Zec 2 | KaaIBT22L | STEP | Keyin men jáne názer tasladım hám qolında ólsheytuǵın jibi bar bir adamdı kórdim.

‏ Zechariah 2

Úshinshi ayan: Ólshew jibi

1 Keyin men jáne názer tasladım hám qolında ólsheytuǵın jibi bar bir adamdı kórdim. 2 Men onnan:

– Qayaqqa baratırsız? – dep soradım.

Ol maǵan:

– Erusalimdi ólshewge, eni hám uzınlıǵı qansha shıǵatuǵının kóriwge baratırman, – dep juwap berdi.

3 Keyin, meniń menen sóylesip atırǵan perishte ketip baratır edi, basqa bir perishte aldınan shıǵıp, 4 oǵan bılay dedi:

– Tez barıp, sol adamǵa ayt: «Erusalimde adam hám mallar sonshelli kóp bolǵanlıqtan, diywallarınıń ishine sıymay qaladı. 5 Meniń Ózim onıń dógeregindegi otlı diywalı, ishindegi saltanatı bolaman, – deydi Jaratqan Iye».

Súrgindegilerdiń óz eline shaqırılıwı

6 «Qánekey, arqa táreptegi elden qashıńlar, – deydi Jaratqan Iye. – Sebebi sizlerdi jerdiń tórt tárepine tarqatıp jiberdim, – deydi Jaratqan Iye. 7 – Babiloniyada jasap atırǵan Sion xalqı, qashıp qutılıńlar». 8 Álemniń Jaratqan Iyesi Óz dańqı ushın meni sizlerdi tonaǵan xalıqlarǵa jiberdi. Ol bılay deydi: «Sizlerge tiygen Meniń kózimniń qarashıǵına tiygen boladı. 9 Men olarǵa qarsı qolımdı kóteremen. Ózlerine qul etken xalıqlar olardı tonaydı». Sonda sizler meni Álemniń Jaratqan Iyesi jibergenin bilip alasızlar.

10 «Háy, qız Sion, quwan hám shadlanıp baqır! Mine, Men sizlerdiń arańızda jasaw ushın kelemen, – deydi Jaratqan Iye. 11 – Sol kúni kóp milletler Jaratqan Iyege, yaǵnıy Maǵan qosılıp, Meniń xalqım boladı. Shınında, Men sizlerdiń arańızda jasayman». Sol waqıtta meni Álemniń Jaratqan Iyesi sizlerge jibergenin bilesiz. 12 Yahuda muxaddes jerdegi Jaratqan Iyeniń múlki boladı, Erusalimdi jáne tańlap aladı.

13 Háy, pútkil adamzat, Jaratqan Iyeniń aldında únsizlik saqlań! Ol Óziniń muxaddes mákanınan shıǵıp kiyatır!