1Ti 3 | KjhHMNT | STEP | Пу сын сӧс : тигірибнің устағҷызы поларына кӱстенгені чахсы тоғысха сабылғанын таныхтапча.

‏ 1 Timothy 3

Кем тигірибнең устап полар

1 Пу сын сӧс ^{▼▼Грек тілінде пу сӧстер алнында чоохталғаннаң палғалыстығ поларлар даа.}: тигірибнің устағҷызы поларына кӱстенгені чахсы тоғысха сабылғанын таныхтапча. 2 Че тигіриб устағҷызы арығ, ипчізіне киртістіг ^{▼▼Грек тілінде пу сӧстерні ӱс пасхали оңарарға чарир: 1) ипчізіне киртістіг, 2) чалғыс ипчізінің ирі, 3) пір ле ипчінің ирі.}, сах сағыстығ, пазымнығ, аарласха турыстығ, аалҷы кӧреечі, чахсы ӱгрет пілчеткен, 3 ізеечі нимес, холын пос салбас, тімелбес, чаптанмас, че амыр, тартыспас, ахчаа чабдыланмас поларға кирек. 4 Ол иб-чуртына пик ээзі ползын. Палалары чоох истеечі, кізілерні улуғлаачы ползыннар. 5 Пос ибінең устап полбинчатхан кізі, Худай тигірибінің чонын чахсы тут полар ба за? 6 Ол киртініске наа ла кіргеннердең дее полбазынох – улуғ кӧӧлінібізіп, Худайның чарғызына сайтаннаң пірге тартыл парбазын. 7 Киртіністі алынмааннарның даа аразында чахсы адал чӧрзін – тілге кір парып, сайтан сӧзірбезіне хаптыр салбазын.

Кем полысчы пол полар

8 Полысчы ^{▼▼Тигіриб тоғыстарында хайынчатхан кізілер, кӧр: «Худай илҷілерінің чуртастары» 6:1-6.} даа аарлатчатхан, сын чоохтығ, арағаа сабылбас, чаптанмас, 9 киртініс чазыдын арығ чӱректе тут полар кізілер поларға киректер. 10 Андағларны, пу тоғысха чарапчатса, нинҷе-де тус сыныхтирға, анаң на, чахсы тудынзалар, аларға кирек. 11 Ипчілері ^{▼▼Грек тілінде ідӧк «полысчы ипчілер» тіп оңнирға чарир.} дее аарласта ползыннар, хоп чайдырбас, сах сағыстығ, ноо даа нимеде киртістіг тудынзыннар. 12 Полысчы ипчізіне киртістіг ^{▼▼Кӧр: Тимофейге 1-ғы пічии 3:2.} поларға, палаларын даа, ибін дее чахсы устап парарға кирек. 13 Киректі чахсы апарғаннары чонның улуғ аарлазынаң тузаланарлар паза оларның Христос Иисусха киртіністері тыыдылар.

Пістің киртінізібістің чазыды

14 – 15 Мыны, тӱрчедең килеріме ізеніп, че сынап, тудыл парзам, тізең, сірерні Худай ибінде хайди тудынарын пілзіннер тіп пасчам. Ол иб – сын тіріг Худайның тигірибі. Ол тигіриб сын ӱгредігнің чӧлее паза тӧстее полча. 16 Ікінҷілес чох, пістің киртінізібістің илбек чазыды мындағ: Худай кізі ит-сӧӧгінде килген, Худай Худы Аны пір пырозы чох чарлаан. Ангеллер Аны кӧргеннер, Аннаңар чоннарға чоохталған. Тиксі-тилекейде Ағаа киртінгеннер. Худай сабланыснаң Аны ӧӧрлеткен.