Zec 13 | KaaIBT22L | STEP | «Sol kúni Dawıt áwladın hám Erusalim turǵınların gúnadan hám haramılıqtan tazalaw ushın aǵıp turǵan bir bulaq boladı.

‏ Zechariah 13

Gúnadan tazalanıw

1 «Sol kúni Dawıt áwladın hám Erusalim turǵınların gúnadan hám haramılıqtan tazalaw ushın aǵıp turǵan bir bulaq boladı. 2 Sol kúni elden butlardıń atların óshiremen, artıq olar eske alınbaydı, – deydi Álemniń Jaratqan Iyesi, – jalǵan payǵambarlardı da, napák ruwxtı da joq qılaman. 3 Eger jáne birew payǵambarshılıq qılatuǵın bolsa, onıń óz tuwǵan ata-anası: „Sen óleseń, sebebi Jaratqan Iyeniń atı menen jalǵan sóylep tursań“, – deydi. Al ol payǵambarshılıq etken jaǵdayda, onıń óz ata-anası onıń denesin túyrep, óltiredi.

4 Sol kúni hár bir jalǵan payǵambar ayan kórip, payǵambarshılıq etiwge uyalatuǵın boladı. Payǵambardıń júnli kiyimin kiymeydi hám adamlardı qaytıp aldamaydı. 5 Onıń ornına ol: „Men payǵambar emespen, diyxanman. Jaslıǵımnan berli bir adamnıń qolında atızǵa qarayman“, – deydi. 6 Birew onnan: „Deneńdegi jaralar qay jerden payda boldı?“– dep soraǵanda, ol: „Bular doslarımnıń úyinde arttırǵan jaralar“, – dep juwap beredi».

Shopannıń óltiriliwi, súriwdiń tarqap ketiwi

7 «Oyan, háy qılısh!
Meniń shopanıma, Meniń jaqınıma qarsı shıq,
– deydi Álemniń Jaratqan Iyesi, –
Shopandı shawıp tasla,
Qoylar tarqalıp ketsin.
Men qozılarǵa qarsı qol kóteremen.
8 Pútkil elde xalıqtıń úshten ekisi qırılıp, joq boladı,
– deydi Álemniń Jaratqan Iyesi, –
Úshten biri aman qaladı.
9 Aman qalǵan úshten birin ottan ótkeremen,
Olardı gúmistey eritip, tazalayman,
Altındı sınaǵanday, sınayman.
Olar Meniń atımdı aytıp shaqıradı,
Men de olarǵa juwap beremen,
„Bular Meniń xalqım“, – deymen,
Olar da Meni: „Jaratqan Iye – bizlerdiń Qudayımız“, – deydi».