‏ Luke 5

Zɛzi abɔnɔ bayokwɛ beji ba boho

1Ibwate buya, Zɛzi ajasa o popoko ya itaba ja Zenezalɛti. Ya lupu ja bato jakuba ango kangakanga, iyokaka iyɔkɔ ja Zambe. 2Ya ango ayɛnɛ bembongo beba o ibongo ja itaba. Banganga ba zowa bahulasa o bembongo byɛ, bajasa ijɛlɛcɛ kundanda o bakɔ bango. 3Okate, Zɛzi te ahakama ukwa iyate embongo. Embongo mɛnɛ yajasa ya Simɔn. Ya ango ahimwa ango te: «Pamaka na ibongo.» Na ango ihula hinsi ukwa embongo na ihɛlɛcɛ lupu iyɔkɔ ja Zambe. 4Usya ya ango ahijɛsɛ bosɔhokɔ, ya ango asɔhɔ na Simɔn te: «Hizɛcɛ embongo bya lebebe ya mbɔku, usɛ byenanjɛcɛ bakɔ na ibandaka bafɛ.» 5Ya simɔn ahungwɛ neji te: «Lɔnji, bɛhɛ besomba na epundu ya ntula teka banda na fɛ. Nde na bosina bwa omutanda mɛ mabinanjɛcɛ bakɔ.» 6Okate, bango te bananjɛ bakɔ, na ibandaka bafɛ buce, bakɔ bahakasa inyawanaka na bojilo bwa bafɛ. 7Ya bango balejɛ bana nyangwɛ bajasa o iyate embongo iyaka inyamwaka bango, ya bango te baya, na ilozɛcɛ bembongo byahajɛ beba humɔn, byaya kuni lɔbwe. 8Usya Simɔn ayɛnɛ nɛ, ahuma mabɔngɔ o boho bwa Zɛzi na isɔhɔkɔ te: «Ku wa mɛ, pamaka na namɛ bosina te majɛ moto wamesɛmbɛ.» 9Simɔn na ba bango ango bajasa, bɔngɔ te bwa banda bango, na bosina bwa njanga mwa bafɛ mwa bango abandasa. 10Na bana ba Zebede, Zak na Za, baji bana nyangwɛ ba Simɔn bayɛnɛsɛ yuwa mɛnɛ. Zɛzi asɔhɔ na Simɔn te: «Teka lɔngɔ, ijaka na ijaka, nsombu mo maka beka, hɛbɛ minɛ mwa bafɛ, nde mwa ibandaka bato.» 11Bango te bahunwana na bembongo bya ibongo na isɛmɛcɛ, na ijikaka bemba byɛ byahajɛ ya bango ahinjɛ Zɛzi.

Zɛzi ahaka moto wa bejima

12Usya Zɛzi ajasa o iyate eposi ya njɛnja mɔngɔ ya Ngalile, ndomana apwa okate, nyɔlɔlɔ na bejima, usya ya ango ayɛnɛ Zɛzi, afa nyo o boho bweji, molo na hehe na ibɔndɔkɔ te: «Ku wa mɛ wɛnɛ o nɔnɔ o nyeni yonjɛ mɛ.» 13Zɛzi asambɛ obɔ na ibandaka ango, ya ango asɔhɔ na neji te: «Menɔnɔ! Yongaka.» Ibu jɛkɔ bejima byamanyan moto wɛ o nyo. 14Zɛzi awɛ moto mɛnɛ nceko te: «Teka citanda na moto, lwako hɛlɛcɛ nyo na we mwa bebuwa. Ete owɛ ebuwa nda nceko mwa Moyizi akwɛlɛsɛ, ihɛlɛcɛ bato te oyonga.» 15Kuma ya Zɛzi yalandakasa buce. Lupu ja bato jasɔnɔkɔsɔ iyokaka ango, na iyonjɛcɛ bango na bembanganya byango. 16Nde, Zɛzi adambwakasa nyo usya teka bato, ilwaka ibɔndɔngɔkɔ.

Zɛzi ayonjɛ ekata

17Ibwate buya, Zezi ajasa ihɛlɛcɛ iyɔkɔ ja Zambe, bazufi bafalizɛ na melɔnji mya ceko mwa Zambe, bajasa mehinsi okuna eji, ba yengasa bya mamboka mahajɛ ma njenja mɔngɔ ya Ngalile, Zude na eposi ya Zelizalɛmi. Tuma ya Zambe yajasa neji iyonjɛcɛ membɛlu. 18Bato te baya na ekata ukwa ebungu, bahakasa ikweyaka neji okatwa Elongwɛ o boho bwa Zezi. 19Nde, bango teka peko ya ikweyaka, na bosina bwa lupu ja bato, ya bango ba beta ukwa mwaza, batuba ipoko, na ihulɛcɛ mbɛlu o katwa Elongwɛ nebungu o lebebe ya bato na o boho bwa Zezi. 20Usya ya ango ayɛnɛsɛ ibukwe ja bango, ya Zezi asɔhɔ na mbɛlu te: «meyɛnɛ cɛyi mesɛmbɛ myɔbɛ.» 21Melɔnji mya ceko mwa Zambe na ba Falizɛ batemanga na isɔhɔkɔ te: «Mutɛ janga mwa moto mwa wɛlɛ Zambe beza? Aji na pizo ya iyɛnɛce cɛyi ya mesɛmbɛ hɛbɛ Zambe amɛnɛ?» 22Zɛzi ayebakasa matemange ma bango, ya ango asɔhɔ na bango te: «Sina ya byatemanga o melema mya bihi nɛbende? 23Ya byayɛnɛ ngambala nde isɔhɔkɔ te beyɛnɛ cɛyi ya mesɛmbɛ myɔbɛ ka te tombɛcɛ ebungu ɔbɛ ete olwa? 24Bosina bihi byeyebaka te, Mwana moto aji na pizo o hehe tɛ iyɛnɛcɛ cɛyi ya mesɛmbɛ.» Ya ango asɔhɔ na ekata te: «Matanda ɔbɛ yemwaka! Tombɛcɛ ebungu ɔbɛ ete olwa bya itona jɔbɛ!» 25Ibu jɛkɔ, moto wɛ te ayemwa o boho bwa ango atombɛ ebungu eji ya ango ajakasa na ilwaka bya itona jeji alwa kumɛ Zambe. 26Moto wahajɛ ayecɛ, na ikumɛcɛ Zambe. bahajɛ bajasa na bɔngɔ buce na isɔhɔko te «Bɛhɛ beyɛnɛ mwɛnhɛ bemba bya bondonga.»

Zɛzi abanga Levi

27O mbiya mɛnɛ, Zɛzi apwa na iyɛnɛcɛ nkwe mwa bokula, mwa jinɔ te Levi, hinsi usya ya ango ajazakasa, ya ango asɔhɔ neji te: «Hinjɛcɛ imɛ.» 28Levi te ajika bemba bweji byahajɛ ayemwa na ihinjɛcɛ Zɛzi. 29O nyate mɛnɛ Levi abeka te Zɛzi maja buce bya Elongwɛ eji, yajasa na bankwe babokula buce, na ibate bayasa ijaka bango ango. 30Ba Falizɛ na melɔnji mya ceko mwa Zambe, bajasa bango ango, bakakwakasa ango, na isɔhɔkɔ na bayokwɛ ba Zɛzi te: «Ya byaja na iwanka bina bakwe babokula na bato bamesɛmbɛ nde?» 31Zɛzi ahungwɛ na bango te: «Bato baji na manyo ma mbɛ, bahake moto ehakaka bango, nde, baponga bango bahaka moto ehakaka bango. 32Mata ya ibangaka bato hongololo, nde mamuya bosina bwa bato bamesɛmbɛ, bosina bwa bango behongɛcɛ bejemi byango.»

Zɛzi asɔhɔ jambo ja ikaci

33Ba Falizɛ basɔhɔ na Zɛzi te: «Bayokwɛ ba Za, bango bebeka ikaci na membɔndu, na bayokwɛ baho bango bebeka yumɛnɛ, nde ibɔbɛ baja, na iwanka.» 34Ahujɛ na bango te: «Byambici loma bato bamuya o elɛsi yaboba ibekaka ikaci, amubana aka bango ango? 35Nde elɔmɔ ya ango aya, usya amubana emanyaka, isi mɛnɛ ya bango bebekaka ikaci.» 36Ya ango ahunwana bolukwaka iyate ekaneni ya te: «Teka moto enyeni yuwa eluku ya kanda ya ihɛnwu na ilataka na mwa eputa, na bosina te kanda mwihɛnwu mwenyawanka, okate kanda mwihɛnwu mwa kusi hangwe na mwaka. 37Teka na moto enyeni howa maku ma ihɛnwu o mambongo maka, bosina te maku ma ihɛnwu ma toko pota mambongo maka, ete maku mehoyaka na mbongo ihemanaka. 38Himama! Maku ma ihɛnwu bahujɛ o mambongo ma ihɛnwu. 39Nde, awan maku maka, mwahake minɛ iwanka mihɛnwu, okate asɔhɔ te maku maka mango ma mbɛ.»