‏

Иуда Иерусалимдегі Христос тигірибінің чонын устапчатхан Иаковтың туңмазы полча. (Олар ікізінең Иисус Христостың харындастары).

Позының пічиинде Иуда Христос тигіриблерінің чонын хайдағ ла полза чой ӱгретчілердең китендірче. Олар Христостың ӱгредиин саба чоохтап, сайбах хылынып, чуртааннар. Иуда Христос чонын Хан пиге киртістіг полып, иптіг тудынарға сурынча.

Иуданың пічии Петрның ікінҷі пічиине уғаа чағын. Че кем пурнада пасханы – Иуда алай Петр – тың на пілдістіг нимес. Хынза, олар ікізі дее, пічіктерін пасчатханда, ӱзінҷі пічікнең тузаланғаннар.

Иуда пірее кӧзідімнерні чоохтап, «апокрифтерге» кірчеткен пічіктерге сылтанчатханы хайығ тартча. «Апокриф» тіп грек тілбестеенде ле халған паза еврей пічіктеріне кірбеен пурунғы еврей кинделерін адапчалар. Христиан тигіриблерінің піреелері пу кинделернің хай піреезін постарының Библияларына кир салчалар.

‏ Jude

Алғас

1Иисус Христостың хулы Иаковтың харындазы Иуда пасча. Худай ах-арығ иткен, Иисус Христос хайраллапчатхан кізілерге пасчам. 2Ӧлҷей, амыр паза хыныс сірерге хозылып одырзын.

Чой ӱгретчілердеңер

3Хынғаннарым! Пістің прайзыбыстың пар арачыланызыбыстаңар пазарға иткен полғам. Че киртінізібісті хайраллир ӱчӱн, кӱрезерге кӧңнілеріңні кӧдірібізерге кирек полчатханын кӧр салдым. Пу киртіністі Худай хаҷан-да ах-арығларына пирген нооза. 4Худайны улуғлабинчатханнарның піреелері сірернің араңарға кіріп алғаннар. Олар постарының чӧреес оңдайларын Худайның паарсазынаң ахтапчалар паза пістің Ээбіс полчатхан Худайнаң Хан-пигібіс Иисус Христосты хыйа итчелер. Ол кізілернің чарғыладарларынаңар Худай Пічиинде хаҷанох пазылған полған.

5Сірер мыны пілчеткен дее ползар, мин аны сағыстарыңа хатап кирерім килче: Хан Худай Позының чонын, арачылап, Египеттең сығарған, анаң, тізең, киртініс чох полғаннарын чох ит салған. 6Худай пирген ӱлгӱдең артых ӱлгӱні аларға идіп, Худай кӧзіт пирген орынны тастап парыбысхан ангеллерні сағысха кирібізіңер. Худай оларны, оот полбас кинҷее пиктебізіп, харасхының тӱбіне тастабысхан. Анда олар Улуғ чарғы кӱнін сахтапчалар. 7Содомнаң Гоморраны паза оларнаң хости турған саарларны сағысха киріңер. Андағы чуртағҷыларның, пудурғы ангеллерниӧк чіли, оңдайлары ардап парған. Олар чӧреес паза ойнас хылыхтарына салын сыхханнар. Худай, пасхаларына кӧзідім идіп, оларны успас отха тастаан. 8Пу сын нимес азых чоохтарға сабыл парыбысхан кізілернең ідӧк полар. Олар ит-ханнарын ардатчалар, Худай ӱлгӱзіне тоғырланчалар паза ӧӧркі пастыхтарны сӧклепчелер. 9Ӧӧн ангел Михаил дее, Моисейнің сӧӧгін кем аларынаңар сайтаннаң таласчатханда, іди полбаан, аны чабал сӧстернең пыролабаан. «Худай сині чарғылабыссын» тіп чоохтан салған. 10Пу кізілер постары пілбинчеткен нимені хырысчалар. Аңнар чіли, нимені пілінмин итчелер, пос постарын чох иттірерлеріне ағылчалар. 11Чобағ оларға тӱссін. Олар Каиннің чолынҷа парчалар нооза. Ахчаох ӱчӱн, Валаам чіли, алҷаас итчелер. Корей чіли удурласчалар, олох чіли, ӧл парарлар. 12Сірер хада азыранчатхан чыылығларда олар суғ алтындағы хайалар осхас хорғыстығлар. Чоо сабыныбызарға ӱр нимес. Олар чил сӱр чӧрген, наңмырлары чох пулуттарға, кӱскӱде дее чистек пирбинчеткен, чирдең ходырыл парған ағастарға тӧӧйлер – тірілбеске ӧліглер. 13Оларның уйадыстығ киректері, хазыр талай салғағының ӱстӱнде чайхалчатхан кӧбігі чіли, харахха іле кӧрінчелер. Олар орыннарын тастаан чылтыстар. Худай андағ чылтыстарға харасхының тӱбінде хаҷанға даа орын тимнеп салған. 14Адамның соондағы читінҷі уйазынаң сыххан Енох пу кізілердеңер піди ухаанҷылаан: «Тӱбен саннығ ах-арығ ангеллерінең хада Худай килер. 15Ол прайзын чарғылир. Ол Позынаң тоғыр иткен киректернің паза чазых иткен кізілернің хомай сӧстерінің ӱчӱн, хатығласха прайларын чарғылап салар». 16Андағ кізілер хаҷан даа чӧпсееренмин чӧріп, удур-тӧдір пыролазадырлар. Олар хан ойназына тартыл чӧрібісчелер, кӧкеесімненізіп, махтанысчалар, пос тузазын на сағынып, чойырхап чӧрчелер.

Сизіндіргені паза ӱгреде чоохтааны

17Хынғаннарым! Хан-пигібіс Иисус Христостың илҷілері алында чоохтаан чоохтарын ундубаңар. 18Олар сірерге піди теен полғаннар: тӱгенҷі тус чит килзе, сірерні сӧклепчеткен, чабал хынығыстарына тартылчатхан кізілер сығызарлар. 19Ол кізілер чонны ыырластырчалар. Постарының на кӧңнілерін пілчелер. Олар Худай Худы чохтар. 20Хынғаннарым! Пістің ах-арығ киртінізібісте пик турыңар, Худай Худы чоохтаан нимедеңер пазырыңар. 21Худай хынызы сірерні толдырар иде чуртаңар. Іди чуртап, Хан-пигібіс Иисус Христостың, сірерні айап, мӧгі чуртас сірерге пирерін сағыңар. 22Хомай иткен кізілерге айаңар, че оларның киректерін чарғылаңар. 23Пасхаларын, чазых итчеткеннері ӱчӱн хорығып, арачылаңар. Чалыннығ оттаң оларны сығара тартыңар, че чазых кірлеен кип-азахтарына теңерге дее хорығыңар.

Прай сабланыс Худайға

24Сірерні киртіністең хыйа парыбызарынаң арачылапчатхан паза Позының сабланызына сірерні ӧріністіг, пір чазых чох ағыл полар Худайны сабландырыңар. 25Прайзынаң хыйға Чалғыс Худайыбысха, Иисус Христос Хан-пигібістең пастыра пісті арачылапчатхан Худайыбысха сабланыс ползын. Ол илбек. Пастағызынаң ала хаҷанға даа Аның кӱзі паза ӱлгӱзі пар. Аминь.