Zec 14 | KaaIBT22L | STEP | Mine, Jaratqan Iyeniń húkim kúni kiyatır! Háy, Erusalim xalqı, kóz aldıńızda mal-múlkińiz talan-taraj boladı.

‏ Zechariah 14

Sawash hám jeńis

1 Mine, Jaratqan Iyeniń húkim kúni kiyatır! Háy, Erusalim xalqı, kóz aldıńızda mal-múlkińiz talan-taraj boladı.

2 Erusalimge qarsı sawash ashıwı ushın barlıq xalıqlardı bir jerge toplayman. Qala basıp alınıp, jawlar úylerdi tonaydı, hayallardıń namısın ayaq astı qıladı. Qalada jasaytuǵınlardıń jartısı súrginge áketiledi, qalǵanları bolsa, qalada qaldırıladı.

3 Keyin Jaratqan Iye burın sawash waqtında islegenindey, sol xalıqlarǵa qarsı urısadı. 4 Sol kúni Onıń ayaqları Erusalim qalasınıń shıǵısındaǵı Záytún tawınıń ústinde turadı. Záytún tawı ekige bólinedi. Tawdıń ortasında shıǵıstan batısqa qarap ketken keń bir oypatlıq payda boladı. Sonda tawdıń bir tárepi arqaǵa, ekinshi tárepi bolsa, qublaǵa jılısadı. 5 Sizler bólingen tawdıń ortasındaǵı oypatlıq arqalı qashasız. Bul oypatlıq Aselge deyin sozıladı. Yahuda patshası Uzziya dáwirinde bolǵan jer silkiniw waqtında qalay qashqan bolsańız, solay qashasız. Sonda Qudayım Jaratqan Iye barlıq perishteler menen birge keledi!

6 Sol kúni nur bolmaydı, nur taratıp turatuǵın aspan deneleri qarańǵılasadı. 7 Kún dawam ete beredi, sonda kúndiz benen túnniń ayırmashılıǵı bolmaydı. Keshte de jaqtı bolıp turadı. Bul qashan júz beretuǵının tek ǵana Jaratqan Iye biledi.

8 Sol kúni Erusalimnen aǵın suw aǵıp shıǵadı, onıń yarımı shıǵıstaǵı teńizge, qalǵan yarımı batıstaǵı teńizge quyıladı. Suw jazda da, qısta da aǵıp turadı.

9 Jaratqan Iye pútkil dúnyanıń patshası boladı. Sol kúni Jaratqan Iye jalǵız Quday bolıp, tek ǵana Onıń atı ullılanadı.

10 Pútkil el Gebadan Erusalimniń qublasındaǵı Rimmonǵa deyin Iordan tegisligindey bolıp qaladı. Al Erusalim bolsa joqarıda bolıp, Benyamin dárwazasınan Birinshi dárwazaǵa hám, Múyesh dárwazasına deyin, Xananel minarasınan patshanıń júzim iskenjesine deyin óz ornında qaladı. 11 Adamlar sol jerge ornalasıp, tınıshlıq ishinde jasaydı. Erusalim endi qaytıp joq qılınıwǵa tapsırılmaydı.

12 Erusalimge qarsı urıs ashqan barlıq xalıqlarǵa Jaratqan Iye mına awır kesellikti jiberip, jazalaydı: ele ayaǵında turǵan waqtında-aq deneleri irip, kózleri uyasında, tilleri awzınıń ishinde shirip ketedi. 13 Sol kúni Jaratqan Iye adamlardı úlken albırawshılıqqa túsiredi. Hámme janındaǵı adamnıń qolınan uslap, bir-birine qol kóteredi. 14 Yahuda xalqı da Erusalimde urısadı. Dógerektegi barlıq xalıqlardıń baylıǵı, kóp muǵdarda altını, gúmis hám kiyimleri olja etip alınadı. 15 Dushpan ordasınıń atları, ǵashırları, túyeleri, eshekleri hám barlıq haywanları sol awır kesellikke shatıladı.

16 Erusalimge qarsı sawash ashqanlardan aman qalǵanları bolsa, hár jılı Álemniń Jaratqan Iyesi bolǵan Patshaǵa tájim qılıw ushın hám Qos bayramın nıshanlaw ushın Erusalimge keledi. 17 Eger jer júzindegi xalıqlardıń birewi Álemniń Jaratqan Iyesi bolǵan Patshaǵa tájim qılıw ushın Erusalimge kelmese, olardıń elinde jawın jawmaydı. 18 Eger Mısır xalqı bayramǵa keliwden bas tartsa, Jaratqan Iye Qos bayramına keliwden bas tartqan basqa xalıqlardıń basına salǵan awır kesellikti olardıń basına da saladı. 19 Qos bayramın nıshanlawǵa shıqpaǵan Mısır xalqınıń hám basqa barlıq xalıqlardıń jazası usı boladı.

20 Sol kúni atlardıń qońırawlarında «Jaratqan Iyege baǵıshlanǵan», dep jazıladı. Jaratqan Iyeniń Úyindegi qazanlar qurbanlıq orınnıń aldında qollanılatuǵın tabaqlar sıyaqlı muxaddes boladı. 21 Erusalim hám Yahudadaǵı hár bir qazan Álemniń Jaratqan Iyesine baǵıshlanadı. Sonda qurbanlıq shalıwǵa kelgenler sol qazanlardı qurbanlıqtıń góshin pisiriw ushın qollanıwına boladı. Sol kúnnen baslap, Álemniń Jaratqan Iyesiniń Úyinde sawdagerler bolmaydı.