Luk 9:10-17 | KaaIBT22L | STEP | Elshiler qaytıp kelip, islegen hámme isleri haqqında Iysaǵa aytıp berdi. Iysa Ózi menen birge tek olardı ǵana alıp, Betsayda dep atalǵan qalaǵa ketti.

‏ Luke 9:10-17

Iysanıń bes mıńnan aslam adamdı toyǵızıwı

(Mat 14:13-21; Mrk 6:30-44; Yuxn 6:1-14)

10 Elshiler qaytıp kelip, islegen hámme isleri haqqında Iysaǵa aytıp berdi. Iysa Ózi menen birge tek olardı ǵana alıp, Betsayda dep atalǵan qalaǵa ^{▼▼Betsayda dep atalǵan qalaǵa – Bazı qoljazbalarda «Betsayda degen qalaǵa jaqın jerdegi bir shólge».} ketti. 11 Biraq xalıq bunı bilip, Iysanıń izinen keldi. Iysa olardı jaqsı qabıl alıp, olarǵa Qudaydıń Patshalıǵı haqqında ayttı hám shıpaǵa mútáj adamlarǵa shıpa berdi.

12 Kún kesh bola baslaǵanda, on eki elshisi Iysanıń aldına kelip:

– Xalıqtı jiber. Átiraptaǵı awıl-elatlarǵa barıp, túneytuǵın jer menen azıq-awqat tapsın. Óytkeni bizler bir elsiz jerdemiz-ǵo, – dedi.

13 Biraq Iysa olarǵa:

– Olarǵa sizler awqat berińler, – dedi.

– Bizler barıp, sonsha adamǵa azıq satıp almasaq, bes nan menen eki balıqtan basqa hesh nársemiz joq, – dedi shákirtleri.

14 Sebebi ol jerde bes mıńǵa shamalas er adam bar edi.

Iysa shákirtlerine:

– Olardı eliw-eliwden topqa bólip otırǵızıńlar, – dedi.

15 Shákirtleri solay islep, hámmesin jerge otırǵızdı. 16 Iysa bes nan menen eki balıqtı alıp, aspanǵa qarap olar ushın Qudayǵa shúkirlik etti. Olardı sındırıp, xalıqqa tarqatıw ushın, shákirtlerine berdi. 17 Hámme jep toydı. Awısqan bóleklerin jıynap, úlken on eki sebet toltırdı.