‏ Zechariah 8

Jaratqan Iyeniń Erusalimdi qayta qurıwǵa wáde etiwi

1Álemniń Jaratqan Iyesinen maǵan jáne sóz tústi:

2«Álemniń Jaratqan Iyesi bılay deydi: Men Siondı qattı qızǵanaman. Oǵan bolǵan qızǵanıshım ishimdi jandıradı.

3Jaratqan Iye bılay deydi: Sionǵa qaytıp kelemen, Erusalim Meniń mákanım boladı. Sonda Erusalim „Sadıq qala“, Álemniń Jaratqan Iyesiniń tawı „Muxaddes taw“dep ataladı.

4Álemniń Jaratqan Iyesi bılay deydi: Qollarına hasa uslaǵan kempir-ǵarrılar jáne Erusalim maydanlarında otıradı. 5Qalanıń kósheleri oynap júrgen bala hám qızlarǵa toladı.

6Álemniń Jaratqan Iyesi bılay deydi: Aman qalǵan xalqımnıń kózine usı kúnler múmkin emes bolıp kóringeni menen, Meniń kózime onday bolıp kórinbeydi, – deydi Álemniń Jaratqan Iyesi.

7Álemniń Jaratqan Iyesi bılay deydi: Xalqımdı kúnshıǵıs hám batıstaǵı ellerden qutqarıp alaman. 8Erusalimde jasawı ushın olardı qaytarıp alıp kelemen. Olar Meniń xalqım, Men olardıń sadıq hám ádil Qudayı bolaman.

9Álemniń Jaratqan Iyesi bılay deydi: Kúshli bolıńlar! Meniń Úyim qayta qurılıwı ushın tiykarı salınǵan kúnleri payǵambarlardıń aytqan sózlerin esitip atırsız. 10Sol waqıtqa deyin miyneti ushın adamlarǵa is haqı, haywanlarǵa jem berilmeytuǵın edi. Dushpanlar sebepli hesh kim tınıshlıq ishinde kirip shıǵa almaytuǵın edi. Men hámmeni bir-birine qarsı qoyǵan edim. 11Biraq xalqımnıń aman qalǵanlarına burınǵıday islemeymen, – deydi Álemniń Jaratqan Iyesi. 12– Endi tuqım tınıshlıq ishinde sebilip, júzimzar óz miywesin beredi, topıraq ónimli bolıp, aspan óz shıǵın túsirip turadı. Bulardıń barlıǵın aman qalǵan xalıqtıń iyeligine beremen. 13Háy, Yahuda hám Izrail xalqı, Men sizlerdi qutqaraman! Milletler atıńızdı ǵarǵısta qollanatuǵın edi, endi onı pátiya bergende qollanatuǵın boladı. Qorqpańlar, kúshli bolıńlar!

14Álemniń Jaratqan Iyesi bılay deydi: Ata-babalarıńız ǵázebime tiygende, sizlerge apat jiberiwdi sheshtim hám ayamadım, – bunı Álemniń Jaratqan Iyesi aytadı. 15– Endi bolsa, Erusalimge hám Yahuda xalqına jáne jaqsılıq qılıwdı sheshtim. Qorqpańlar! 16Sizler islewińiz kerek bolǵan nárseler mınalar: bir-birińizge haqıyqattı sóyleńler. Húkim shıǵarǵanıńızda, ádalatlıqtı hám ádillikti saqlań. 17Júregińizde bir-birińizge qarsı jawızlıq jobalastırmań, jalǵannan ant ishpeń. Sebebi Men bulardıń barlıǵınan jerkenemen, – deydi Jaratqan Iye».

18Álemniń Jaratqan Iyesinen maǵan jáne tómendegi sóz tústi:

19«Álemniń Jaratqan Iyesi bılay deydi: Tórtinshi, besinshi, jetinshi hám onınshı aylardaǵı oraza Yahuda xalqı ushın quwanıshlı hám shadlıqqa tolı baxıtlı bayramlarǵa aylanadı. Sonlıqtan ádalatlıqtı hám tınıshlıqtı súyiń.

20Álemniń Jaratqan Iyesi bılay deydi: Ele xalıqlar hám kóp qalalarda jasaytuǵın adamlar Erusalimge keledi. 21Bir qalanıń turǵınları basqa qalaǵa barıp: „Álemniń Jaratqan Iyesinen rehim sorap, Onıń júzin izlew ushın barayıq. Men de sizler menen baraman“, – deydi. 22Álemniń Jaratqan Iyesi bolǵan Meni izlep, Mennen rehim soraw ushın kóp milletler hám kúshli xalıqlar Erusalimge keledi.

23Álemniń Jaratqan Iyesi bılay deydi: Sol kúnlerde hár túrli tilde sóyleytuǵın milletlerden on adam bir yahudiydiń etegine asılıp: „Ruxsat ber, seniń menen birge barayıq. Sebebi Qudaydıń seniń menen birge ekenin esittik“, – dep aytadı».