Mar 14:43-50 | KaaIBT22L | STEP | Tap sol waqıtta, Iysa ele sóylep turǵanda, on eki shákirtiniń biri Yahuda keldi. Onıń menen birge bas ruwxaniyler, diniy muǵallimler hám aqsaqallar jibergen bir topar adamlar bar edi. Adamlar qollarına qılısh hám shoqmar uslaǵan edi.

‏ Mark 14:43-50

Iysanıń qolǵa alınıwı

(Mat 26:47-56; Luk 22:47-53; Yuxn 18:3-12)

43 Tap sol waqıtta, Iysa ele sóylep turǵanda, on eki shákirtiniń biri Yahuda keldi. Onıń menen birge bas ruwxaniyler, diniy muǵallimler hám aqsaqallar jibergen bir topar adamlar bar edi. Adamlar qollarına qılısh hám shoqmar uslaǵan edi. 44 Satqınlıq qılıwshı olarǵa belgi berip: «Men kimdi súysem, Ol – Sonıń Ózi. Onı uslap, abaylap alıp ketińler», – degen edi.

45 Yahuda keldi de, dárriw Iysaǵa jaqınlasıp, Oǵan:

– Ustaz! – dep, Onı súydi.

46 Al adamlar Iysaǵa táp berip, uslap aldı. 47 Biraq Iysanıń qasında turǵanlardıń birewi qılıshın suwırıp alıp, bir siltep, bas ruwxaniydiń qulınıń qulaǵın shawıp tasladı. 48 Sonda Iysa olarǵa:

– Meni uslaw ushın, jınayatshıǵa qarsı shıqqanday bolıp, qılısh hám shoqmar alıp keldińler me? 49 Men hár kúni sizler menen Ibadatxanada birge bolıp, tálim bergenimde, Meni uslamadıńlar. Biraq, Muxaddes Jazıwlar orınlanıwı shárt, – dedi.

50 Sonda shákirtleriniń hámmesi Onı taslap, qashıp ketti.