Rut 3 | KaaIBT22L | STEP | Bir kúni qáyin enesi Naǵıyma Rutqa bılay dedi: – Qızım, saǵan jaqsı bolıwı ushın, seniń úyli-jaylı bolıp ketiwińe men járdem beriwim kerek emes pe?

‏ Ruth 3

Ruttıń Boazǵa óz ótinishin bildiriwi

1 Bir kúni qáyin enesi Naǵıyma Rutqa bılay dedi:

– Qızım, saǵan jaqsı bolıwı ushın, seniń úyli-jaylı bolıp ketiwińe men járdem beriwim kerek emes pe? 2 Aytpaqshı, sen óziń xızmetshileri menen birge jumıs islegen sol Boaz bizlerdiń jaqın aǵayinimiz-ǵo. Minekey, búgin túnde ol qırmanda arpasın suwıradı. 3 Endi sen juwınıp, ústińe átir sewip, shıraylı kiyimińdi kiyip al, sonnan keyin qırmanǵa bar. Biraq Boaz qashan iship-jep bolmaǵansha, oǵan kórinbe. 4 Ol uyıqlawǵa jatqanda, jatqan jerin bilip al. Sonnan keyin bar da, onıń ayaq ush betin ashıp, sol jerde jat. Ol saǵan ne islewiń kerekligin ózi aytadı.

5 Rut enesine:

– Maǵan aytqanlarıńnıń hámmesin orınlayman, – dedi.

6 Sonnan keyin Rut qırman basına barıp, enesiniń tapsırǵanlarınıń hámmesin orınladı. 7 Boaz iship-jep, kewli kóterildi hám gúdiniń qasına barıp, uyıqlawǵa jattı. Rut ásten sezdirmey keldi de, onıń ayaq ush betin ashıńqırap jattı.

8 Túnniń ortasında Boaz shorshıp oyanıp ketti. Ol burılıp qarap, ayaq ush betinde bir hayaldıń jatırǵanın kórdi hám onnan:

9 – Sen kimseń? – dep soradı.

Rut oǵan:

– Men siziń shorıńız Rutpan. Shorıńızdı óz panańızǵa alsańız, sebebi siz ámeńgerimiz bolasız, – dedi.

10 Boaz oǵan bılay dedi:

– Qızım, seni Jaratqan Iye jarılqasın! Seniń bul sońǵı jaqsılıǵıń aldınǵısınan da ullı. Sebebi sen ya kámbaǵal bolsın, ya bay bolsın, jas jigitler arasınan ózińe kúyew izlemediń. 11 Endi qáweterlenbe, qızım. Aytqanlarıńnıń hámmesin orınlayman. Pútkil qala xalqı seniń adamgershilikli hayal ekenińdi biledi. 12 Meniń sizlerge ámeńger ekenligim durıs, biraq mennen de jaqınıraq ámeńgerińiz bar. 13 Búgin túnde usı jerde qonıp qal. Erteń azanda sol aǵayiniń ámeńgerlik wazıypasın orınlawǵa ırazı bolsa, onda júdá jaqsı. Eger de ol ámeńgerlik wazıypasın orınlawdı qálemese, tiri Jaratqan Iye haqı ant ishemen, bul wazıypanı men orınlayman. Endi tańǵa deyin jata tur.

14 Solay etip, Rut Boazdıń ayaq ush betinde tań atqansha jatıp qaldı. Biraq ol tań saz berip, adamlar bir-birin tanımaytuǵın waqıtta turdı. Óytkeni Boaz: «Qırmanǵa hayal adamnıń kelgenin hesh kim bilmesin», – degen edi.

15 Boaz Rutqa:

– Jawlıǵıńdı jayıp, uslap tur, – dedi.

Rut jawlıǵın jayıp, uslap turdı. Boaz jawlıqqa altı ólshem arpanı ólshep salıp, iynine arqalatıp jiberdi. Keyin ózi de qalaǵa qaray júrip ketti.

16 Rut úyine qaytıp kelgende, enesi onnan:

– Qızım, ne boldı? – dep soradı.

Rut ózine Boazdıń ne islegeniniń hámmesin aytıp berdi. 17 Sońınan Rut:

– Ol maǵan: «Qáyin eneńniń aldına qurı qol barma», – dep mına altı ólshem arpanı berip jiberdi, – dedi.

18 Enesi oǵan:

– Qızım, usı istiń aqırı ne bolatuǵının bilgenińshe kútip tur. Sebebi ol adam bul isti búgin aqırına jetkermegenshe tınım tappaydı, – dedi.