‏ Song of Solomon 5

Jigit:

1Men baǵıma kirdim, ázizim, kelinshegim.
Mirra hám xosh iyisli zatlarımdı jıynayman.
Palımdı uyası menen jeymen,
Sharabımdı, sútimdi ishemen.
Qurbı-qurdaslar: Jeńler, doslar, ishińler!
Iship, lázzet alıń, háy, ashıqlar!
Qız: 2Uyıqlap jatsam da, kewlim sergek.
Tıńlap kór! Súyiklim esik qaǵıp tur:
«Esikti ash, ázizim, súyiklim,
Qumırım, minsiz sulıwım!
Hól bolǵan basım shıqtan,
Shashlarım túngi ızǵardan».
3Men sheshinip qoydım,
Qalay jáne kiyinemen?
Ayaqlarımdı juwıp qoydım,
Qalay jáne patas qılaman?
4Súyiklim esik tesiginen qolın suqqanda,
Júregim tolqınlanıp ketti.
5Turdım súyiklime qapı ashpaǵa,
Qollarımnan mirra tamdı,
Barmaqlarımnan aqtı mirra,
Esiktiń ildirgishine.
6Súyiklime esik ashtım,
Biraq ol ketip qalǵan eken.
Onıń ketip qalǵanına, júregim ezildi.
Onı izledim, taba almadım,
Shaqırdım, juwap bermedi.
7Qalanı aylanıp júrgen saqshılar,
Meni uslap alıp, urıp, jaraqatladı,
Sol diywal saqshıları,
Meniń jawlıǵımdı sheship tasladı.
8Erusalim qızları! Sizlerge jalbarınaman:
Eger súyiklimdi ushıratsańız,
Aytıńlar, ıshqıdan qástemen men.
Qurbı-qurdaslar: 9Súyiklińniń basqalardan nesi artıq,
Háy, gózzallar gózzalı?
Bizlerge jalbarınatuǵınday,
Súyiklińniń basqalardan nesi artıq?
Qız: 10Súyiklim meniń qızıl júzli, quwatlı,
On mıń adamnıń arasında ayırılıp turar.
11Bası sap altınnan,
Shashları buyra,
Ǵarǵaday qara.
12Kóziniń qarashıqları suw jaǵasında,
Sútke shomılıp, lázzetlenip otırǵan,
Qos qumırıǵa uqsaydı.
13Shekeleri átir taratıp turǵan,
Gúl baǵına uqsaydı.
Erinleri mirra tamıp turǵan,
Lala gúlge uqsaydı.
14Qolları sarı yaqıt taǵılǵan,
Altın hasaǵa uqsaydı.
Denesi lazurit tasları menen qaplanǵan,
Pil súyeginen islengen buyımǵa uqsaydı.
15Ayaqları altın túbekke ornatılǵan,
Mramor sútinge uqsaydı.
Túr-túsi Lebanon tawlarına uqsaydı,
Kedr aǵashlarınday sawlatlı.
16Tili shiyrin,
Qáddi-qáwmeti kelisken.
Usı meniń súyiklim, usı meniń dostım,
Háy, Erusalim qızları!