2Sa 11:1-12:25 | KaaIBT22L | STEP | Kelesi jılı báhárde, patshalar urısqa shıǵatuǵın waqıtta, Dawıt óz áskerbasıların hám pútkil Izrail áskerlerin Ioabtıń basshılıǵında urısqa jiberdi. Olar ammonlardı qırıp taslap, Rabba qalasın qamal qıldı. Biraq Dawıttıń ózi Erusalimde qalǵan edi.

‏ 2 Samuel 11

Dawıt hám Bat-Sheba

1 Kelesi jılı báhárde, patshalar urısqa shıǵatuǵın waqıtta, Dawıt óz áskerbasıların hám pútkil Izrail áskerlerin Ioabtıń basshılıǵında urısqa jiberdi. Olar ammonlardı qırıp taslap, Rabba qalasın qamal qıldı. Biraq Dawıttıń ózi Erusalimde qalǵan edi.

2 Bir kúni keshke qaray Dawıt tóseginen turdı da, saraydıń úshegine shıǵıp, arman-berman júre basladı. Ol sol jerden qarap, shomılıp atırǵan bir hayaldı kórdi. Hayal júdá sulıw edi. 3 Dawıt hayaldıń kim ekenin bilip keliw ushın, adam jiberdi.

Sol adam qaytıp kelip, hayaldıń Eliamnıń qızı, xet xalqınan bolǵan Uriyanıń hayalı Bat-Sheba ekenligin ayttı. 4 Dawıt hayaldı alıp keliw ushın xızmetshilerin jiberdi. Hayal Dawıttıń aldına keldi. Dawıt etek kirinen endi tazalanǵan hayal menen jattı. Sońınan hayal úyine qayttı. 5 Hayal hámiledar bolıp qalǵan edi. Sonlıqtan ol Dawıtqa: «Men hámiledarman», – dep xabar jiberdi.

6 Sonda Dawıt Ioabqa: «Xet xalqınan bolǵan Uriyanı maǵan jiber», – degen xabar jolladı. Ioab Uriyanı Dawıttıń aldına jiberdi. 7 Uriya aldına kelgende, Dawıt onnan Ioab penen áskerlerdiń jaǵdayı hám urıstıń barısı haqqında soradı. 8 Sońınan Uriyaǵa:

– Úyińe barıp, dem al, – dedi.

Uriya saraydan shıqqannan soń, patsha onıń izinen sıy jiberdi. 9 Degen menen, Uriya úyine qaytpay, patshanıń barlıq xızmetshileri menen birge saray dárwazası aldında uyıqladı. 10 Dawıtqa Uriyanıń úyine qaytpaǵanı haqqında xabar jetkende, Dawıt Uriyanı shaqırtıp:

– Sen uzaq waqıt sırtta boldıń-ǵo, nege úyińe qaytpadıń? – dep soradı.

11 Uriya Dawıtqa:

– Qudaydıń sandıǵı da, Izrail hám Yahuda áskerleri de ordada qaldı. Sárkárdam Ioab penen siziń adamlarıńız bolsa, qır dalada túnep atır. Solay eken, iship-jep, hayalım menen jatıw ushın, men úyime bara alaman ba? Aldıńızda ant iship aytaman: men hasla bulay islemeymen, – dep juwap berdi.

12 Sonda Dawıt Uriyaǵa:

– Búgin de usı jerde qal, erteń seni qaytarıp jiberemen, – dedi.

Uriya sol kúni Erusalimde qaldı. Erteńine 13 Dawıt Uriyanı shaqırıp alıp, ishkizip-jegizdi hám onı más qıldı. Biraq keshte Uriya jáne úyine barmay, patshanıń xızmetshileri menen birge uyıqlaw ushın burınǵı jatqan ornına bardı.

14 Sonlıqtan kelesi kúni azanda Dawıt Ioabqa bir xat jazıp, onı Uriyanıń qolına berip jiberdi. 15 Ol xatta bılay dep jazǵan edi: «Uriyanıń jaradar bolıp óliwi ushın, onı sawashtıń eń qızǵan jerine qoyıp, bir ózin qaldır».

16 Solay etip, Ioab qalanı qorshap alǵanda, dushpanlardıń márt áskerleriniń qay jerde turatuǵının bilgenlikten, Uriyanı sol jerge qoydı. 17 Qala xalqı shıǵıp, Ioabtıń áskerleri menen sawashqa tústi. Sawashta Dawıttıń áskerlerinen ayırımları qaza taptı. Qazalanǵanlar arasında xet xalqınan bolǵan Uriya da bar edi.

18 Sawashtıń barısı haqqında xabarlaw ushın, Ioab Dawıtqa adam jiberdi. 19 Ol xabarshıǵa bılay dep buyırdı:

– Sen sawashtıń barısı haqqında patshaǵa jetkergenińde, 20 patsha ǵázeplenip, saǵan: «Olar menen urısıw ushın qalaǵa nege bunshelli jaqınlastıńız? Olardıń qala diywalınan oq atatuǵının bilmeytuǵın ba edińiz? 21 Erubbeshettiń ^{▼▼ Erubbeshet – Erubbaal yaǵnıy Gideonnıń basqa atı. Biy 6:32; 7:1 qarań.} ulı Abimelexti qalay óltirgenin bilmeytuǵın ba edińiz? Tebeste bir hayal diywaldan Abimelextiń ústine digirman tasın taslap jiberip, onı óltirgeni esińizde joq pa edi? Solay eken, nege diywalǵa bunshelli jaqın bardıńlar?» – degende, sen oǵan: «Xet xalqınan bolǵan qulıńız Uriya da óldi», – dep aytarsań.

22 Xabarshı jolǵa shıqtı. Ol Dawıtqa barǵanda, Ioabtıń ózine aytqanlarınıń hámmesin oǵan jetkizip bılay dedi:

23 – Dushpan bizlerden ústin shıqtı. Olar qaladan shıǵıp, bizler menen qır dalada urıstı. Biraq bizler olardı qala dárwazasına shekem quwıp bardıq. 24 Sonda mergenler siziń adamlarıńızǵa qaray diywaldan oq attı. Patshanıń adamlarınıń ayırımları qaza taptı, xet xalqınan bolǵan qulıńız Uriya da qaza taptı.

25 Dawıt xabarshıǵa:

– Ioabqa bılay dep ayt: «Bolǵan waqıyaǵa qapa bolma. Sawashta kimniń óletuǵının bilip bolmaydı. Qalaǵa qarsı hújimdi kúsheytip, onı jer menen jeksen qılıńlar». Usı sózlerdi aytıp, oǵan jiger ber, – dedi.

26 Uriyanıń hayalı kúyewiniń qaza tapqanın esitip, ol ushın aza tuttı. 27 Aza tutıw waqtı tamam bolǵanda, Dawıt hayaldı sarayǵa aldırdı. Hayal Dawıtqa turmısqa shıǵıp, oǵan bir ul tuwıp berdi.

Biraq Dawıttıń bul isi Jaratqan Iyeniń názerinde jaman is boldı.

‏ 2 Samuel 12:1-25

Natannıń Dawıttı áshkaralawı

1 Jaratqan Iye payǵambar Natandı Dawıtqa jiberdi. Sonda Natan Dawıtqa kelip, bılay dedi:

– Bir qalada eki adam bolıptı. Olardıń birinshisi bay, al ekinshisi kámbaǵal eken. 2 Bay adamnıń júdá kóp mayda hám iri malları bar eken. 3 Biraq kámbaǵaldıń satıp alıp, baǵıp atırǵan bir urǵashı qozısınan basqa hesh nársesi joq eken. Qozı kámbaǵaldıń úyinde balaları menen birge ósipti. Onıń nanınan jep, kesesinen suw iship, qoynında uyıqlaptı. Sol adam ushın qozı óz qızınday edi. 4 Bir kúni bay adamnıń úyine bir jolawshı kelipti. Kelgen qonaqqa awqat tayarlaw ushın, óziniń qoy hám sıyırlarınan birin soyıwǵa baydıń kózi qıymay, kámbaǵaldıń qozısın alıp, qonaǵına awqat tayarlap beripti.

5 Dawıttıń bay adamǵa qattı ǵázebi kelip, Natanǵa bılay dedi:

– Tiri Jaratqan Iye haqı ant ishemen: bunday isti islegen adam ólimge ılayıqlı! 6 Tas bawırlıq qılıp, usınday isti islegeni ushın, qozını tórt ese qılıp tólewi tiyis.

7 Sonda Natan Dawıtqa bılay dedi:

– Sol adam sizsiz! Izraildıń Qudayı Jaratqan Iye bılay deydi: «Men seni maylap, Izrailǵa patsha etip qoydım hám Shauldıń qolınan qutqardım. 8 Men saǵan mırzańnıń úyin berdim, hayalların da qoynıńa saldım. Izrail hám Yahuda xalqın da saǵan berdim. Eger bul da az bolsa, bulardan da kóp nárselerdi berer edim. 9 Solay eken, nege Meniń názerimde jawız bolǵan islerdi islep, sózimdi pisent etpediń? Xet xalqınan bolǵan Uriyanı qılısh penen óltirip, hayalın ózińe aldıń. Awa, sen onı ammonlardıń qılıshı menen óltirdiń. 10 Bunnan bılay, máńgige seniń xojalıǵıńnan qılısh arımaydı. Sebebi sen Meni pisent etpey, xet xalqınan bolǵan Uriyanıń hayalın ózińe hayallıqqa aldıń». 11 Jaratqan Iye jáne bılay deydi: «Saǵan óz xojalıǵıń arqalı jamanlıq keltiremen. Seniń kóz aldıńda hayallarıńdı alıp, jaqınlarıńnıń birine beremen. Ol kúpá-kúndiz hayallarıńnıń qoynına kiredi. 12 Awa, sen bul isti jasırınsha islediń, biraq Men bunı pútkil Izrail xalqınıń kóz aldında kúpá-kúndiz isleymen».

13 Dawıt Natanǵa:

– Men Jaratqan Iyege qarsı gúna isledim, – dedi.

Natan oǵan:

– Jaratqan Iye gúnańızdan ótti, siz ólmeysiz. 14 Biraq siz bul isińiz arqalı Jaratqan Iyeniń dushpanlarına Oǵan til tiygiziwge jol qoyıp berdińiz. Sol sebepli siziń tuwılǵan perzentińiz óledi, – dep juwap berdi. 15 Sońınan Natan úyine qayttı.

Jaratqan Iye Uriyanıń hayalınıń Dawıttan tuwǵan balasın awır keselge duwshar etti. 16 Dawıt Qudayǵa bala ushın jalbarınıp, oraza tuttı. Úyine kelip, jerde jatqan halda túnlerdi ótkerdi. 17 Saray aqsaqalları Dawıttı jerden turǵızıw ushın kelgende, ol turıwdı qálemedi hám olar menen birge awqat ta jemedi. 18 Jetinshi kúni bala shetnedi. Xızmetshileri Dawıtqa balanıń shetnegeni haqqında xabarlawǵa qorqtı. Olar: «Bala tiri waqıtta, bizler onıń menen sóylesken edik, biraq ol bizlerge qulaq aspadı. Endi balanıń shetnegenin oǵan qalay aytamız? Ol ózine qanday da bir jaman nárse islep qoyar», – dep sıbırlastı.

19 Dawıt xızmetshileriniń óz ara sıbırlasıp atırǵanın kórgende, balanıń shetnegenin túsindi. Ol xızmetshilerinen:

– Bala qaytıs boldı ma? – dep soradı.

Olar Dawıtqa:

– Awa, qaytıs boldı, – dep juwap berdi.

20 Sonda Dawıt ornınan turıp, juwındı. Ústine átir jaǵıp, kiyimlerin almastırdı hám Jaratqan Iyeniń Úyine barıp, sıyındı. Sońınan úyine qaytıp kelip, ózine awqat beriliwin buyırdı hám aldına qoyılǵan awqattı jedi. 21 Xızmetshileri oǵan:

– Bul isińizdi qalay túsinsek boladı? Bala tiri waqtında oraza tutıp, jıladıńız. Al ol ólgennen keyin, ornıńızdan turıp, awqat jedińiz, – dedi.

22 Dawıt olarǵa bılay dep juwap berdi:

– Awa, bala tiri waqtında oraza tuttım, jıladım. Sebebi: «Kim biledi, Jaratqan Iye maǵan miyrimin túsirip, bala jasap keter», – dep oylaǵan edim. 23 Biraq endi bala óldi. Solay eken, oraza tutıwımnıń ne keregi bar? Onı qaytara alar ma edim? Men onıń janına baraman, biraq ol meniń janıma qaytıp kelmeydi.

Sulaymannıń tuwılıwı

24 Dawıt hayalı Bat-Shebanı jubattı hám janına kirip, onıń menen jattı. Bat-Sheba ul tuwdı hám onıń atın Sulayman dep qoydı. Jaratqan Iye balanı súygenlikten, 25 Natan payǵambardı oǵan jiberdi. Natan Jaratqan Iyeniń sózi boyınsha balaǵa Edidiya ^{▼▼ Edidiya – «Jaratqan Iyeniń súyiklisi» degendi bildiredi.} dep at qoydı.