Zechariah 7
Orazadan góre ádillik hám súyispenshilik abzal
1Dariydiń patshalıǵınıń tórtinshi jılınıń toǵızınshı ayı bolǵan kislew ayınıń tórtinshi kúni Jaratqan Iyeden Zexariyaǵa sóz tústi. 2Beyt-Eldiń turǵınları Sareserdi, Regem-Melexti hám onıń adamların Jaratqan Iyeden miyrimin soraw ushın, Erusalimge jiberip, bılay degen edi: 3«Barıp, Álemniń Jaratqan Iyesiniń Úyindegi ruwxaniyler hám payǵambarlardan: „Bizler kóp jıllardan berli besinshi ayda Ibadatxananıń wayran qılınǵanın eske túsirip, qayǵırıp, oraza tutıp kiyatırmız. Usınday qılıwdı dawam ete bereyik pe?“– dep sorańlar». 4Sonda maǵan Álemniń Jaratqan Iyesinen sóz tústi: 5– Eldiń barlıq xalqına hám ruwxaniylerine ayt: «Jetpis jıl dawamında sizler besinshi hám jetinshi aylarda oraza tutıp, qayǵırdıńız. Biraq shınında da usını Men ushın islegen be edińiz? 6Iship-jegenińiz sıyaqlı, óz paydańız ushın oraza tutpadıńız ba? 7Erusalim hám onıń átirapındaǵı awıllar gúllep jaynaǵanda, Negeb hám batıstaǵı taw etekleri adamlarǵa tolı waqıtta, Jaratqan Iye bolǵan Men bir neshe jıl aldın payǵambarlar arqalı usı sózlerimdi aytqan joqpan ba?» 8Jaratqan Iyeden Zexariyaǵa jáne sóz tústi: 9«Álemniń Jaratqan Iyesi bolǵan Men bılay degen edim: „Ádil húkim shıǵarıńlar. Bir-birińizge miyirman hám rehimli bolıńlar. 10Jetim-jesirlerge, kelgindilerge hám kámbaǵallarǵa zulımlıq qılmańlar. Bir-birińizge jawızlıq qılıwdı oylamańlar“. 11Biraq xalqım qulaq salıwdan bas tarttı. Ójetlik etip, esitpew ushın qulaqların jawıp aldı. 12Álemniń Jaratqan Iyesi bolǵan Men Ruwxım menen aldınǵı payǵambarlar arqalı sóyledim. Biraq xalqım júreklerin tas qılıp, nızam hám sózlerime qulaq salmadı. Sonıń ushın, Men olarǵa qattı ǵázeplendim. 13Men shaqırǵanda, olar qulaq salmadı, olar shaqırǵanda, Men de olarǵa qulaq salmayman, – deydi Álemniń Jaratqan Iyesi. 14– Men olardı ózleri tanımaytuǵın xalıqlardıń arasına shashıp tasladım. Olardıń eli adamsız qaldı, ol jerge hesh kim kirip-shıqpaytuǵın boldı. Ájayıp el qula dúzge aylandı».
Copyright information for
KaaIBT22L