Zec 12 | KaaIBT22L | STEP | Payǵambarshılıq sóz. Bul Jaratqan Iyeniń Izrail haqqında aytqan sózleri: «Kóklerdi jayıp, jer júziniń negizin qurǵan hám insanǵa ómir demin bergen Jaratqan Iye bılay deydi:

‏ Zechariah 12

Erusalimniń jeńisi

1 Payǵambarshılıq sóz. Bul Jaratqan Iyeniń Izrail haqqında aytqan sózleri:

«Kóklerdi jayıp, jer júziniń negizin qurǵan hám insanǵa ómir demin bergen Jaratqan Iye bılay deydi: 2 Erusalimdi dógeregindegi xalıqlardı teńseldiretuǵın sharap kesesi qılaman. Erusalim sıyaqlı Yahuda da qamal ishinde qaladı. 3 Sol kúni Men Erusalimdi basqa xalıqlar ushın awır tastay qılaman, onı kóteriwge háreket etkenler ózlerin mayırıp qoyadı. Jer júzindegi barlıq xalıqlar Erusalimge qarsı birigedi. 4 Sol kúni, – deydi Jaratqan Iye, – hár bir attı qorqınıshtan sasqalaqlatıp, atqa mingenlerdi es-aqılınan ayıraman. Yahuda xalqına názerimdi salıp, basqa xalıqlardıń barlıq atların soqır qılıp taslayman. 5 Sonda Yahudanıń biyleri ishinen: „Qudayı bolǵan Álemniń Jaratqan Iyesine úmit baylaǵan Erusalim xalqı kúsh-qúdiret bulaǵımız“, – dep oylaydı.

6 Sol kúni Yahudanıń biylerin otınlardıń ortasında janıp turǵan bir shoq sıyaqlı, dán bawlarınıń arasında janıp turǵan bir shomday qılaman. Ol oń hám soldaǵı, dógerektegi barlıq xalıqlardı jandırıp joq qıladı. Erusalim bolsa, saw-salamat óz jerinde turadı.

7 Dawıt áwladınıń hám Erusalim turǵınlarınıń dańqı Yahudadan asıp ketpewi ushın, Jaratqan Iye bolǵan Men Yahuda ordasına aldı menen jeńis beremen. 8 Men, Jaratqan Iye sol kúni Erusalim turǵınların qorǵayman. Solay etip, arańızdaǵı eń hálsiz adam Dawıttay kúshli, Dawıt áwladı bolsa Quday sıyaqlı, ózlerine basshılıq etken Jaratqan Iyeniń perishtesindey boladı. 9 Sol kúni Erusalimge qarsı hújim qılǵan barlıq xalıqlardı joq etiwge kirisemen.

10 Dawıttıń áwladı menen Erusalim turǵınlarına miyrim hám duwa etiw ruwxın jiberemen. Olar Maǵan, yaǵnıy ózleri denesin teskenge qaraydı. Olar jalǵız ulı ushın aza tutqanday, azalaydı, tuńǵısh ulı ushın zar jılaǵanday, jılaydı. 11 Sol kúni Erusalimdegi aza Megiddo oypatlıǵındaǵı Hadad-Rimmonda bolǵan aza sıyaqlı júdá úlken boladı. 12 Pútkil el azalaydı. Hár bir áwlad óz aldına aza tutadı: Dawıt áwladı óz aldına, olardıń hayalları óz aldına, Natan áwladı óz aldına, olardıń hayalları óz aldına, 13 Lebiy áwladı óz aldına, olardıń hayalları óz aldına, Shimey áwladı óz aldına hám olardıń hayalları óz aldına aza tutadı. 14 Qalǵan barlıq áwladlar da óz aldına aza tutadı. Olardıń hayalları da óz aldına aza tutadı».