‏

Ікінҷі пічииндӧк чіли, Иоанн илҷі позын олаңай ла, ах сағал тіп адапча. Пу пічікті ол Христос тигірибінің Гаий тіп аттығ араласчызына пасча. Ол аны хынызын читіргені ӱчӱн махтапча паза хайдағ-да Диотрафтың саба хылынчатханынаң китендірче.

‏ 3 John

1Мин, Ах сағал, сағаа, аарлығ Гаий, улуғ чолабит ысчам. Син сыннаң минің прай чӱреемнең хынчатхан кізімзің.

2Хынғаным! Синің худың хайдағ амыр-хазых, прай позың андағох чахсы паза амыр-хазых пол тіп, Худайдаң сурынчам. 3Харындастар, киліп, синің киртінізіңнеңер искіргеннер. Синің Сынға хынчатханыңнаңар паза аны толдырчатханыңнаңар истіп, мин уғаа ӧрін парғам. 4Мағаа палаларымның Сынға киртінчеткеннерінеңер истердең артых ӧрініс чоғыл.

5Хынғаным! Харындастарға, таныс нимес тее харындастарға, полызып, пістің киртініс ӱчӱн ізестіг хылынчазың. 6Харындастарыбыс синің хынызыңнаңар тигірибде киречілееннер. Оларны, Худай чӧпсінер иде чолға тимнеп, ӱдес салзаң, чахсы идерзің. 7Олар, Христосты сабландырар ӱчӱн, Худай пілбинчеткеннердең пір дее полызығ албин, чолға сыхханнар. 8Аннаңар піс, сыннаң оларнаң хада тоғынар ӱчӱн, андағ кізілерге полызарға кирекпіс.

9Мин тигіриб чонына пасхам, че пастых поларға хынчатхан Диотреф пістің сӧстерібіске хайығ салбинча. 10Аннаңар, килзем, пісті хомайлап, чабал иткенінеңер, прайзына, чазырбин, кӧні чоохтап пирербін. Ол пісті хомайлаанына даа тоспинча, харындастарны даа позына чағын кирбинче, пасхаларына даа чағын идерге пирбинче, чағын итчеткеннерні тигірибдең сығара сӱрче.

11Хынғаным! Хомай нимее кӧӧкпин, чахсы ниме ит. Чахсы ниме итчеткен кізі Худайни. Хомай ниме итчеткен кізі Худайны кӧрбеен. 12Димитрийдеңер прай чон даа, аның иткен киректері дее, чахсы киречілепчелер. Піс тее іди киречілепчебіс. Пістің киречілеенібістің сын полчатханын сірер дее пілчезер.

13Кӧп нимедеңер сағаа пазарҷыхпын, че черниланаң чаҷында пазарға хынминчам. 14Тӱрчедең сағаа тоғазып, кӧстең кӧске чоохтазып аларыма ізенчем.

15Амыр-хазых пол. Арғыстар даа сағаа чолабит читірчелер. Позыңның арғыстарыңа, полғанына ла, чолабит читір. Аминь.