‏ Romans 8

1ដូច្នេះឥឡូវនេះ​អស់​អ្នក​នៅក្នុង​ព្រះ​គ្រិស្ដ​យេស៊ូ​គ្មាន​ទោស​ទៀត​ឡើយ 2ដ្បិតគោលការណ៍​របស់​ព្រះ​វិញ្ញាណ​នៃ​ជីវិត​ក្នុង​ព្រះ​គ្រិស្ដ​យេស៊ូ​បាន​ដោះ​ខ្ញុំ​ឲ្យ​រួច​ពី​គោលការណ៍​របស់​បាប​និង​គោលការណ៍​របស់​សេចក្ដី​ស្លាប់ 3ព្រោះអ្វី​ដែល​គម្ពីរវិន័យ​មិន​អាច​ធ្វើ​បាន​ដោយសារ​ភាព​ទន់ខ្សោយ​ខាង​សាច់ឈាម​នោះ​ព្រះជាម្ចាស់​បាន​ធ្វើ​រួច​ហើយ​គឺ​បាន​ចាត់​ព្រះរាជបុត្រា​របស់​ព្រះអង្គ​ឲ្យ​មក​ដោយ​មាន​លក្ខណៈ​ដូចជា​សាច់ឈាម​ដែល​មាន​បាប​ហើយ​ព្រះអង្គ​បាន​ដាក់ទោស​បាប​ដែល​មាន​នៅក្នុង​សាច់ឈាម​នោះ 4ដើម្បីឲ្យ​បញ្ញត្ដិ​របស់​ក្រឹត្យវិន័យ​បាន​សម្រេច​នៅក្នុង​យើង​ដែល​មិន​បាន​រស់នៅ​តាម​សាច់ឈាម​ហើយ​រស់នៅ​តាម​ព្រះ​វិញ្ញាណ។ 5ដ្បិតអ្នកណា​រស់នៅ​តាម​សាច់ឈាម​អ្នកនោះ​គិត​តែ​អំពី​ខាង​សាច់ឈាម​ទេ​ឯ​អ្នកណា​រស់នៅ​តាម​ព្រះ​វិញ្ញាណ​អ្នកនោះ​ក៏​គិត​តែ​អំពី​ខាង​ព្រះ​វិញ្ញាណ​ដែរ 6ព្រោះគំនិត​ខាង​សាច់ឈាម​នាំ​ទៅ​រក​សេចក្ដី​ស្លាប់​ឯ​គំនិត​ខាង​ព្រះ​វិញ្ញាណ​នាំ​ទៅ​រក​ជីវិត​និង​សេចក្ដី​សុខសាន្ត។ 7ដ្បិតគំនិត​ខាង​សាច់ឈាម​ប្រឆាំង​នឹង​ព្រះជាម្ចាស់​ព្រោះ​មិន​ចុះចូល​ជាមួយ​ក្រឹត្យវិន័យ​របស់​ព្រះជាម្ចាស់​គឺ​មិន​អាច​ចុះចូល​បាន​ផង។ 8ឯអស់អ្នក​នៅ​ខាង​សាច់ឈាម​ក៏​មិន​អាច​ឲ្យ​គាប់​ព្រះ​ហឫទ័យ​ព្រះជាម្ចាស់​បាន​ដែរ។ 9អ្នករាល់គ្នាមិន​នៅ​ខាង​សាច់ឈាម​ទេ​គឺ​នៅ​ខាង​ព្រះ​វិញ្ញាណ​វិញ​ពីព្រោះ​ព្រះ​វិញ្ញាណ​របស់​ព្រះជាម្ចាស់​គង់​នៅ​ក្នុង​អ្នករាល់គ្នា​ផ្ទុយទៅវិញ​អ្នកណា​គ្មាន​ព្រះ​វិញ្ញាណ​របស់​ព្រះ​គ្រិស្ដ​អ្នកនោះ​មិនមែន​ជា​របស់​ព្រះ​គ្រិស្ត​ទេ 10ហើយបើ​ព្រះ​គ្រិស្ដ​គង់​នៅក្នុង​អ្នករាល់គ្នា​ទោះជា​រូបកាយ​របស់​អ្នករាល់គ្នា​ស្លាប់​ដោយសារ​បាប​ក៏ដោយ​ក៏​វិញ្ញាណ​នៅ​មាន​ជីវិត​ដោយសារ​សេចក្ដី​សុចរិត​ដែរ 11ហើយបើ​ព្រះ​វិញ្ញាណ​របស់​ព្រះជាម្ចាស់​ដែល​បាន​ប្រោស​ព្រះ​យេស៊ូ​ឲ្យ​រស់​ឡើង​វិញ​គង់​នៅ​ក្នុង​អ្នករាល់គ្នា​នោះ​ព្រះជាម្ចាស់​ដែល​បាន​ប្រោស​ព្រះ​គ្រិស្ដ​ឲ្យ​រស់​ឡើង​វិញ​នឹង​ប្រោស​រូបកាយ​ដែល​តែងតែ​ស្លាប់​របស់​អ្នករាល់គ្នា​ឲ្យ​រស់​ឡើង​វិញ​មិនខាន​ដែរ​តាមរយៈ​ព្រះ​វិញ្ញាណ​របស់​ព្រះអង្គ​ដែល​គង់​នៅ​ក្នុង​អ្នករាល់គ្នា។ 12ដូច្នេះបងប្អូន​អើយ! ​យើង​ជំពាក់​ប៉ុន្ដែ​មិន​មែន​ជំពាក់​ចំពោះ​សាច់ឈាម​ដើម្បី​រស់នៅ​តាម​សាច់ឈាម​នោះ​ទេ 13ព្រោះបើ​អ្នករាល់គ្នា​រស់​នៅ​តាម​សាច់ឈាម​នោះ​អ្នករាល់គ្នា​នឹង​ត្រូវ​ស្លាប់​ផ្ទុយទៅវិញ​បើ​អ្នករាល់គ្នា​សម្លាប់​អំពើ​របស់​រូបកាយ​ដោយ​ព្រះ​វិញ្ញាណ​នោះ​អ្នករាល់គ្នា​នឹង​មាន​ជីវិត។ 14ដ្បិតអស់​អ្នក​ដែល​ព្រះ​វិញ្ញាណ​របស់​ព្រះជាម្ចាស់​ដឹកនាំ​អ្នក​ទាំងនោះ​ជា​កូន​របស់​ព្រះជាម្ចាស់។ 15អ្នករាល់គ្នាក៏​មិន​បាន​ទទួល​វិញ្ញាណ​ដែល​ធ្វើ​ឲ្យ​អ្នករាល់គ្នា​ត្រលប់ជា​បាវបម្រើ​ដែល​នាំ​ឲ្យ​មាន​ការ​ភ័យខ្លាច​ទៀត​ទេ​គឺ​អ្នករាល់គ្នា​បាន​ទទួល​វិញ្ញាណ​ដែល​ធ្វើ​ឲ្យ​អ្នករាល់គ្នា​ត្រលប់ជា​កូន​ចិញ្ចឹម​របស់​ព្រះជាម្ចាស់​រួច​ដោយសារ​វិញ្ញាណ​នេះ​ហើយ​បានជា​យើង​ស្រែក​ថា​អ័ប្បា​ព្រះវរបិតា​អើយ! 16ឯព្រះ​វិញ្ញាណ​ផ្ទាល់​ក៏​បាន​ធ្វើបន្ទាល់​ជាមួយ​វិញ្ញាណ​របស់​យើង​ដែរ​ថា​យើង​ជា​កូន​របស់​ព្រះជាម្ចាស់។ 17បើយើង​ជា​កូន​យើង​ជា​អ្នក​ស្នង​មរតក​គឺ​ជា​អ្នក​ស្នង​មរតក​របស់​ព្រះជាម្ចាស់​ហើយ​ជា​អ្នក​ស្នង​មរតក​រួម​ជាមួយ​ព្រះ​គ្រិស្ដ​ដែរ។ ​បើ​យើង​រងទុក្ខ​វេទនា​ជាមួយ​ព្រះ​គ្រិស្ដ​ក៏​យើង​ទទួល​សិរីរុងរឿង​រួម​ជាមួយ​ព្រះអង្គ​ដែរ។ 18ខ្ញុំយល់​ឃើញ​ថា​ទុក្ខ​លំបាក​ពេល​បច្ចុប្បន្ននេះ​ជា​សេចក្ដី​ដែល​មិន​ស័ក្ដិសម​យក​ទៅ​ប្រៀប​ផ្ទឹម​ជាមួយ​សិរីរុងរឿង​នៅ​ពេល​ខាង​មុខ​ដែល​ព្រះជាម្ចាស់​នឹង​បើកសម្ដែង​ឲ្យ​យើង​ឃើញ​នោះ​ទេ 19ដ្បិតអ្វីៗ​ដែល​ព្រះជាម្ចាស់​បាន​បង្កើត​មក​កំពុង​ទន្ទឹង​រង់ចាំ​ការ​បង្ហាញ​ខ្លួន​នៃ​កូន​របស់​ព្រះជាម្ចាស់​ដោយ​អន្ទះសា 20ព្រោះអ្វីៗ​ដែល​ព្រះជាម្ចាស់​បាន​បង្កើត​មក​បាន​ប្រគល់​ទៅក្នុង​ភាព​ឥត​ប្រយោជន៍​តែ​មិនមែន​ដោយ​ស្ម័គ្រចិត្ដ​ទេ​គឺ​ព្រះជាម្ចាស់​បាន​តម្រូវ​ដូច្នេះ​ដោយ​សង្ឃឹម​ថា 21អ្វីៗដែល​ព្រះជាម្ចាស់​បាន​បង្កើត​មក​នឹង​បាន​ដោះ​ឲ្យ​រួច​ពី​ភាព​ជា​បាវបម្រើ​របស់​សេចក្ដី​ពុករលួយ​ទៅឯ​សេរីភាព​នៃ​សេចក្ដី​រុងរឿង​របស់​កូន​ព្រះជាម្ចាស់ 22ដ្បិតយើង​ដឹង​ថា​អ្វីៗ​ទាំងអស់​ដែល​ព្រះជាម្ចាស់​បាន​បង្កើត​មក​ក៏​ស្រែក​ថ្ងូរ​ទាំង​ឈឺចាប់​ជាមួយ​គ្នា​រហូតដល់​ពេលនេះ 23ហើយមិន​ត្រឹមតែ​ប៉ុណ្ណោះ​ទេ​យើង​ផ្ទាល់​ដែល​មាន​ផល​ដំបូង​របស់​ព្រះ​វិញ្ញាណ​ក៏​ស្រែក​ថ្ងូរ​នៅក្នុង​ចិត្ដ​ទាំង​ទន្ទឹង​រង់ចាំ​ការ​ទទួល​ធ្វើជា​កូនចិញ្ចឹម​គឹ​ជា​សេចក្ដី​ប្រោស​លោះ​ដល់​រូបកាយ​របស់​យើង​ដែរ 24ដ្បិតយើង​សង្ឃឹម​ថា​បាន​សង្គ្រោះ​ប៉ុន្ដែ​សេចក្ដី​សង្ឃឹម​នេះ​មិនមែន​ជា​សេចក្ដី​សង្ឃឹម​ដែល​អាច​មើល​ឃើញ​ទេ​តើ​មាន​អ្នកណា​សង្ឃឹម​ចង់​បាន​អ្វី​ដែល​ខ្លួន​កំពុង​មើល​ឃើញ​នោះ? 25ប៉ុន្ដែបើ​យើង​សង្ឃឹម​លើ​អ្វី​ដែល​មិន​អាច​មើល​ឃើញ​នោះ​យើង​មុខជា​ទន្ទឹង​រង់ចាំ​ដោយ​អំណត់។ 26ព្រះវិញ្ញាណ​ក៏​ជួយ​ដល់​ភាព​ទន់ខ្សោយ​របស់​យើង​ដូច្នោះ​ដែរ​ដ្បិត​យើង​មិន​ដឹង​ថា​គួរ​អធិស្ឋាន​យ៉ាង​ដូចម្ដេច​ទេ​ប៉ុន្ដែ​ព្រះ​វិញ្ញាណ​ផ្ទាល់​បាន​ទូលអង្វរ​ជំនួស​យើង​ដោយ​សំឡេង​ថ្ងូរ​ដែល​រក​ថ្លែង​មិន​បាន 27ឯព្រះអង្គ​ដែល​ឈ្វេងយល់​ចិត្ត​របស់​មនុស្ស​ព្រះអង្គ​ដឹង​ពី​គំនិត​របស់​ព្រះ​វិញ្ញាណ​ព្រោះ​ព្រះវិញ្ញាណ​ទូលអង្វរ​ជំនួស​ពួក​បរិសុទ្ធ​ត្រូវ​នឹង​បំណង​របស់​ព្រះជាម្ចាស់។ 28យើងដឹង​ថា​គ្រប់​ការ​ទាំងអស់​ផ្សំគ្នា​ឡើង​សម្រាប់​ជា​សេចក្ដី​ល្អ​ដល់​អស់​អ្នក​ដែល​ស្រលាញ់​ព្រះជាម្ចាស់​គឺ​ដល់​អស់​អ្នក​ដែល​ព្រះអង្គ​បាន​ត្រាស់​ហៅ​ស្រប​តាម​បំណង​របស់​ព្រះអង្គ 29ដ្បិតអស់​អ្នក​ដែល​ព្រះអង្គ​បាន​ស្គាល់​ជាមុន​ព្រះអង្គ​បាន​តម្រូវ​ពួកគេ​ទុក​ជា​ស្រេច​ឲ្យ​មាន​លក្ខណៈ​ដូច​ព្រះ​រាជ​បុត្រា​របស់​ព្រះអង្គ​ដើម្បី​ឲ្យ​ព្រះ​រាជ​បុត្រា​ត្រលប់ជា​កូន​ច្បង​នៅក្នុង​ចំណោម​បងប្អូន​ជា​ច្រើន 30ហើយអស់​អ្នក​ដែល​ព្រះអង្គ​បាន​តម្រូវ​ទុក​ជា​ស្រេច​ទាំងនេះ​ព្រះអង្គ​ក៏​បាន​ត្រាស់​ហៅ​ហើយ​អស់​អ្នក​ដែល​ព្រះអង្គ​បាន​ត្រាស់​ហៅ​ព្រះអង្គ​ក៏​រាប់​ជា​សុចរិត​ហើយ​អស់​អ្នក​ដែល​ព្រះអង្គ​បាន​រាប់​ជា​សុចរិត​ព្រះអង្គ​ក៏​លើក​តម្កើង​ឡើង។ 31ដូច្នេះតើ​យើង​និយាយ​យ៉ាង​ដូចម្ដេច​ចំពោះ​សេចក្ដី​ទាំងនេះ? ​បើ​ព្រះជាម្ចាស់​នៅ​ខាង​យើង​តើ​អ្នក​ណា​ទាស់​ជាមួយ​យើង​បាន? 32ព្រះអង្គដែល​មិន​បាន​សំចៃ​ទុក​សូម្បីតែ​ព្រះ​រាជ​បុត្រា​របស់​ព្រះអង្គ​ដែល​ព្រះអង្គ​បាន​បញ្ជូន​មក​សម្រាប់​យើង​ទាំងអស់​គ្នា​តើ​ព្រះអង្គ​នឹង​មិន​ប្រោស​ប្រទាន​អ្វីៗ​ទាំងអស់​ដល់​យើង​ជាមួយ​ព្រះរាជបុត្រា​ដែរ​ទេ​ឬ? 33តើអ្នក​ណា​នឹង​ចោទ​ប្រកាន់​ពួក​អ្នក​ដែល​ព្រះជាម្ចាស់​ជ្រើស​រើស​បាន? ​ដ្បិត​ព្រះជាម្ចាស់​គឺ​ជា​អ្នក​ដែល​រាប់​ពួកគេ​ជា​សុចរិត។ 34តើអ្នក​ណា​ជា​អ្នក​ដាក់​ទោស​គេ? ​ដ្បិត​ព្រះ​គ្រិស្ដ​យេស៊ូ​បាន​សោយទិវង្គត​ហើយ​លើស​ពីនេះ​បាន​រស់ឡើងវិញ​ទៀត​ព្រមទាំង​គង់​នៅ​ខាង​ស្ដាំ​ព្រះហស្ដ​របស់​ព្រះជាម្ចាស់​ដែរ​ព្រះអង្គ​ជា​អ្នក​ទូលអង្វរ​ជំនួស​យើង​ទៀត​ផង។ 35តើអ្នក​ណា​នឹង​ពង្រាត់​យើង​ចេញ​ពី​សេចក្ដី​ស្រលាញ់​របស់​ព្រះ​គ្រិស្ដ​បាន? ​តើ​ជា​សេចក្ដី​វេទនា​សេចក្ដី​លំបាក​ការ​បៀតបៀន​សេចក្ដី​អត់ឃ្លាន​សេចក្ដី​អាក្រាត​សេចក្ដី​អន្តរាយ​ឬ​ក៏​ដាវ? 36ដូចមាន​សេចក្ដីចែង​ទុក​ថា៖ ​«ដោយ​ព្រោះ​ព្រះអង្គ​យើង​បាន​ប្រឈម​មុខ​ចំពោះ​សេចក្ដី​ស្លាប់​វាល់​ព្រឹក​វាល់​ល្ងាច​ដូចជា​ចៀម​ដែល​ត្រូវ​យក​ទៅ​សម្លាប់»។ 37ប៉ុន្ដែទោះបី​នៅក្នុង​សេចក្ដី​ទាំងនេះ​ក៏ដោយ​ក៏​យើង​មាន​ជ័យជម្នះ​លើស​ពី​អ្នក​មាន​ជ័យជម្នះ​ទៅ​ទៀត​តាមរយៈ​ព្រះអង្គ​ដែល​ស្រលាញ់​យើង។ 38ដ្បិតខ្ញុំ​ជឿ​ជាក់​ថា​ទោះជា​សេចក្ដី​ស្លាប់​ក្ដី​ជីវិត​ក្ដី​ពួក​ទេវតា​ក្ដី​ពួក​អ្នក​គ្រប់គ្រង​ក្ដី​អ្វីៗ​នៅពេល​បច្ចុប្បន្ន​នេះ​ក្ដី​អ្វីៗ​នៅពេល​អនាគត​ក្ដី​អំណាច​នានា​ក្ដី 39កម្ពស់ក្ដី​ជម្រៅ​ក្ដី​ឬ​អ្វី​ណា​មួយ​ផ្សេង​ទៀត​ដែល​ព្រះជាម្ចាស់​បាន​បង្កើត​មក​ក្ដី​ក៏​មិន​អាច​បំបែក​យើង​ចេញ​ពី​សេចក្ដី​ស្រលាញ់​របស់​ព្រះជាម្ចាស់​នៅក្នុង​ព្រះ​គ្រិស្ដ​យេស៊ូ​ជា​ព្រះអម្ចាស់​របស់​យើង​បាន​ដែរ។
Copyright information for KhmKCB