Rut 4 | KaaIBT22L | STEP | Boaz qala dárwazasınıń janına barıp otırdı. Qarasa, ózi aytqan ámeńgeri qasınan ótip baratır eken. Boaz onı shaqırıp: – Tuwısqanım, berman kelip, mına jerge otır,

‏ Ruth 4

Boazdıń Rutqa úyleniwi

1 Boaz qala dárwazasınıń janına barıp otırdı. Qarasa, ózi aytqan ámeńgeri qasınan ótip baratır eken. Boaz onı shaqırıp:

– Tuwısqanım, berman kelip, mına jerge otır, – dedi. Sol adam kelip otırdı. 2 Sońınan Boaz qala aqsaqallarınan on adamdı jıynap alıp, olarǵa:

– Kelińler, sizler de usı jerde otırıńlar! – dedi. Olar kelip otırdı. 3 Sonda Boaz sol ámeńgerge bılay dedi:

– Moab elinen qaytıp kelgen Naǵıyma aǵayinimiz Elimelexke tiyisli jer úlesin satpaqshı. 4 Men saǵan mınanı málim etpekshimen: usı jerde otırǵanlar hám xalqımnıń aqsaqalları aldında sen sol jerdi satıp al. Eger sen ámeńgerlik wazıypasın orınlamaqshı bolsań, orınla. Eger de orınlawdı qálemeseń, onda maǵan ayt, men bileyin. Sebebi bul wazıypanı orınlaw birinshi gezekte seniń moynıńda. Al sennen keyingi náwbet meniki.

Sol adam:

– Men ámeńgerlik wazıypamdı orınlayman, – dedi.

5 Boaz oǵan:

– Eger sen Naǵıymadan jerdi satıp alatuǵın bolsań, onda marhumnıń múlkin óz atında qaldırıw ushın, onıń moablı jesir hayalı Ruttı da hayallıqqa alıwıń kerek, – dedi.

6 Sol ámeńgeri Boazǵa:

– Olay bolsa, men ámeńgerlik wazıypamdı orınlay almayman. Sebebi óz múlkimdi joǵaltıp alıwım múmkin. Jaqsısı, bul wazıypanı sen orınla, óytkeni men orınlay almayman, – dedi.

7 Áyyemgi Izrailda mınaday dástúr bar edi: eger birew ámeńgerlik wazıypasın orınlaytuǵın yamasa mal-múliklerin alıs-beris qılatuǵın bolsa, onda bunıń dálili sıpatında birewi ayaq kiyimin sheship, ekinshisine beretuǵın edi. Mine, bul Izrailda tastıyıqlanǵan gúwalıqtıń ornın basatuǵın edi.

8 Solay etip, sol ámeńger Boazǵa:

– Óziń satıp ala ber, – dedi de, ayaq kiyimin sheship, oǵan berdi.

9 Boaz aqsaqallarǵa hám barlıq xalıqqa qarap bılay dedi:

– Búgin sizler mınaǵan gúwasızlar: men Naǵıymadan marhum Elimelex, Kilyon hám de Maxlonnıń barlıq múlkin satıp alıp atırman. 10 Jáne de, men marhumnıń múlkin óz atında qaldırıw ushın, Maxlonnıń jesiri, moablı Ruttı hayallıqqa alaman. Marhumnıń tuwısqanları arasında hám ózi jasaǵan qalada atı óshpesin. Búgin sizler usıǵan gúwasızlar.

11 Dárwaza janında bolǵan pútkil xalıq hám aqsaqallar:

– Bizler gúwamız. Seniń úyińe kiretuǵın hayaldı Jaratqan Iye Izrail xalqınıń eki túpki anası Rahila hám Leaday qılǵay. Efratada ^{▼▼ Efrata – bul Beytlehemniń yamasa onıń dógerek átirapındaǵı jerdiń atı. 1:2 qarań.} baylıqlar iyesi bolǵaysań, Beytlehemde atıń ullı bolǵay. 12 Jaratqan Iyeniń usı jas hayaldan saǵan beretuǵın balaları arqalı seniń urpaǵıń Tamaranıń Yahudaǵa tuwıp bergen ulı Perestiń urpaǵınday kóp bolǵay, – dedi.

Dawıt patshanıń shejiresi

13 Solay etip, Boaz Ruttı hayallıqqa alıp, oǵan úylendi. Boaz Rut penen qosıldı hám Jaratqan Iye Ruttıń qursaǵına bala berip, ol ul tuwdı.

14 Hayallar Naǵıymaǵa: «Jaratqan Iyege alǵıslar bolsın! Ol búgin seni ǵamxorshısız qaldırmadı. Balanıń atı Izrailda dańq-ataqqa iye bolsın! 15 Ol seniń ómirińdi jańartadı, qartayǵanda baǵıwshıń boladı. Sebebi onı seni jaqsı kóretuǵın keliniń tuwıp berdi. Usı keliniń seniń ushın jeti uldan da artıǵıraq», – dedi.

16 Naǵıyma balanı qolına alıp, bawırına bastı hám ózi baǵıp tárbiyaladı. 17 Qońsı hayallar: «Naǵıyma ullı boldı», – dep, balaǵa at qoyıp, onı Obid dep atadı. Obid Ishaydıń ákesi, Ishay Dawıttıń ákesi boldı.

18 Perestiń shejiresi mınaday: Peresten Xesron tuwıldı, 19 Xesronnan Ram tuwıldı, Ramnan Amminadab tuwıldı, 20 Amminadabtan Naxshon tuwıldı, Naxshonnan Salmon tuwıldı, 21 Salmonnan Boaz tuwıldı, Boazdan Obid tuwıldı, 22 Obidten Ishay tuwıldı, Ishaydan Dawıt tuwıldı.