Zec 4 | KaaIBT22L | STEP | Meniń menen sóylesken perishte qaytıp kelip, uyqıdan oyatqanday etip meni oyattı.

‏ Zechariah 4

Besinshi ayan: Altın shıra qoyǵısh hám záytún aǵashları

1 Meniń menen sóylesken perishte qaytıp kelip, uyqıdan oyatqanday etip meni oyattı. 2 Ol mennen:

– Neni kórip tursań? – dep soradı.

Men bılay dep juwap berdim:

– Hámme jeri altınnan soǵılǵan shıra qoyǵıshtı kórip turıppan, onıń joqarısında záytún mayına arnalǵan bir tostaǵan turıptı. Shıra qoyǵıshtıń jeti shırası hám olardıń jeti tútikshesi bar. 3 Sonday-aq, shıra qoyǵıshtıń qasında eki záytún aǵashı bar. Birewi tostaǵannıń oń tárepinde, ekinshisi sol tárepinde turıptı.

4 Men ózim menen sóylesip atırǵan perishteden:

– Bulardıń mánisi ne, mırzam? – dep soradım.

5 Ol:

– Bulardıń mánisin bilmeyseń be? – dedi.

Men:

– Yaq, mırzam, – dep juwap berdim.

6 Sonıń ushın, ol maǵan mınalardı aytıp berdi:

– Jaratqan Iye Zerubbabel ^{▼▼ Zerubbabel – Yahuda hákimi. Ezr 5:1-2.} ushın mına sózlerdi ayttı: «Kúsh hám qúdiret penen emes, al Meniń Ruwxım menen tabısqa eriseseń. Bul Álemniń Jaratqan Iyesiniń sózi. 7 Sen ne bolıpsań, háy, bálent taw? Zerubbabeldiń aldında sen bir tegislik bolıp qalasań! Ol Ibadatxananıń aqırǵı tasın ornatqanda, xalıq: „Qanday gózzal, qanday gózzal!“– dep baqırısadı».

8 Jaratqan Iyeden maǵan jáne tómendegi sóz tústi: 9 «Úyimniń tiykarǵı tası Zerubbabeldiń qolları menen qoyıldı, qurılıstı da onıń qolları aqırına jetkeredi. Sol waqıtta, Álemniń Jaratqan Iyesi bolǵan Meniń seni jibergenimdi bileseń. 10 Qurılıstıń kishkene isi baslanǵan kúndi kim mensinbeydi? Adamlar Zerubbabeldiń qolındaǵı jazıwı bar qalayı taxtanı kórgende, shadlanadı».

Sonda perishte maǵan bılay dedi:

– Mına jeti shıra pútkil jer júzine qarap turatuǵın Jaratqan Iyeniń kózleri.

11 Men perishteden mınanı soradım:

– Shıra qoyǵıshtıń oń hám shep tárepindegi bul eki záytún aǵashlarınıń mánisi ne? 12 Altınday may aǵıp turǵan eki altın tútiksheniń qasındaǵı bul eki nál neni ańlatadı?

13 Ol mennen:

– Bulardıń mánisin bilmeyseń be? – dep soradı.

Men:

– Yaq, mırzam, – dep juwap berdim.

14 Perishte:

– Bular pútkil dúnyanıń Iyesine xızmet etiwshi hám záytún mayı menen maylanǵan eki adam ^{▼▼ Maylanǵan eki adam – bas ruwxaniy Eshua hám Yahuda hákimi Zerubbabel.} boladı, – dedi.