Lev 25:8-17 | KaaIBT22L | STEP | «Jeti jılda bir márte belgilenetuǵın Shabbat jılınıń jeti márte ótiwin baqlań. Shabbat jılı jeti márte ótkende, barlıǵı bolıp qırıq toǵız jıl boladı.

‏ Leviticus 25:8-17

Qutlı jıl

8 «Jeti jılda bir márte belgilenetuǵın Shabbat jılınıń jeti márte ótiwin baqlań. Shabbat jılı jeti márte ótkende, barlıǵı bolıp qırıq toǵız jıl boladı. 9 Keyingi jıldıń jetinshi ayınıń onınshı kúni, yaǵnıy Gúnadan pákleniw kúni pútkil el boylap qattı dawıslap kárnay shertilsin. 10 Usı eliwinshi jıldı muxaddes dep sanańlar hám pútkil el xalqı ushın azatlıq járiyalańlar. Usı jıl sizler ushın Qutlı jıl boladı. Hár bir adam óziniń jer múlkin qaytarıp alsın hám qul bolǵan hár bir adam azat bolıp, óz tiyresine qaytsın. 11 Eliwinshi jıl sizler ushın Qutlı jıl bolsın. Usı jılı egin ekpeńler, ózi ósip shıqqan eginlerdi orıp alıp, saqlamańlar, shaqası putalanbaǵan júzimlerdi jıynamańlar. 12 Óytkeni usı jıl Qutlı jıl hám bul sizler ushın muxaddes bolsın. Tek atızdan tuwrıdan-tuwrı alınǵan zúráátti jeńler.

13 Qutlı jılı hár bir adam óziniń jer múlkin qaytarıp alsın. 14 Eger bir adamǵa jer satatuǵın bolsań yamasa onnan jer satıp alatuǵın bolsań, bir-birińizge nahaqlıq qılmań. 15 Jerdiń bahası keyingi Qutlı jılǵa shekemgi jerdiń jetistiretuǵın zúrááti boyınsha bahalansın. 16 Eger aldında ele kóp jıl bolsa, bahası artsın, al azǵantay jıl qalǵan bolsa, onda bahası túsirilsin. Sebebi saǵan atızdı emes, al onıń zúráátiniń muǵdarın satadı. 17 Bir-birińizge nahaqlıq qılmańlar, Qudayıńızdan qorqıńlar. Men – Qudayıńız Jaratqan Iyemen.