Zec 3 | KaaIBT22L | STEP | Keyin bas ruwxaniy Eshuanıń Jaratqan Iyeniń perishtesiniń aldında turǵanın hám onıń oń jaǵında onı ayıplaw ushın shaytannıń turǵanın kórdim.

‏ Zechariah 3

Tórtinshi ayan: Bas ruwxaniy

1 Keyin bas ruwxaniy Eshuanıń Jaratqan Iyeniń perishtesiniń aldında turǵanın hám onıń oń jaǵında onı ayıplaw ushın shaytannıń turǵanın kórdim. 2 Jaratqan Iye shaytandı keyip:

– Men saǵan tıyım salaman, háy, shaytan! Erusalimdi tańlaǵan Men saǵan tıyım salaman! Bul adam ot ishinen suwırıp alınǵan shala janǵan otın bólegi emes pe? – dedi.

3 Perishteniń aldında Eshua patas kiyim kiyip turǵan edi. 4 Perishte sol jerde turǵanlarǵa:

– Ústindegi patas kiyimlerin sheshiń, – dedi. Keyin Eshuaǵa:

– Tıńla, seniń ayıplarıńdı alıp tasladım. Saǵan taza, saltanatlı kiyim kiydiremen, – dedi.

5 Sonda men:

– Onıń basına taza sálle kiydirilsin, – dedim. Olar onıń basına taza sálle, ústine kiyim kiydirdi. Jaratqan Iyeniń perishtesi de onıń qasında turǵan edi.

6 Keyin Jaratqan Iyeniń perishtesi Eshuaǵa eskertip bılay dedi:

7 – Álemniń Jaratqan Iyesi bılay deydi: «Eger sen Meniń jollarım menen júrip, talaplarımdı orınlasań, Meniń Úyimde basshılıq qılıp, háwlimdi basqarasań. Saǵan usı jerde turǵanlar menen birge dárgayıma kirip-shıǵıw huqıqın beremen. 8 Tıńla, bas ruwxaniy Eshua, sen hám janıńda otırǵan ruwxaniy tuwısqanlarıń menen birge hámmeńiz keleshekte júz beretuǵın waqıyalardıń nıshanısız. Men Shaqa degen xızmetkerimdi alıp kelemen. 9 Mine, Eshuanıń aldına bir tas qoydım. Sol tasqa jeti kóz qarap turıptı. Men tastıń ústine oyıp jazıw jazaman, – deydi Álemniń Jaratqan Iyesi. – Bir kún ishinde mına eldiń gúnasın alıp taslayman. 10 Sol kúni, – deydi Álemniń Jaratqan Iyesi, – sizler qońsı-qobalarıńızdı óz júzim aǵashlarıńızdıń hám ánjir aǵashlarıńızdıń astında otırıwǵa mirát etesiz».