Mar 14:66-72 | KaaIBT22L | STEP | Petr ishki háwlide otırǵanda, bas ruwxaniydiń shorı qızlarınan biri keldi.

‏ Mark 14:66-72

Petrdiń Iysadan tanıwı

(Mat 26:69-75; Luk 22:56-62; Yuxn 18:15-18, 25-27)

66 Petr ishki háwlide otırǵanda, bas ruwxaniydiń shorı qızlarınan biri keldi. 67 Ol otqa jılınıp otırǵan Petrdi kórip, oǵan tigilip qaradı da:

– Sen de sol nasıralı Iysa menen birge ediń-ǵo, – dedi.

68 Biraq Petr tanıp:

– Seniń ne aytıp turǵanıńdı bilmeymen hám túsinbeymen, – dedi de, sırtqı háwlige shıǵıp ketti ^{▼▼ Bazı qoljazbalarda mına sózler de bar: «Sol waqıtta qoraz shaqırdı».}.

69 Shorı qız onı kórip, sol jerdegilerge jáne:

– Bul adam – solardıń biri, – dep ayta basladı.

70 Biraq Petr jáne tandı.

Birazdan soń, sol jerde turǵanlar Petrge:

– Írasında da, sen solardıń biriseń, óytkeni galilalısań-ǵo ^{▼▼ Bazı qoljazbalarda mına sózler de bar: «Seniń sóylewiń júdá uqsas».}, – dedi.

71 Ol:

– Sizler aytıp turǵan bul Adamdı men tanımayman, aldasam nálet jawsın, – dep ant ishti.

72 Sol waqıtta-aq qoraz ekinshi ret shaqırdı. Petr Iysanıń ózine: «Qoraz eki ret shaqıraman degenshe, sen Mennen úsh ret tanasań», – degen sózi esine túsip, jılap jiberdi.