‏ 2 Samuel 15:13-37

Dawıttıń Erusalimnen qashıwı

13Bir xabarshı Dawıtqa kelip:

– Izraillılardıń kewli Abshalomǵa awıp ketti, – dedi. 14Sonda Dawıt Erusalimde ózi menen birge bolǵan barlıq xızmetshilerine:

– Turıńlar, qashayıq! Bolmasa, Abshalomnan qashıp qutıla almaysız. Dárhal ketip qalmasaq, Abshalom izimizden tez jetip alıp, bálege duwshar eter, qalanı da qılıshtan ótkerer, – dedi.

15Patshanıń xızmetshileri:

– Taqsır, siz qanday qararǵa kelseńiz, bizler orınlawǵa tayarmız, – dep juwap berdi.

16Solay etip, patsha pútkil saray xalqın izine ertip, jolǵa shıqtı. Al sarayǵa qarap turıwı ushın, on toqalın sol jerde qaldırdı. 17Patsha hám onıń izine ergen pútkil xalıq qalanıń eń shetindegi úydiń janına kelip, toqtadı. 18Sol jerden baslap, barlıq xızmetshileri, keretler menen peletlerden alınǵan tán saqshılar hám Gattan ózine erip kelgen gatlı altı júz ásker patshanıń aldınan júrip ótti.

19Patsha gatlı Ittayǵa bılay dedi:

– Nege sen de bizler menen kiyatırsań? Izińe qaytıp, jańa patsha menen qal. Óytkeni sen watanıńnan quwılǵan bir jat elliseń. 20Sen keshe kelgenseń. Búgin qay jerge bararımdı ózim bilmey turıp, seni de sergizdan qılayın ba? Izge qayt, áskerlerińdi de óziń menen alıp qayt. Qudaydıń súyispenshiligi hám sadıqlıǵı saǵan yar bolsın!

21Biraq Ittay patshaǵa:

– Taqsır, tiri Jaratqan Iye haqı aldıńızda ant iship aytaman: ólim ushın bolsa da, ómir ushın bolsa da, siz qay jerde bolsańız, qulıńız bolǵan men de sol jerde bolaman, – dep juwap berdi.

22Dawıt Ittayǵa:

– Yaqshı, onda aldıǵa ótip, júre ber, – dedi.

Solay etip, gatlı Ittay hám onıń janındaǵı hámme adamlar bala-shaǵaları menen birge jolın dawam etti. 23Xalıq ketip baratırǵanda, átiraptaǵı pútkil el zar-zar jılastı. Patsha Kidron sayınan ótti. Pútkil xalıq shólistanlıqqa qaray jol aldı.

24Ruwxaniy Sadoq penen Qudaydıń Kelisim sandıǵın kótergen lebiyliler de sol jerde edi. Olar Qudaydıń sandıǵın jerge qoydı. Pútkil xalıq qaladan shıǵıp bolǵansha, ruwxaniy Abiyatar tóbeshikke kóterilip, olardı kútip turdı.

25Sońınan patsha Sadoqqa bılay dedi:

– Qudaydıń sandıǵın qalaǵa qaytarıp alıp bar. Eger Jaratqan Iyeniń maǵan miyrimi túsken bolsa, Ol meni izime qaytarıp, sandıqtı hám sandıq turatuǵın orındı maǵan kórseter. 26Eger Ol maǵan: «Saǵan kewlim tolmadı», – dese, onda men tayarman. Ol maǵan maqul kórgenin islesin.

27Patsha sózin dawam etip, ruwxaniy Sadoqqa bılay dedi:

– Jaǵdaydı kórip turǵan joqsań ba? Ulıń Aximaastı hám Abiyatardıń ulı Ionatandı janıńa al da, Abiyatar menen birge aman-esen qalaǵa qayt. 28Sizlerden anıq bir xabar almaǵanımsha, men Iordan tegisliginde, dáryanıń ótkelinde kútip turaman.

29Solay etip, Sadoq penen Abiyatar Qudaydıń sandıǵın Erusalimge qaytarıp aparıp, sol jerde qaldı. 30Al Dawıt bolsa, jılap-eńirep Záytún tawına kóterile berdi. Ol basın orap alıp, jalańayaq ketip baratır edi. Onıń janındaǵı adamlardıń hámmesi de basların orap alıp, jılap-eńirep tawǵa shıǵıp baratır edi.

31Sol arada birew Dawıtqa:

– Axitofel de Abshalomnıń tárepin alǵan til biriktiriwshiler arasında eken, – dep xabarladı.

Sonda Dawıt: «Jaratqan Iye, Axitofeldiń keńesin joqqa shıǵara gór!» – dep duwa etti.

32Dawıt Qudayǵa sıyınatuǵın tawdıń tóbesine jetip barǵanda, Ark tiyresinen bolǵan Xushay kiyimi jırtılǵan, basına topıraq shashılǵan halda onı qarsı aldı. 33Dawıt oǵan bılay dedi:

– Meniń menen birge ketseń, maǵan júk bolasań. 34Eger qalaǵa qaytıp barsań, Abshalomǵa: «Taqsır, siziń qulıńız bolmaqshıman. Burın ákeńizge qanday xızmet etken bolsam, sizge de solay xızmet etemen», – dep aytarsań. Usılay sen Axitofeldiń másláhátin meniń ushın bosqa shıǵarasań. 35Ruwxaniyler Sadoq penen Abiyatar sol jerde seniń menen birge boladı. Patshanıń sarayında esitkenlerińniń hámmesinen olardı xabardar etip tur. 36Sadoqtıń ulı Aximaas penen Abiyatardıń ulı Ionatan da sol jerde. Esitkenlerińniń hámmesin olar arqalı maǵan jetkerip turasań.

37Solay etip, Dawıttıń dostısı Xushay Erusalimge ketti. Sol waqıtta Abshalom da Erusalimge kirip kiyatırǵan edi.

‏ 2 Samuel 16

Dawıt hám Siba

1Dawıt tawdıń tóbesinen arman qaray biraz túskende, Mefiboshettiń xızmetshisi Siba qosaqlanǵan eki eshekke eki júz nan, keptirip nıǵızlanǵan kishmishten júz dana, taza pisken miyweden júz dana hám bir mes sharap júklep, Dawıttıń aldınan shıqtı. 2Patsha Sibadan:

– Bulardı ne ushın alıp keldiń? – dep soradı.

Siba oǵan:

– Eshekler patsha xojalıǵındaǵılardıń miniwi ushın, nan menen taza miyweler xızmetshilerińizdiń jewi ushın, al sharap shólde haldan tayǵanlardıń ishiwi ushın, – dep juwap berdi.

3Patsha onnan:

– Mırzań Shauldıń aqlıǵı qayaqta? – dep soradı.

Siba oǵan:

– Mefiboshet Erusalimde qaldı. Sebebi ol: «Izrail xalqı búgin atamnıń patshalıǵın maǵan qaytarıp beredi», – dep aytıp atır, – dep juwap berdi.

4Sonda patsha oǵan:

– Mefiboshettiń hámme nársesi seniki boladı, – dedi.

Siba patshaǵa tájim etip:

– Qullıq, taqsır! Maǵan bárqulla kewlińiz tolǵay! – dedi.

Dawıt hám Shimey

5Dawıt patsha Baxurimge jetip barǵanda, Shauldıń tiyresinen bolǵan Geranıń ulı Shimey ǵarǵanıwı menen onıń aldınan shıqtı. 6Pútkil áskerleri hám márt jawıngerleri Dawıt patshanıń oń hám shep jaǵında turǵanına qaramastan, Shimey Dawıtqa hám onıń xızmetshilerine tas ılaqtırdı. 7Shimey bılay dep ǵarǵandı:

– Joq bol, ket. Háy, qanxor, ońbaǵan adam! 8Sen ornına patsha bolǵan Shauldıń úy-ishinde tógilgen qanlardıń qunın Jaratqan Iye sennen óndirip atır. Ol patshalıqtı ulıń Abshalomǵa berdi. Sen qanxor bolǵanıń ushın, bul bálege jolıqtıń.

9Seruya ulı Abishay patshaǵa:

– Bul óli kópek nege taqsırımdı ǵarǵaydı eken? Ruxsat beriń, basın úzip taslayın, – dedi.

10Biraq patsha oǵan:

– Seruya ulları, bunıń menen sizlerdiń jumısıńız bolmasın! Jaratqan Iye oǵan: «Dawıttı ǵarǵa», – degeni ushın ǵarǵap atırǵan bolsa, kim onnan: «Nege bulay islep atırsań?» – dep soray aladı? – dedi.

11Keyin Dawıt Abishayǵa hám xızmetshilerine bılay dedi:

– Óz ulım meni óltirmekshi bolıp turǵanda, mına benyaminli onnan beterin islemey me? Onı tınıshına qoyıńlar, ǵarǵay bersin. Óytkeni bunı oǵan Jaratqan Iye aytqan. 12Bálkim, Jaratqan Iye meniń xorlanıp atırǵanımdı kórip, búgingi ǵarǵıslar ornına jaqsılıq qaytarar.

13Dawıt adamları menen birge jolın dawam etti. Al Shimey Dawıttıń qaptalında, tawdıń janbawırında júrip onı ǵarǵadı, oǵan tas atıp, topıraq shashtı. 14Iordan dáryasındaǵı ótkelge sharshap jetken patsha hám onıń janındaǵı xalıq sol jerde dem aldı.

Xushay menen Axitofeldiń keńesleri

15Sol arada Abshalom hám onıń izraillı pútkil tárepdarları Erusalimge keldi. Axitofel de Abshalom menen birge edi. 16Sonda Dawıttıń dostısı Ark tiyresinen bolǵan Xushay Abshalomnıń janına barıp:

– Jasasın patsha! Jasasın patsha! – dep baqırdı.

17Abshalom Xushaydan:

– Dostıńa sadıqlıǵıń usı ma? Ne ushın dostıń menen ketpediń? – dep soradı.

18Xushay oǵan bılay dep juwap berdi:

– Yaq, men Jaratqan Iyeniń, mına xalıqtıń hám pútkil izraillılardıń tańlaǵan adamı tárepinde bolıp, onıń janında qalaman. 19Endi men Dawıttıń ulı Abshalomnan basqa kimge xızmet qılaman? Ákeńizge qalay xızmet etken bolsam, sizge de solay xızmet etemen.

20Sonda Abshalom Axitofelge qarap:

– Ne isleyik, bizlerge keńes ber, – dedi.

21Axitofel Abshalomǵa:

– Sarayǵa qarap turıwı ushın, ákeńniń taslap ketken toqalları menen jat. Sonda pútkil Izrail ákeńizdiń sizdi jek kórip qalǵanın biledi hám sizdi qollawshılardıń hámmesi jáne de kúshke minedi.

22Solay etip, saraydıń úshegine Abshalom ushın bir shatır qurıldı. Ol pútkil izraillılardıń kóz aldında ákesiniń toqalları menen jatıp shıqtı.

23Sol waqıtları Axitofel bergen keńesler Quday tárepinen berilgen keńesler dep sanalatuǵın edi. Axitofeldiń hár bir keńesi Dawıt ushın da, Abshalom ushın da usınday edi.

‏ 2 Samuel 17:1-22

Xushaydıń Axitofeldiń keńesin buzıwı

1Axitofel Abshalomǵa jáne bılay dedi:

– Ruxsat berseńiz, on eki mıń adamdı saylap alıp, búgin túnde ketip, Dawıttıń izine túseyin. 2Házir Dawıt sharshap, haldan tayǵan waqıtta, oǵan hújim etip, kózin qorqıtsam, qasındaǵılar qashıp ketedi. Sonda men Dawıt patshanıń bir ózin óltiremen. 3Sońınan pútkil xalıqtı sizge qaytarıp alıp kelemen. Xalıqtıń sizge qaytıwı siz óltirmekshi bolıp atırǵan adamnıń ólimine baylanıslı. Solay etip, pútkil xalıq zıyan kórmeydi.

4Bul keńes Abshalomǵa da, pútkil Izrail aqsaqallarına da unap qaldı. 5Biraq Abshalom:

– Ark tiyresinen bolǵan Xushaydı da shaqırıń. Ol ne der eken, esiteyik, – dedi. 6Xushay kelgende, Abshalom oǵan Axitofeldiń qanday keńes bergeni tuwralı aytıp berdi. Sońınan ol Xushaydan:

– Onıń keńesi boyınsha is tutayın ba? Bolmasa, sen keńes ber, – dep soradı.

7Xushay Abshalomǵa bılay juwap berdi:

– Axitofeldiń bul rette bergen keńesi jaqsı emes. 8Ákeńizdiń hám onıń adamlarınıń márt jawıngerler ekenin bilesiz. Olar dalada balalarınan ayırılǵan ayıw sıyaqlı ǵázepli. Bunıń ústine, ákeńiz tájiriybeli jawınger, ol túndi áskerler janında ótkermeydi. 9Bul waqıtta ol úńgirlerdiń birinde yamasa bir jerde jasırınıp júrgen bolsa kerek. Eger ol áskerlerimizge birinshi bolıp hújim jasasa, ol haqqında esitken hár bir adam: «Abshalomǵa ergenler qırǵınǵa ushıraptı», – dep aytadı. 10Sonda júrekleri arıslannıń júregindey bolǵan mártlerdiń de qorqınıshtan ruwxları túsedi. Sebebi ákeńizdiń batırlıǵın hám onıń qasındaǵılardıń mártligin pútkil Izrail biledi. 11Sonlıqtan sizge aytatuǵın keńesim mınaw: Dannan Beer-Shebaǵa shekemgi, teńiz jaǵasındaǵı qum sıyaqlı san-sanaqsız bolǵan pútkil izraillılardı átirapıńızǵa toplań. Siz ózińiz de sawashqa shıǵıń. 12Sonda bizler jasırınǵan jerleriniń birinde Dawıtqa hújim qılıp, jer betine túsken shıq kibi ústine bastırıp baramız. Dawıttı da, onıń janındaǵılardıń hesh birin de tiri qaldırmaymız. 13Eger ol bir qalanı panalasa, onda pútkil izraillılar sol qalaǵa arqanlar alıp baradı. Qalanı bir tası qalmaǵansha, oypatlıqqa qaray tartıp qulatıp, joq qılamız.

14Abshalom hám pútkil izraillılar: «Xushaydıń keńesi Axitofeldiń keńesinen jaqsıraq», – dedi. Sebebi Jaratqan Iye Abshalomdı apatqa ushıratıw ushın, Axitofeldiń jaqsı keńesin joqqa shıǵarıwdı sheship qoyǵan edi.

15Xushay ruwxaniyler Sadoq penen Abiyatarǵa Axitofeldiń Abshalom menen Izrail aqsaqallarına bergen keńesi hám óziniń olarǵa bergen keńesi tuwralı aytıp berdi. 16Sońınan olarǵa:

– Sizler mına xabardı Dawıtqa tez jetkiziń: bul túndi Iordan tegisliginde, dáryanıń ótkelinde ótkizbesin. Tez arǵı tárepke ótsin. Bolmasa, patshanıń ózi de, janındaǵılar da tolıq qırılıp ketedi, – dedi.

17Sol waqıtları qalada kórinbew ushın, Ionatan menen Aximaas qala sırtındaǵı Rogel bulaǵı janında kútip turatuǵın edi. Bir shorı qız barıp, olarǵa bolıp ótkenlerdi xabarlap turatuǵın, al olar esitkenlerin Dawıt patshaǵa jetkizip turatuǵın edi. 18Biraq bir óspirim olardı kórip qalıp, Abshalomǵa xabarladı. Sonda Ionatan menen Aximaas asıǵıs ol jerden ketip, Baxurimdegi bir adamnıń úyine keldi. Úydiń háwlisinde bir qudıq bar edi. Ionatan menen Aximaas sol qudıqqa jasırındı. 19Sol adamnıń hayalı bir japqısh alıp, qudıqtıń awzın jawıp qoyıp, hesh nárse sezilmewi ushın, onıń ústine masaqlardı jayıp tasladı. 20Abshalomnıń xızmetshileri úyge, hayaldıń janına kelip, onnan:

– Aximaas penen Ionatan qay jerde? – dep soradı.

Hayal olarǵa:

– Ózektiń arǵı tárepine ótip ketti, – dep juwap berdi.

Abshalomnıń xızmetshileri olardı izlep ketti, biraq taba almay, Erusalimge qayttı.

21Adamlar ketkennen keyin, Aximaas penen Ionatan qudıqtan shıqtı da, bolıp ótken waqıyalardı xabarlaw ushın, Dawıt patshaǵa ketti. Olar Dawıtqa barıp:

– Qáne, házir-aq dáryanı kesip ótińler, – dedi hám Axitofeldiń oǵan qarsı qanday keńes bergenligin aytıp berdi. 22Dawıt sol waqıtta-aq pútkil adamları menen birge Iordan dáryasın kesip ótti. Tań atqanda, Iordan dáryasın kesip ótpegen birde bir adam qalmadı.