Luk 11:14-23 | KaaIBT22L | STEP | Bir kúni Iysa bir adamnan gúńelek jindi quwıp shıǵardı. Jin shıqqannan soń, gúńelek adam sóyley baslaǵanda, xalıq hayran qaldı.

‏ Luke 11:14-23

Iysa hám Belzebúl

(Mat 12:22-30; Mrk 3:20-27)

14 Bir kúni Iysa bir adamnan gúńelek jindi quwıp shıǵardı. Jin shıqqannan soń, gúńelek adam sóyley baslaǵanda, xalıq hayran qaldı. 15 Biraq olardıń geybirewleri: «Ol jinlerdi jinlerdiń baslıǵı Belzebúl-shaytannıń kúshi menen quwıp shıǵarıp júr», – desti.

16 Al basqaları Iysanı sınap kórmekshi bolıp, aspannan káramatlı belgi kórsetiwdi talap etti. 17 Biraq Iysa olardıń oyların bilip, bılay dedi:

– Óz ara qarsı bolıp bólingen hár bir patshalıq joq boladı. Óz ara qarsı bolıp bólingen hár bir úy qulaydı. 18 Eger shaytan óz ara qarsı bolıp bólinse, onıń patshalıǵı qalay saqlanadı? Sizler Meni: «Jinlerdi Belzebúl-shaytannıń kúshi menen quwıp shıǵarıp júr», – deysizler. 19 Eger Men jinlerdi Belzebúl-shaytannıń kúshi menen quwıp shıǵarıp júrgen bolsam, onda sizlerdiń shákirtlerińiz olardı kimniń kúshi menen quwıp shıǵarıp júr? Solay etip, olar sizlerdiń nadurıs ekenińizdi áshkaralaydı. 20 Biraq, eger Men jinlerdi Qudaydıń kúshi menen quwıp shıǵarıp atırǵan bolsam, onda sizlerge Qudaydıń Patshalıǵınıń jetip kelgeni. 21 Tis-tırnaǵına deyin qurallanǵan bir kúshli adam óz úyin qorǵasa, onıń mal-múlki aman boladı. 22 Al onnan da kúshlirek birew oǵan hújim jasap, onı jeńse, onıń isengen barlıq quralların tartıp alıp, oljasın bólistiredi.

23 Kim de kim Meniń menen birge bolmasa, ol Maǵan qarsı. Kim de kim Meniń menen birge jıynamasa, ol shashadı.