Song of Solomon 3
Qız:
1Tún boyı tósegimde jatıp,Qálbimniń ashıǵın ańsadım,
Ańsadım, biraq onı taba almadım.
2Endi turıp, qalanı aylanayın,
Kóshe hám maydanlar boylap,
Qálbimniń ashıǵın izleyin.
Onı izledim, biraq taba almadım.
3Qalanı aylanıp júrgen saqshılar,
Meni kórip qaldı. Olardan men:
«Meniń qálbimniń ashıǵın kórmedińiz be?» – dep soradım.
4Olardıń janınan ketiwim menen,
Qálbimniń ashıǵın taptım.
Onı qoltıqlap uslap,
Anamnıń úyine,
Maǵan hámiledar bolǵan bólmege,
Alıp kelgenimshe, jibermedim.
5Erusalim qızları!
Jeyran hám jabayı suwınlar haqı jalbarınaman:
Muhabbattıń ózi oyanbaǵansha,
Íshqını oyatpań hám qozǵamań.
Qurbı-qurdaslar: 6Sawdagerlerdiń barlıq xosh iyisli átirlerinen islengen,
Mirra hám xosh iyisli tútetkini ańqıtıp,
Buwdaqlaǵan tútindey kóterilip,
Shólden shıǵıp kiyatırǵan kim eken?
7Qarańlar, Sulaymannıń tasımalı taxtı!
Qasında alpıs batırı,
Izraildıń márt jawıngerleri bar.
8Hámmesi qılısh asınǵan,
Urıs tájiriybesine iye.
Túngi qáwipke qarsı,
Hár biriniń qılıshı belinde.
9Patsha Sulayman Lebanondaǵı kedr aǵashınan,
Ózine tasımalı taxt isletken.
10Onıń baqanların gúmisten,
Arqasın altınnan isletip,
Otırǵıshın shım qızıl tawar menen qaplatqan.
Ishin Erusalim qızları shın kewilden bezegen.
11Sion qızları, sırtqa shıǵıńlar!
Toyı kúni,
Júregi shadlıqqa tolǵan kúni,
Anası basına kiydirgen,
Tajına qarańlar!
Copyright information for
KaaIBT22L