Mat 22:23-33 | KaaIBT22L | STEP | Qayta tiriliw joq, dewshi saddukeyler sol kúni Iysaǵa kelip, bılay dep soraw qoydı:

‏ Matthew 22:23-33

Qayta tiriliw tuwralı soraw

(Mrk 12:18-27; Luk 20:27-40)

23 Qayta tiriliw joq, dewshi saddukeyler sol kúni Iysaǵa kelip, bılay dep soraw qoydı:

24 – Ustaz! Muwsa: «Birew balası bolmay ólse, izinde qalǵan jesirine inisi úylenip, aǵasınıń urpaǵın dawam ettirsin», ^{▼▼ Nzm 25:5-6.} – degen-ǵo. 25 Bizde aǵayinli jeti jigit bar edi. Olardıń birinshisi úylenip, qaytıs boldı, balası bolmaǵanlıqtan, hayalı inisine qaldı. 26 Ekinshisine de, úshinshisine de, hátte, jetinshisine de solay boldı. 27 Bárinen keyin hayaldıń ózi de qaytıs boldı. 28 Al endi qayta tirilgende hayal jetewiniń qaysısınıń hayalı boladı? Ol olardıń hámmesine de hayal bolǵan edi-ǵo.

29 Iysa olarǵa juwap qaytarıp bılay dedi:

– Sizler Muxaddes Jazıwlardı da, Qudaydıń qúdiretin de bilmegenlikten aljasıp tursızlar. 30 Óytkeni adamlar qayta tiriliwde úylenbeydi de, turmısqa da shıqpaydı, al aspandaǵı perishteler sıyaqlı boladı. 31 Ólgenlerdiń qayta tiriliwi tuwralı Qudaydıń sizlerge aytqanların oqımaǵansızlar ma? 32 Quday: «Men Ibrayımnıń Qudayıman, Ísaqtıń Qudayıman, Yaqıptıń Qudayıman» ^{▼▼ Shıǵ 3:6.}, – degen. Quday ólilerdiń emes, al tirilerdiń Qudayı.

33 Bunı esitken xalıq Onıń tálimatına tań qaldı.