Zec 11 | KaaIBT22L | STEP | Háy, Lebanon, dárwazalarıńdı ash, Ot kedr aǵashlarıńdı jaǵıp joq qılsın!

‏ Zechariah 11

Izraildıń dushpanlarınıń apatı

1 Háy, Lebanon, dárwazalarıńdı ash,
Ot kedr aǵashlarıńdı jaǵıp joq qılsın!
2 Háy, sárwi aǵashı, dad sal!
Kedr aǵashı quladı,
Ullı terekler joq boldı!
Háy, Bashandaǵı emen aǵashları, dad salıń,
Qalıń toǵaylar kesildi!
3 Qulaq sal, shopanlardıń shekken páriyadına,
Olardıń ájayıp jaylawları joq boldı!
Qulaq sal, arıslanlardıń aqırǵan dawısına,
Iordan boyındaǵı qalıń toǵay joq boldı!

Eki shopan

4 Qudayım Jaratqan Iye bılay dedi:

– Soyılıwǵa arnalǵan súriwge shopanlıq qıl. 5 Súriwdi satıp alǵanlar, olardı soysa da, ókinbey júripti. Qoylardı satqanlar bolsa: «Jaratqan Iyege alǵıslar bolsın, bayıp kettim!» – deydi. Shopanlar óz súriwlerine janı ashımaydı. 6 Men endi elde jasap atırǵan xalıqqa artıq rehim qılmayman, – deydi Jaratqan Iye. – Men olardıń hár birin óz qońsı xalqına hám patshasınıń qolına tapsıraman. Olar eldi ezedi, Men de xalıqtı olardıń qolınan qutqarmayman.

7 Solay etip, soyılıwǵa arnalǵan súriwge, olardıń ezilgenlerine shopanlıq qıldım. Qolıma eki tayaq aldım, birewin «Írzashılıq», ekinshisin «Birlik» dep atap, súriwdi baqtım. 8 Bir aydıń ishinde úsh shopandı quwıp jiberdim. Meniń súriwge bolǵan sabır-taqatım tawısıldı, olar da meni jek kórdi. 9 Sonda men súriwge:

– Artıq sizlerdi baqpayman. Óletuǵını ólsin, nabıt bolatuǵını nabıt bolsın, aman qalǵanları bir-biriniń etin jesin, – dedim.

10 Keyin «Írzashılıq» degen tayaǵımdı alıp, onı sındırdım. Usılay qılıp, Jaratqan Iyeniń barlıq xalıqlar menen dúzgen kelisimin buzǵanın kórsettim. 11 Solay etip, kelisim sol kúni buzıldı. Meni gúzetip turǵan súriwdiń ezilgenleri bul istiń Jaratqan Iyeniń jibergen xabarı ekenin túsindi.

12 Men olarǵa:

– Eger maqul dep tapsańız, meniń is haqımdı beriń, bolmasa bermey-aq qoyıń, – dedim. Sonda olar maǵan otız shekel ^{▼▼ Otız shekel – bir shekel shama menen 11 gr.} gúmisti is haqım ushın ólshep berdi.

13 Jaratqan Iye maǵan:

– Bunı gúlalshınıń aldına tasla, – dedi. Solay etip, ózleri joqarı dep bahalaǵan otız shekel gúmisti alıp, Jaratqan Iyeniń Úyindegi gúlalshınıń aldına tasladım.

14 Keyin «Birlik», dep atalǵan ekinshi tayaǵımdı sındırdım. Usılay etip, Yahuda menen Izrail arasındaǵı tuwısqanlıq birlikti buzdım.

15 Jaratqan Iye maǵan jáne bılay dedi:

– Bar, jáne bir márte shopanlıq qıl, nadan shopanday háreket et. 16 Elge sonday bir shopan jiberemen, ol nabıt bolıp atırǵanlarǵa qaramaydı, joytılǵanlardı izlemeydi, jaraqatlanǵanlarǵa shıpa bermeydi, sawların azıqlandırmaydı. Al semiz qoylardıń góshin jep, tuyaqların julıp taslaydı.

17 «Hásiret shegeseń, súriwdi tárk etetuǵın nadan shopan!
Qılısh kelsin qolıńa hám oń kózińe,
Pútkilley qurıp qalsın qolıń,
Pútkilley soqır bolsın oń kóziń!»