‏ Zechariah 1

Iyeniń xalqın Ózine qaytarıw ushın shaqırıwı

1Dariydiń patshalıǵınıń ekinshi jılınıń segizinshi ayında, Iddonıń aqlıǵı, Berexiyanıń ulı payǵambar Zexariyaǵa Jaratqan Iyeden mına sózler tústi:

2– Men, Jaratqan Iye, ata-babalarıńızǵa qattı ǵázeplengen edim. 3Sonlıqtan xalıqqa ayt: «Álemniń Jaratqan Iyesi bılay deydi: Maǵan qaytıń, Men de sizlerge qaytaman. Bunı Álemniń Jaratqan Iyesi aytadı. 4Ata-babalarıńız sıyaqlı bolmań! Aldınǵı payǵambarlar Álemniń Jaratqan Iyesiniń atınan olardı eskertip: „Jaman jollarıńızdan hám jawız qılmıslarıńızdan qaytıń“, – degen edi. Degen menen, olar qulaq salmadı, Maǵan itibar da bermedi, – deydi Jaratqan Iye. 5– Qáne sol ata-babalarıńız? Payǵambarlar máńgi-baqıy jasay ma? 6Qullarım payǵambarlar arqalı buyırǵan sózlerim hám qaǵıydalarım ata-babalarıńızdıń basına túsken joq pa? Sonda olar táwbe qılıp: „Álemniń Jaratqan Iyesi bizlerdiń júrgen jollarımız benen islegen islerimizge jarasa neni niyetlegen bolsa, sonı isledi“, – dedi».

Birinshi ayan: Atlar hám atlılar

7Dariydiń patshalıǵınıń ekinshi jılında, on birinshi aydıń, yaǵnıy shebat ayınıń jigirma tórtinshi kúni Iddonıń aqlıǵı, Berexiyanıń ulı payǵambar Zexariyaǵa Jaratqan Iyeden ayan arqalı sóz tústi.

8Túnde men jırada mirta putaları arasında qızıl atqa mingen bir adamdı kórdim. Onıń artında qızıl, qońır hám aq atlar bar edi. 9Sonda meniń menen sóylesip baslaǵan perishteden:

– Mırzam, bular ne? – dep soradım.

Ol:

– Bulardıń ne ekenin saǵan kórsetemen, – dep juwap berdi.

10Sonda mirta putaları arasındaǵı adam da:

– Jaratqan Iye bulardı dúnyanı gezip shıqsın dep jiberdi, – dedi.

11Sonda atlılar mirta putaları arasındaǵı Jaratqan Iyeniń perishtesin maqullap:

– Dúnyanı gezip shıqtıq, pútkil dúnya tınıshlıq hám amanlıq ishinde! – dedi.

12Sonda Jaratqan Iyeniń perishtesi:

– Álemniń Jaratqan Iyesi, jetpis jıldan berli Erusalim hám Yahuda qalalarına ǵázeplenip keldiń. Endi qashanǵa deyin olarǵa Óz rehimińdi kórsetiwden bas tartasań? – dedi. 13Jaratqan Iye meniń menen sóylesip turǵan perishtege mehriban hám jubatıwshı sózler menen juwap berdi. 14Meniń menen sóylesip turǵan perishte maǵan mına xabardı járiyalawdı buyırdı:

«Álemniń Jaratqan Iyesi bılay deydi: Erusalim hám Siondı qattı qızǵanaman. 15Al biyǵam jasap atırǵan basqa milletlerge qattı ǵázeplendim. Óytkeni Men xalqıma azǵantay ashıwlanǵan waqtımda, olar xalqıma qarsı jawızlıq ústine jawızlıq islegen edi.

16Sonıń ushın, Jaratqan Iye bılay deydi: Men Erusalimge miyrim-shápáátimdi tógiw ushın qaytaman, – deydi Álemniń Jaratqan Iyesi. – Úyim ol jerde qayta qurıladı hám Erusalimge ólsheytuǵın jip tartıladı».

17Maǵan jáne mınanı da járiyalawdı buyırdı:

«Álemniń Jaratqan Iyesi bılay deydi: Meniń qalalarımda jáne molshılıq boladı. Men, Jaratqan Iye Siondı jáne jubataman, Erusalim jáne Meniń tańlaǵan qalam boladı».

Ekinshi ayan: Tórt múyiz hám tórt temirshi

18Keyin men názer taslaǵanımda, tórt múyizdi kórdim. 19Meniń menen sóylesken perishteden:

– Bular ne? – dep soradım.

Ol maǵan:

– Bular Yahuda, Izrail hám Erusalim xalqın tarqatıp jibergen múyizler, – dep juwap berdi.

20Sonnan soń, Jaratqan Iye maǵan tórt temirshini kórsetti. 21Men:

– Bular ne isleyin dep atır? – dep soradım.

Perishte:

– Mına múyizler Yahuda xalqın bas kótere almaytuǵınday etip tarqatıp jibergen edi. Bul temirshiler Yahuda xalqın tarqatıw ushın hújim qılǵan milletlerdi qorqıtıp, múyizlerin qulatıw ushın keldi, – dep juwap berdi.