‏

Пу пічік «Худай таллаан абахайға паза аның палаларына» тіп адал парған. Іди Христос тигірибі паза аның араласчылары чайыдып адал парғаннар. Пічіктің авторы Иоанн илҷі позын ах сағал тіп адапча. Анзы аның аарласнаң тузаланчатханын паза пічігін адап ысчатхан тигірибнің араласчыларының полғанының на ӱчӱн нандырығ тутчатханын кӧзітче.

Пастағы пічииндӧк чіли, Иоанн хығырығҷыларын сынға тудынып паза хынызып чуртирға ӱгретче. Ол ідӧк Иисус Христос толдыразынаң кізі полғанынаң чараспинчатхан чой ӱгредігдең китенерге сурынча.

‏ 2 John

1Мин, Ах сағал, Худай таллап алған Іҷее ▼

▼«Іҷе паза палалар» теени мында тигірибні паза Худайға киртінчеткеннерні таныхтапчалар.

паза аның палаларына чолабит ысчам. Мин сірерге сыннаң хынчам, мин не нимес, че Сынны пілчеткен прай кізілер сірерге хынчалар. 2Ол Сын пісте паза піснең хада хаҷан даа полар. 3Худай Пабадаң паза Хан-пигібіс Иисус Христостаң, Пабаның Оолғынаң, паарсас, ӧлҷей паза амыр хоных сірерге ползын. Прай пу нимелер сында даа, хыныста даа сірернең хада ползыннар.

4Синің палаларыңның аразында, Худай Пабаның піске пирген чахиин толдырып, сынға хынып чуртапчатханнарны тапханыма тың ӧрін парғам. 5Мин сағаа, Іҷее, наа чахығдаңар нимес, че піске пастабох пирілген иргі чахығдаңар пасчам. Сағам мин, прайзыбыс удур-тӧдір хынызааңар тіп, синнең сурынчам. 6– 7Хыныс, тізең, – Худайның чахығларын толдырары. Иисус Христостың кізі полып килгеніне киртінмин, чонны алаахтырчатханнар чойлар паза антихристтер прай чир ӱстӱне тарап парғаннар. Оларның тарап парғаннары ӱчӱн, Христосха киртініп пастаан тустох сірерге пирілген хыныстаңар чахығны толдырып, чуртирға кирексер.

8Ниме ӱчӱн тоғынғабыс, аны чідірбин, Худайның сыйиин прай алып алар ӱчӱн, постарыңны сиргек тудыныңар. 9Христостың ӱгредиин толдырбин, аны пос оңдайынҷа алыстырчатхан кізі Худайға киртінминче. Христостың ӱгредиин толдырчатхан кізіде, тізең, Паба даа, Оолғы даа пар. 10Піреезі, сірерзер киліп, пу ӱгредігні сірерге читірбезе, аны тураа кирбеңер, изеннеспеңер дее аннаң. 11Аннаң изеннесчеткен кізі аның иткен хомай киректерінде араласча нооза.

12Сірерге пасчаң кӧп нимелерім пар, че ол нимелерні чаҷында черниланаң тооза пазарға хынминчам. Ӧріністерің толдыра ползын тіп, сірерзер киліп, кӧстең кӧске чоохтазып аларыма ізенчем.

13Худай таллап алған пиҷеңнің палалары сағаа чолабит читірчелер. Аминь.