Zec 5 | KaaIBT22L | STEP | Men jáne názer taslaǵanımda, ushıp baratırǵan orama kitaptı kórdim.

‏ Zechariah 5

Altınshı ayan: Ushıp baratırǵan orama kitap

1 Men jáne názer taslaǵanımda, ushıp baratırǵan orama kitaptı kórdim. 2 Perishte mennen:

– Neni kórip tursań? – dep soradı.

Men:

– Ushıp baratırǵan orama kitaptı kórip turıppan, onıń uzınlıǵı jigirma shıǵanaq, eni on shıǵanaq, – dep juwap berdim.

3 Sonda perishte maǵan túsindirip, bılay dedi:

– Bul kitapqa pútkil jer júzine keletuǵın nálet jazılǵan. Urlıq qılǵanlar orama kitaptıń bir tárepindegi jazıw boyınsha, jalǵan ant ishkenler ekinshi tárepindegi jazıw boyınsha elden joq qılınadı. 4 Álemniń Jaratqan Iyesi: «Nálet jawdıraman. Urınıń úyine hám Meniń atım menen jalǵan ant ishetuǵınlardıń úyine nálet jawadı. Nálet sol úyde bolıp, jaydıń aǵashları menen tasların pútkilley joq qıladı», – deydi.

Jetinshi ayan: Ídıs ishindegi hayal

5 Meniń menen sóylesken perishte kelip, maǵan bılay dedi:

– Názer tasla, kiyatırǵan nárseni kór.

6 Men:

– Bul ne? – dep soradım.

Perishte:

– Kiyatırǵan nárse ólshem ıdısı. Bul – eldegi pútkil xalıqtıń gúnası, – dedi.

7 Qorǵasınnan soǵılǵan qaqpaǵı ashıldı, ıdıstıń ishinde bolsa, bir hayal otırǵan eken.

8 Perishte:

– Bul hayal – jawızlıq, – dep, hayaldı ıdıstıń ishine iyterip jiberdi de, awır qaqpaǵın jawıp tasladı.

9 Men jáne názer taslap, eki hayaldıń ushıp kiyatırǵanın kórdim. Olar láylektiń qanatlarına uqsaǵan qanatların samalda jayǵan edi. Olar kelip, sol ıdıstı aldı da, aspanǵa kóterip alıp ketti. 10 Men ózim menen sóylesip atırǵan perishteden:

– Ídıstı qayaqqa alıp baratır? – dep soradım.

11 Ol maǵan:

– Onı Shınar ^{▼▼ Shınar – bul eski Babiloniyanıń atı. Jar 11:2 qarań.} eline alıp baratır. Ol jerde oǵan sıyınatuǵın úy qurıp beredi, úy tayın bolǵanda, ıdıstı sol jerde bir túbeldirikke qoyadı, – dep juwap berdi.