‏ Hebrews 11

Киртініс ниме полчатханнаңар

1Киртініс – ол ізенген нименің хайди даа толарын ікінҷілебинчеткені паза кӧрінмес нимелернің сынында поларын чахсы пілчеткені полча. 2Пістің ӧбекелерібіс киртіністері ӱчӱн Худайның кӧңніне кіргеннер. 3Тиксі-тилекей Худайның сӧзі хоостыра пӱт парған. Анзын піс киртінізібіс пастыра ізестіг пілчебіс. Піс кӧрчеткен ниме харахха кӧрінмес нимедең пӱт парған. 4Авель Худайға киртінген. Аннаңар аның тайии Каиннинең артых полған. Авельнің киртінізін кӧріп, Худай аның арығ чӱректіг полчатханын киречілеен. Аннаңар Худай аның тайиин алған. Авель ӧл тее парған полза, аның киртінізі пӱӱнгі кӱнге теере піске кӧзідім полча.

5Енох Худайға киртінген. Ол, ӧлім кӧрбин, пу чирдең чіт чӧрібіскен. Пірдеезі аны таап полбаан. Аны Худай Позынзар ал парыбысхан. Че Худай Пічиинің киречілезі хоостыра, Худай аны Позынзар алғалахтох, Енох Худайның кӧңніне кірген полған. 6Киртінізі чох кізілернің пірдеезі Худайның кӧңніне кірбес. Худайзар килчеткен кізілер Аның парына паза Худайны тілепчеткеннер Ағаа сыйыхтадарларына ізенерге киректер.

7Ной Худайға киртінген. Худай хайдағ ниме поларын сизіндіргенде, Ной анзын пос хараанаң кӧргелек тее полза, Худайның чооғын истіп, керіп пӱдір салған. Ол керіпте позын паза сӧбірезін ал халған. Пу оңдайнаң Ной тилекейні чарғылаан. Ол, киртінгеннеңер, ахтатхан.

8 Авраам Худайға киртінген. Аннаңар Худай ағаа, позының чирін тастап, молҷаан чирзер парарға теенде, Худайның чооғын искен. Ол, хайдар даа парчатханын пілбин, чӧрібіскен. 9Худай молҷаан чирге киліп, ол анда пасха хан-чирінің кізізі чіли чуртаан. Че андағ даа полза, ол киртінген. Ол анда отахта чуртаан. Исаакнаң Иаков таа ідӧк чуртааннар. Оларға прайзына Худай молҷаа пирілген полған нооза. 10Авраам Худайның сағызы хоостыра паза Аның кӱзінең пӱткен пик тӧстегліг саар поларын сағаан.

11Сарра Худайға киртінген. Аннаңар ол, тӧл кӧрбес тее полған полза, позында пол парып, частығда пала таап алған. Ол Худай молҷаана киртінерге чарир тіп пілген. 12Аннаңар пала кӧрбес частығ Авраамнаң кӧп тӧл тараан. Аның тӧлі, тигірдегі чылтыстар, талай хазындағы хум осхас, кӧп саннығ полған. 13Піс чоохтапчатхан пу кізілер, Худайға киртініп ала, ӧл парғаннар. Олар Худай молҷаан нимені сахтап полбааннар. Молҷаан нимелерні ырахтын на кӧріп, ӧрінгеннер. Олар постарын пу чирге килген пасха чонмыс тіп санааннар. 14Іди сананчатхан кізілер чир-суғларын тілепчеткеннерін киречілепчелер. 15Тастап парыбызарға киліскен чирлерінеңер ле сағынған ползалар, олар андар айланарҷыхтар. 16Че олар артых, тигірдегі, чирні тілееннер. Аннаңар Худайға, олар Аны постарының Худайы тіп адапчатсалар, уйадыстығ нимес. Худай оларға саар тимнеп пирген нооза.

17Авраам Худайға киртінген. Худай, аны сыныхтап, Исаак оолғын тайыға салдыртханда, Авраам Аның чооғын толдырарға тимде полған. Худай Авраамға кӧп тӧл молҷаан, Авраам, тізең, чалғыс оолғын даа тайыға саларға тимде полған. 18Худай, тізең, ағаа піди теен полған: «Мин молҷаан тӧлің Исаактаң тарир». 19Авраам, Худайға киректелзе, Исаакты ӧліглердең тірілдір полар тіп сағынған. Аннаңар, пасхали чоохтаза, Исаак ағаа ӧліглердең нандыра пиріл парған.

20Исаак Худайға киртінген. Аннаңар ол, Иаковнаң Исавты алғап, килер тустарда кӧп ниме поларын молҷаан.

21Иаков Худайға киртінген. Аннаңар ӱрир алнында ол Иосифтің оолларының полғанын на алғабысхан. Ол, тайағына тіреніп, Худайға пазырған.

22Иосиф Худайға киртінген. Аннаңар ӱрир алнында, Израиль чоны Египеттең парыбызарын чоохтап, позының сӧӧгін хада апарыбызарға сурынған.

23 Моисейнің іҷе-пабазы Худайға киртінгеннер. Аннаңар аны тӧрееннең ӱс айға читіре чазырғаннар. Олар, аның пасхаҷыл пала полғанын кӧріп, ханның час палаларны ӧдірерге пирген чахиинаң хорыхпааннар. 24Моисей Худайға киртінген. Аннаңар ол, ӧс парғанда, позын фараон хызының палазы аданарға хынминыбысхан. 25Ол иртісчеткен чазыхтың тадиин алғанҷа, Худай чонынаң хада иреені кӧрерін таллап алған. 26Ол Христости осхас ирееленістерні Египеттің прай пайынаң артых тіп санаан. Ол Худайның пирер сыйиин кӧрген нооза. 27Моисей, ханның хазырланарынаң хорыхпин, киртінгені хоостыра Египеттең сығыбысхан. Кӧрінмес Худайны кӧрген чіли, нандыра айланмасха пик пӧгін салған. 28Киртінізі хоостыра Па́сха тіп адалчатхан кибір идіп, ізіктерні ханнаң таңмалап салған. Ӧлім ағылчатхан Ангел, ханны кӧр салып, Израильнің тун оол палаларын ӧдірбеен. 29Киртінізі хоостыра чонынаң хада, Хызыл талайның тӱбі азыл парғанда, хуруғ чирҷе кис парыбысхан. Сӱріс килген Египет чааҷылары, ідӧк кизерге идіп, талайда пат парғаннар.

30Израиль чоны Худайға киртінген. Аннаңар Иерихон саарның ханаларын читі хати ибірібізіп, оларның иңзеріл парғанын кӧр салған. 31Чӧреечі Раав Худайға киртін парған. Аннаңар ол китеге чӧрчеткен Израиль кізілерін амырнаң удурлаан паза аның соонаң киртінерге хынмаан кізілернең хада ӧдірт салбаан.

32Хоза пірее ниме чоохтирға кирек пе? Гедеоннаңар, Варактаңар, Самсоннаңар, Иеффайдаңар, Давидтеңер, Самуилдеңер паза ухаанҷылардаңар чоохтирға тус чоғыл. 33Олар Худайға киртінгеннер. Аннаңар хан-чирлерні чиңеннер, Худайның кӧңніне кірчеткен нимелер иткеннер паза Худай оларға молҷаан нимені алғаннар. Олар ала парыстарның аастарын чаба тутханнар, 34хазыр кӧйчеткен оттарны ӱзӱрібісчеңнер, хылыстаң ӧлерінең арачыланып алҷаңнар. Оларның кӱс чоғы кӱске айлан парҷаң. Олар кӱстіг полып, чаалазығларда пасха хан-чирлерінің сиріглерін утып алҷаңнар. 35Ипчілер Худайға киртін парып, ӧл парған туған-чағыннарын тіріг айландырып алҷаңнар. Пасхалары, постарын харибдең позыдарынаң тоғыр саап, ирееледіп, тоозылғаннар. Олар, артых чуртасха тірілдірерлеріне ізеніп, іди иткеннер. 36Паза пасхаларын, иреелеп, соғып, палғап, харибге одыртчаңнар. 37Оларны тастарнаң чоо чаалаҷаңнар, игееснең чара игеҷеңнер, иреелеҷеңнер, хылыснаң ӧдірҷеңнер. Олар истебеен хой, ӧскі теерізін кис чӧрҷеңнер, хызылҷаңнар, оларны сӱрҷеңнер, хыйыхтаҷаңнар. 38Пу тилекей андағ кізілерге турыстығ нимес. Олар хуу чазыларзар, тағларзар тизіп, кӧңдей хайаларда, оймахтарда чазынып чуртап чӧргеннер. 39Олар киртіністерін ізестіг киречілееннер. Че Худай молҷаан нимені оларға пирбеен. 40Худай піске хайдағ-да артых ниме пӧгін салған. Худай оларны, піс чох иң артығына чидіп албазыннар тіп, іди иткен.