Tit 3 | KaaIBT22L | STEP | Basshılarǵa hám húkimetke boysınıp qulaq asıwdı, hár bir iygilikli isti islewge tayar bolıwdı,

‏ Titus 3

Iygilikli islerdi islewge tayar bolıw

1 Basshılarǵa hám húkimetke boysınıp qulaq asıwdı, hár bir iygilikli isti islewge tayar bolıwdı, 2 hesh kimdi ósek qılmay hám jánjelkesh bolmay, múláyim bolıp, hámme adamlarǵa hár tárepleme jumsaq qatnasta bolıwdı iseniwshilerge esletip qoy.

3 Sebebi bir waqıtları bizler de aqılsız, qulaq aspaytuǵın, adasqan, hár túrli jaman háwesler menen házliklerdiń qulı bolǵan, jamanlıq hám kúnshillik penen jasaǵan, basqalar bizlerdi hám bizler de bir-birimizdi jek kórgen adamlar edik. 4 Biraq Qutqarıwshımız Quday Óz miyrimin hám adamǵa degen súyispenshiligin ashıq kórsetkende, 5 Ol bizlerdi qılǵan haq islerimiz sebepli emes, al Óz miyrim-shápááti menen qutqardı. Bizlerdi Muxaddes Ruwxı arqalı gúnadan tazalap, qaytadan tuwıldırdı hám jańaladı. 6 – 7 Onıń miyrimi menen aqlanıp, ózlerimiz úmit etken máńgilik ómirdiń miyrasxorları bolıwımız ushın, Ol Muxaddes Ruwxın Qutqarıwshımız Iysa Masiyx arqalı mol-mol etip jawdırdı. 8 Bul sóz – haqıyqat.

Qudayǵa isengenlerdiń ózlerin jaqsı islerdi islewge arnawǵa tırısıwları ushın, aytqanlarımdı talap etiwińdi qáleymen. Bular adamlar ushın jaqsı hám paydalı.

9 Biraq, aqılsız tartıslar menen shejireler tuwralı sózlerden, Muxaddes Nızamǵa baylanıslı aytıs hám jánjellerden qash. Óytkeni bular paydasız hám biykar nárseler. 10 Alawızlıq tuwdıratuǵın adamǵa bir-eki eskertiw jasaǵannan soń, onıń menen baylanıstı úz. 11 Bunday adamnıń buzılǵanın hám óz-ózin húkim etip, gúna islep atırǵanın bileseń.

Sońǵı sálemnama hám tilekler

12 Artemdi yamasa Tixikti saǵan jibergenimde, dárhal Nikopoliske, meniń janıma keliwge bar kúshińdi sal. Sebebi qıstı sol jerde ótkiziwge qarar ettim. 13 Nızam xızmetkeri Zenas penen Apollostı jolǵa atlandırǵanıńda, olar hesh bir nársege mútáj bolmawı ushın ǵamxorlıq jasa. 14 Mútáj adamlarǵa járdem beriw ushın hám jemissiz ómir súrmew ushın, biziń adamlarımız da jaqsı islerdi islewge ózlerin baǵıshlawdı úyrensin.

15 Meniń janımdaǵılardıń hámmesi saǵan sálem aytıp atır. Birdey isenimde bolǵan bizlerdi súyetuǵınlarǵa sálem ayt. Qudaydıń miyrimi hámmeńizge yar bolsın!