‏ 1 Corinthians 2

1បងប្អូនអើយ! ​កាល​ខ្ញុំ​បាន​មក​ឯ​អ្នករាល់គ្នា​នោះ​ខ្ញុំ​មិន​បាន​មក​ប្រកាស​អំពី​សេចក្ដី​អាថ៌​កំបាំង​របស់​ព្រះជាម្ចាស់​ដល់​អ្នករាល់គ្នា​ដោយ​ពាក្យ​សំដី​ដ៏​ឧត្ដម​ឬ​ដោយ​ប្រាជ្ញា​ឡើយ 2ដ្បិតខ្ញុំ​បាន​សម្រេច​ចិត្ត​ថា​នៅក្នុង​ចំណោម​អ្នករាល់គ្នា​ខ្ញុំ​មិន​ស្គាល់​អ្វី​ឡើយ​ក្រៅពី​ព្រះ​យេស៊ូ​គ្រិស្ត​ដែល​ត្រូវ​គេ​ឆ្កាង 3ហើយខ្ញុំ​បាន​មកនៅ​ជាមួយ​អ្នករាល់គ្នា​ដោយមាន​សេចក្ដី​កំសោយ​ភ័យខ្លាច​និង​ញាប់ញ័រ​ក្រៃលែង 4ឯពាក្យ​សំដី​និង​ការ​ប្រកាស​ដំណឹង​ល្អ​របស់​ខ្ញុំ​មិន​មែន​ជា​ពាក្យ​សំដី​បញ្ចុះបញ្ចូល​ចេញ​ពី​ប្រាជ្ញា​ទេ​គឺ​ជា​ការ​បើកសំដែង​តាមរយៈ​អំណាច​របស់​ព្រះ​វិញ្ញាណ​វិញ 5ដើម្បីឲ្យ​ជំនឿ​របស់​អ្នករាល់គ្នា​មិន​ពឹងផ្អែកលើ​ប្រាជ្ញា​របស់​មនុស្ស​ឡើយ​គឺ​ពឹងផ្អែកលើ​អំណាច​របស់​ព្រះជាម្ចាស់​វិញ 6ប៉ុន្ដែយើង​និយាយ​ដោយ​ប្រាជ្ញា​នៅក្នុង​ចំណោម​ពួក​អ្នក​ដែល​ពេញវ័យ​ខាងជំនឿ​តែ​មិន​មែន​ជា​ប្រាជ្ញា​របស់​លោកិយ​នេះ​ឬ​របស់​ពួក​អ្នកគ្រប់គ្រង​នៅ​លោកិយ​នេះ​ដែល​ត្រូវ​សាបសូន្យ​ឡើយ 7គឺយើង​និយាយ​អំពី​ប្រាជ្ញា​របស់​ព្រះជាម្ចាស់​ជា​សេចក្ដី​អាថ៌កំបាំង​លាក់ទុក​ដែល​ព្រះជាម្ចាស់​បាន​តម្រូវទុកជាស្រេច​តាំងពីមុន​កំណើត​ពិភពលោក​សម្រាប់​សិរីរុងរឿង​របស់​យើង 8គ្មានអ្នកណា​ម្នាក់​ក្នុង​ចំណោម​ពួក​អ្នកគ្រប់គ្រង​នៃ​លោកិយ​នេះ​បាន​យល់​អំពី​ប្រាជ្ញា​នេះ​ទេ​ព្រោះ​បើ​ពួកគេ​យល់​មែន​នោះ​ពួកគេ​មុខជា​មិន​បាន​ឆ្កាង​ព្រះអម្ចាស់​នៃ​សិរីរុងរឿង​ឡើយ 9ប៉ុន្តែដូច​មាន​សេចក្ដីចែង​ទុក​ថា៖ ​«អ្វី​ដែល​ភ្នែក​មិន​ដែល​ឃើញ​ត្រចៀក​មិន​ដែល​ស្ដាប់​ឮ​ហើយ​ចិត្ត​របស់​មនុស្ស​មិន​ដែល​នឹក​ដល់​នោះ​ជា​អ្វី​ដែល​ព្រះជាម្ចាស់​បាន​រៀបចំ​ទុក​សម្រាប់​ពួក​អ្នក​ដែល​ស្រលាញ់​ព្រះអង្គ» 10ព្រះជាម្ចាស់បាន​បើកសំដែង​ឲ្យ​យើង​យល់​ពី​សេចក្ដី​នោះ​តាមរយៈ​ព្រះ​វិញ្ញាណ​ដ្បិត​ព្រះ​វិញ្ញាណ​ឈ្វេង​យល់​គ្រប់​ទាំងអស់​សូម្បីតែ​ជម្រៅ​ព្រះហឫទ័យ​របស់​ព្រះជាម្ចាស់ 11ដ្បិតមាន​តែ​វិញ្ញាណ​នៅក្នុង​ខ្លួន​មនុស្ស​ប៉ុណ្ណោះ​ដែល​ស្គាល់​ចិត្ត​របស់​មនុស្ស​ដូច្នេះ​ក៏​គ្មាន​អ្នក​ណា​ម្នាក់​ស្គាល់​ព្រះហឫទ័យ​របស់​ព្រះជាម្ចាស់​បាន​ដែរ​មាន​តែ​ព្រះវិញ្ញាណ​របស់​ព្រះជាម្ចាស់​ប៉ុណ្ណោះ 12ឯយើង​វិញ​យើង​មិន​បាន​ទទួល​វិញ្ញាណ​របស់​លោកិយ​ទេ​គឺ​ទទួល​ព្រះ​វិញ្ញាណ​មកពី​ព្រះជាម្ចាស់​វិញ​ដើម្បី​ឲ្យ​យើង​ស្គាល់​អ្វីៗ​ដែល​ព្រះជាម្ចាស់​បាន​ប្រទាន​ដល់​យើង 13ហើយយើង​ក៏​និយាយ​អំពី​សេចក្ដី​ទាំងនោះ​ដែរ​គឺ​មិន​មែន​ដោយ​ពាក្យ​សំដី​ដែល​បាន​បង្រៀន​ដោយ​ប្រាជ្ញា​របស់​មនុស្ស​ទេ​គឺ​ដោយ​ពាក្យ​សំដី​ដែល​ព្រះ​វិញ្ញាណ​បាន​បង្រៀន​វិញ​ហើយ​ក៏​ប្រៀបធៀប​សេចក្ដី​ខាងវិញ្ញាណ​ជាមួយ​សេចក្ដី​ខាងវិញ្ញាណ 14ប៉ុន្តែមនុស្ស​ខាង​សាច់ឈាម​មិន​ទទួល​សេចក្ដី​ខាង​ព្រះ​វិញ្ញាណ​របស់​ព្រះជាម្ចាស់​ទេ​ពីព្រោះ​សេចក្ដី​ទាំងនោះ​ជា​សេចក្ដី​លេលា​សម្រាប់​គេ​ហើយ​គេ​ក៏​មិន​អាច​យល់​បាន​ដែរ​ដ្បិត​សេចក្ដី​ទាំងនោះ​ត្រូវ​វិនិច្ឆ័យ​ខាង​វិញ្ញាណ 15រីឯមនុស្ស​ខាង​វិញ្ញាណ​វិនិច្ឆ័យ​អំពី​សេចក្ដី​គ្រប់យ៉ាង​ប៉ុន្ដែ​គាត់​មិន​ត្រូវ​អ្នកណាម្នាក់​វិនិច្ឆ័យ​ឡើយ។ 16ដ្បិតតើ​អ្នក​ណា​ស្គាល់​គំនិត​របស់​ព្រះអម្ចាស់​បាន? ​តើ​អ្នក​ណា​នឹង​បង្រៀន​ព្រះអង្គ​បាន? ​រីឯ​យើង​វិញ​យើង​មាន​គំនិត​របស់​ព្រះ​គ្រិស្ដ។
Copyright information for KhmKCB