shamalas arpa aldı. 18Rut dándi kóterip qalaǵa qaray júrip ketti. Ol terip kelgen dánin enesine kórsetti hám túste ózi jegen azıǵınan awıstırıp qaldırǵanın oǵan berdi. 19Enesi Rutqa:

– Búgin qay jerde masaq terdiń, qay jerde islediń? Saǵan názerin awdarǵan adamdı Quday jarılqasın! – dedi.

Rut kimniń atızında jumıs islegenin enesine aytıp:

– Búgin men islegen egislik jerdiń iyesi Boaz degen adam, – dedi.

20Naǵıyma kelinine:

– Tirilerden hám marhumlardan Óz miyrim-shápáátin ayamaǵan Jaratqan Iye sol adamdı jarılqasın, – dedi. Naǵıyma jáne dawam etip: – Ol kisi bizlerge jaqın adam, ámeńgerlerimizdiń ▼
▼ Ámeńger – sózlikke qarań.
 biri boladı, – dedi.

21Moablı Rut bılay dedi:

– Awa, hátteki, ol maǵan: «Xızmetshilerim jıyın-terim islerin tamamlaǵansha, olar menen birge júre ber», – degen edi.

22Naǵıyma óz kelini Rutqa:

– Júdá jaqsı, qızım, sol adamnıń xızmetshi qızları menen birge júre bergeniń jaqsıraq. Basqanıń atızına barsań, saǵan azar beriwi múmkin, – dedi.

23Solay etip, Rut arpa hám biyday oraǵınıń aqırına deyin Boazdıń xızmetshi qızlarınan ayırılmadı. Ol masaq terip, enesi menen birge jasay berdi.
Copyright information for KaaIBT22L