2Ti 1 | KjhHMNT | STEP | Павел, Христос Иисуста Худай молҷаан чуртасты чарлирға табылған кізі, Худай кӧңнінҷе Христос Иисустың илҷізі.

‏ 2 Timothy 1

Алғас

1 Павел, Христос Иисуста Худай молҷаан чуртасты чарлирға табылған кізі, Худай кӧңнінҷе Христос Иисустың илҷізі. 2 Тимофейге, хынған оолғына: Худай Пабадаң паза Хан-пигібіс Христос Иисустаң паарсас, ӧлҷей паза амыр хоных сағаа.

Чахсы Хабарға киртініс

3 Хараа-кӱнӧрте, пазырған сай синнеңер сыбыра сағынчам. Пурунғыларымнаң пасти, мин арығ кӧңнімнең салынчатхан Худайыма алғызым читірчем. 4 Синің харах чазың сағысха киріп, ӧрініске чидіп алар ӱчӱн, сағаа тоғазарым килче. 5 Лоида ууҷаңда даа, Евника іҷеңде дее полған киртіністі сағысха кирчеткенімнеңер, синде дее ол сын киртініс пар тіп, пір дее ікінҷілебинчем. 6 Аннаңар минің сағаа хол салғаным пастыра пирілген Худай сыйиин улам ӧделендірерге сині хатап сизіндірчем. 7 Худай піске хорығыс худын нимес, че кӱс, хыныс паза арығ сағыс худын пирген. 8 Аннаңар син Хан-пигібістеңер киречілестердең дее, миннең дее, Аның чабығдағы кізізінең, уйатпа. Че миннең хада, Худай пирген кӱзіңе тӧмене, Чахсы Хабарның ӱчӱн иреелестерні алын.

9 Худай пісті арачылаан нооза. Ол пістің киректерібіс хоостыра нимес, че Позының кӧңнінең пісті ах-арығ поларға хығыртхан. Ол аны Христос Иисустаң пастыра тус пасталар алнындох пирілген паарсазынаң иткен. 10 Ол паарсазы Арачылағҷыбыс Христос Иисус килгенінең киречілелче. Ол ӧлімні чох иткен паза Чахсы Хабар пастыра мӧгі чуртас чарлаан. 11 Чахсы Хабарны тарадар ӱчӱн, мин аның илҷізіне, паза чоннар ӱгретчізіне турғызылғам. 12 Аның сылтаанда мин пу иреені кӧрчем, че анзынаң уйатпинчам. Пілче ноомза, Кемге киртінчеткенімні паза тӱгенҷі кӱнге теере мағаа пиргенні ^{▼▼«Мағаа пиргенні» теенін грек тілінде «мин Ағаа пиргенні» тіп оңнирға чарир.} Аның хайраллир кӱзі парын. 13 Миннең искен пу сын ӱгредиимнең устан, Христос Иисуста пар киртініснең паза хыныснаң чурта. 14 Пісте чуртапчатхан Худай Худы пастыра піске пирілген чахсы нимені хайралла.

15 Син пілчезің, асийдегілер миннең хыйа полыбысханнар, ол санда Фигелл паза Ермоген. 16 – 17 Онисифор кӧп хати минің кӧңнім часхарған ӱчӱн, аның ибіне Худай ӧлҷей пирзін. Минің чабыға кіргенімнең ол уйатпаан. Римде полғанда, тізең, ол мині, матап тілеп, тапхан. 18 Тӱгенҷі кӱнінде Хан-пигібіс ағаа Хан Худайның ӧлҷейіне турыстығ поларға пирзін. Ефес саарда ол мағаа хайди полысханын син позың даа пілчезің.