‏ 1 Chronicles 12

1ဒီးအအံၤမ့ၢ်ပှၤလၢအဟဲဆူစီၤဒၤဝံးအအိၣ်လၢစံကလးအပူၤလၢအအိၣ်တဒၢဒီးစီၤကံၣ်အဖိခွါစီၤစီလူးအမဲာ်အဖၢမုၢ်,ဒီးမ့ၢ်ဝဲလၢပှၤအဆူၣ်အကျါ,ပှၤမၤစၢၤတၢ်ဒုးတၢ်ယၤလီၤ. 2လၢပှၤဘံၣ်ယၤမံၣ်ဖိအကျါလၢစီၤစီလူးအဒီပုၢ်ဝဲၢ်အကျါန့ၣ်ပှၤအိၣ်ဝဲဒီးချံၣ်ဧိၤပျၢ်ဧိၤ,လၢစုထွဲမ့ၢ်ဂ့ၤ,လၢစုစ့ၣ်မ့ၢ်ဂ့ၤ,ခးလၢၢ်ဒီးပျၢ်လၢချံၣ်သ့လီၤ.

3တၢ်အခိၣ်မ့ၢ်စီၤအဃံၤဧ့စ့ၢ်ဒီးစီၤယိၤအၣ်,ပှၤကံဘဧးဖိစီၤၡမၤအဖိခွါတဖၣ်,ဒီးစီၤယံးစအ့လဲးဒီးစီၤပ့လး,စီၤဧၤစမၤဝ့းအဖိခွါတဖၣ်,ဒီးစီၤဘရၤကၤဒီးပှၤဧၤနသိးဖိစီၤယ့ၤဟူ, 4ဒီးပှၤကံးဘိၣ်ဖိစီၤယံးၡမၤယၤ,ပှၤအဆူၣ်လၢပှၤသၢဆံအကျါတဂၤ,ဒီးလၢပှၤသၢဆံအဖီခိၣ်လီၤ.ဒီးစီၤယံးရမံယၤဒီးစီၤယၤဃစအ့လး,ဒီးစီၤယိဃၤနၣ်ဒီးပှၤကဒ့ရၤသးဖိစီၤယိၤစၤဘး, 5စီၤအလူစဲၤ,ဒီးစီၤယရံမိး,ဒီးစီၤဘလံယၤ,ဒီးစီၤၡမၤရယၤ,ဒီးပှၤဃရူဖးဖိစီၤၡဖးတယၤ, 6ပှၤကိၤရးဖိတဖၣ်ဒီးစီၤအ့လကါနၤ,ဒီးစီၤယၡံယၤ,ဒီးစီၤဧၤစရ့လး,ဒီးစီၤယိၤဧ့စ့ၢ်,ဒီးစီၤယၤၡဘၣ်, 7ဒီးစီၤယရိဃၣ်လၢကဒိၢ်အဖိခွါစီၤယိၤဧ့လး,ဒီးစီၤစဘၤဒံယၤန့ၣ်လီၤ.

8ဒီးလၢပှၤကးဖိအကျါန့ၣ်ပှၤနီၤဖးလီၤအသးလၢစီၤဒၤဝံးအဂီၢ်ဆူတိာ်လၢပှၢ်လၢ်ကျါ,ပှၤအဆူၣ်,ပှၤသုးဖိ,ပှၤလၢအလဲၤဒုးသုး,ပှၤကတဲာ်ကတီၤဝဲဒီးကတီၤဖးဒိၣ်,ဒီးကတီၤဖိ,ပှၤလၢအမဲာ်မ့ၢ်ခ့ယုၢ်အမဲာ်,ဒီးလဲၤတၢ်ချ့ဒ်တၤဟိစဘံလၢကစၢၢ်လိၤအသိးန့ၣ်, 9စီၤဧ့စ့ၢ်အခီၣ်ထံးတဂၤ,စီၤဧိၤဘါဒယၤခံဂၤတဂၤ,စီၤအလံအာ်သၢဂၤတဂၤ, 10စီၤမံးၡမနၤလွံၢ်ဂၤတဂၤ,စီၤယံးရမံယၤယဲၢ်ဂၤတဂၤ, 11စီၤဧၤတဲဃုဂၤတဂၤ,စီၤအလံၤအ့လးနွံဂၤတဂၤ, 12စီၤထိဃၤနၣ်ဃိးဂၤတဂၤ,စီၤအ့လစၤဘးခွံဂၤတဂၤ, 13စီၤယံးရမံယၤဆံဆဲၣ်ဂၤတဂၤ,စီၤမၤကဘၤနဲတဆံတဂၤလီၤ.

14အဝဲသ့ၣ်တဖၣ်န့ၣ်အိၣ်ဝဲလၢပှၤကးဖိအကျါ,ပှၤသုးမုၢ်အခိၣ်တဖၣ်လီၤ.ပှၤလၢအဆံးကတၢၢ်အကျါတဂၤန့ၣ်အိၣ်ဝဲလၢပှၤတကယၤအဖီခိၣ်,ဒီးပှၤအဒိၣ်တဂၤန့ၣ်အိၣ်ဝဲလၢပှၤတကထိအဖီခိၣ်လီၤ.

15အဝဲသ့ၣ်တဖၣ်န့ၣ်မ့ၢ်ပှၤလၢအခီဂာ်ယၢ်ဒ့ၣ်လၢလါအခီၣ်ထံးတဘ့ၣ်လၢအထံလီၤဘျၢအနံၤခဲလၢာ်အဖၢမုၢ်,ဒီးဒုးဃ့ၢ်ထီၣ်ကွံာ်ပှၤလၢတၢ်ပၢၤခိၣ်လၢမုၢ်ထီၣ်တခီ,ဒီးလၢမုၢ်နုာ်တခီလီၤ.

16ဒီးပှၤလၢဘံၣ်ယၤမံၣ်ဖိအကျါ,ဒီးပှၤလၢယူဒၤဖိအကျါတဖၣ်ဟဲဝဲဆူစီၤဒၤဝံးအအိၣ်လၢတိာ်ပူၤလီၤ.

17ဒီးစီၤဒၤဝံးလဲၤသဂၢၢ်ထီၣ်အီၤဒီးကတိၤတၢ်ဒီးစံးဘၣ်အီၤ,သုမ့ၢ်ဟဲဒီးတၢ်ဃူတၢ်ဖိးဆူယအိၣ်ဒ်သိးသုကမၤစၢၤယၤဒီး,ယသးကအိၣ်ဒီးသုသးတဖျၢၣ်ဃီလီၤ.မ့မ့ၢ်သုမ့ၢ်ဟဲဒ်သိးသုကဟ့ၣ်လီၤကွံာ်ယၤလၢယဒုၣ်ယဒါအစုပူၤဒီး,မ့ၢ်တၢ်မၤကမၣ်တၢ်တအိၣ်ဘၣ်လၢယစုပူၤဒီး,မ်ပပၢ်အကစၢ်တဂၤကွၢ်လီၤဒီးသိၣ်ဃီၣ်တၢ်တက့ၢ်.

18ဒီးသးန့ၣ်လီၤဘၣ်ပှၤသၢဆံအခိၣ်စီၤဧၤမၤစဲ,ဒီးစံးဝဲဒၣ်,ပမ့ၢ်နတၢ်,စီၤဒၤဝံးဧၢ,ဒီးပအိၣ်ဒီးနၤ,စီၤယံးၡဲအဖိခွါဧၢ,မ်တၢ်အမုာ်တၢ်အမုာ်အိၣ်ဒီးနၤ,ဒီးတၢ်အမုာ်အိၣ်ဒီးပှၤလၢအမၤစၢၤနၤတဖၣ်တက့ၢ်.အဂ့ၢ်ဒ်အံၤ,နကစၢ်မၤစၢၤနၤလီၤ.ဒီးစီၤဒၤဝံးတူၢ်လိာ်အီၤ,ဒီးပာ်အီၤလၢပှၤအဖုတဖၣ်လီၤ.

19ဒီးဖဲအလဲၤဒီးပှၤဖလ့ၡသးဖိထီဒါစီၤစီလူးဒ်သိးအကဒုးတၢ်ဒီး,ပှၤလၢမနၤရှ့ၤဖိအကျါတဖၣ်လီၤဘၣ်ဆူစီၤဒၤဝံးအအိၣ်တခီလီၤ.မ့မ့ၢ်တမၤစၢၤဘၣ်ဝဲဘၣ်.အဂ့ၢ်ဒ်အံၤ,ပှၤဖလ့ၡသးဖိအပဒိၣ်တဖၣ်ကူၣ်လိာ်အသး,ဒီးပျၢ်အီၤ,ဒီးစံးဝဲဒၣ်,ကလီၤဘၣ်ဆူအကစၢ်စီၤစီလူးတခီလၢတၢ်ထီဒါပခိၣ်အဂီၢ်လီၤ.

20တုၤအလဲၤဝဲဆူစံကလးဒီး,ပှၤလီၤဘၣ်ဆူအအိၣ်လၢမနၤရှ့ၤဖိအကျါစီၤဧၤဒနၤ,ဒီးစီၤယိၤစၤဘး,ဒီးစီၤယဒံၤဧ့လး,ဒီးစီၤမံၤက့လး,ဒီးစီၤယိၤစဘး,ဒီးစီၤအလံဟူၤ,ဒီးစီၤစံးလသဲ,ပှၤတကထိအခိၣ်တဖၣ်လၢမနၤရှ့ၤဖိအကျါလီၤ.

21အဝဲသ့ၣ်တဖၣ်န့ၣ်မၤစၢၤစီၤဒၤဝံးထီဒါပှၤတဖုလီၤ.အဂ့ၢ်ဒ်အံၤ,မ့ၢ်ဝဲလၢပှၤသုးဖိအဆူၣ်,ဒီးပှၤသုးမုၢ်အခိၣ်တဖၣ်လီၤ.

22အဂ့ၢ်ဒ်အံၤ,အကတီၢ်ဖဲန့ၣ်တနံၤဘၣ်တနံၤပှၤဟဲမၤစၢၤစီၤဒၤဝံးတုၤအကဲထီၣ်ပှၤသုးမုၢ်ဖးဒိၣ်ဒ်ယွၤအသုးမုၢ်အသိးန့ၣ်လီၤ.

23ဒီးပှၤအဖုတဖၣ်အတၢ်ဂံၢ်လၢအကတဲာ်ကတီၤအသးလၢဒုးတၢ်အဂီၢ်အိၣ်ဒီးအစုကဝဲၤလၢအဟဲဝဲဆူစီၤဒၤဝံးအအိၣ်လၢဃ့ဘြိၣ်အပူၤ,ဒ်သိးအကဘိးဃၣ်စီၤစီလူးအဘီမုၢ်ဆူအအိၣ်,ဒ်ယွၤအကလုၢ်ကထါအသိးန့ၣ်မ့ၢ်အအံၤ, 24ပှၤယူဒၤဖိလၢအစိာ်ကတီၤဒီးဘီအိၣ်ဝဲဃုကထိဒီးဃိးကယၤကတဲာ်ကတီၤအသးလၢဒုးသုးအဂီၢ်လီၤ.

25လၢပှၤစူၤမ့းအိၣ်ဖိအကျါန့ၣ်ပှၤအဒိၣ်အဆူၣ်လၢတၢ်ဒုးသုးအဂီၢ်,နွံကထိတကယၤလီၤ.

26လၢပှၤလ့ၤဝံဖိအကျါန့ၣ်ပှၤလွံၢ်ကထိဃုကယၤလီၤ. 27ဒီးစီၤယဟိၤယဒါမ့ၢ်ပှၤအၤဟရိၣ်ဖိအခိၣ်,ဒီးပှၤသၢကထိနွံကယၤအိၣ်ဝဲဒီးအီၤ, 28ဒီးပှၤဖိၣ်သၣ်ခွါစီၤစၤဒိးပှၤအဒိၣ်အဆူၣ်,ဒီးပှၤလၢအပၢ်ဟံၣ်ဖိအကျါန့ၣ်ပှၤအခိၣ်ခံဆံခံဂၤလီၤ.

29ဒီးလၢပှၤဘံၣ်ယၤမံၣ်ဖိအကျါန့ၣ်စီၤစီလူးအဒီပုၢ်ဝဲၢ်,ပှၤသၢကထိလီၤ.အဂ့ၢ်ဒ်အံၤတုၤလီၤအခါဖဲန့ၣ်ပှၤအါတက့ၢ်လၢအကျါန့ၣ်မၤတၢ်ဘၣ်ဃးဒီးစီၤစီလူးအပှၤဟံၣ်ဖိလီၤ.

30ဒီးလၢပှၤအ့ဖရဲၣ်ဖိအကျါ,ပှၤခံကလးဃိးကယၤ,ပှၤအဒိၣ်အဆူၣ်ပှၤလၢအမံၤဟူထီသါလီၤလၢအပၢ်ဟံၣ်ဖိအကျါလီၤ.

31ဒီးလၢမနၤရှ့ၤတခီဒူၣ်အကျါန့ၣ်ပှၤတကလးဃိးကထိလၢအမံၤဂံၢ်အသးဒ်သိးအကဟဲပာ်စီၤဒၤဝံးလၢစီၤပၤလီၤ.

32ဒီးလၢပှၤယံးစၣ်ကၢ်ဖိအကျါန့ၣ်ပှၤလၢအနၢ်ပၢၢ်တၢ်အဆၢအကတီၢ်တဖၣ်အဂ့ၢ်အကျိၤတုၤအသ့ၣ်ညါအံၣ်စရ့လးဘၣ်မၤဒ်လဲၣ်ဒ်လဲၣ်န့ၣ်,ပှၤအခိၣ်တဖၣ်မ့ၢ်ခံကယၤ,ဒီးအဒီပုၢ်ဝဲၢ်ခဲလၢာ်စူၢ်အကလုၢ်လီၤ.

33လၢပှၤစဘူလိၣ်ဖိအကျါန့ၣ်ပှၤလၢအလဲၤဒုးသုးကတဲာ်ကတီၤအသးလၢဒုးတၢ်အဂီၢ်,အိၣ်ဝဲဒီးဒုးတၢ်အစုကဝဲၤခဲလၢာ်တဖၣ်န့ၣ်အိၣ်ဝဲပှၤယဲၢ်ကလးလီၤ.ဒီးကတဲာ်ကတီၤဝဲတၢ်ဒုးသုး,ဒီးအသးအိၣ်ခံဖျၢၣ်န့ၣ်တမ့ၢ်ဘၣ်.

34ဒီးလၢပှၤနးသၤလံဖိအကျါ,ပှၤသုးဖိအခိၣ်တကထိ,ဒီးပှၤအိၣ်ဒီးအီၤအိၣ်ဝဲဒီးကတီၤဒီးဘီ,သၢကလးနွံကထိလီၤ.

35ဒီးလၢပှၤဒၣ်ဖိအကျါ,ပှၤကတဲာ်ကတီၤအသးလၢဒုးတၢ်အဂီၢ်,အိၣ်ခံကလးဃိးကထိဃုကယၤလီၤ.

36ဒီးလၢပှၤအၤရှ့ၢ်ဖိအကျါ,ပှၤလၢအလဲၤဒုးသုး,ကတဲာ်ကတီၤအသးလၢဒုးတၢ်အဂီၢ်အိၣ်လွံၢ်ကလးလီၤ.

37ဒီးလၢယၢ်ဒ့ၣ်ဝၢ်ဘးခီန့ၣ်လၢပှၤရူၤဘ့ၣ်ဖိဒီးပှၤကးဖိအကျါ,ဒီးလၢပှၤမနၤရှ့ၤဖိတခီဒူၣ်အကျါ,ပှၤအိၣ်ဝဲဒီးတၢ်အစုကဝဲၤဘၣ်ဃးဒီးတၢ်ဒုးသုးခဲလၢာ်တဖၣ်,အိၣ်တကလီၤခံကလးလီၤ.

38ဒီးပှၤသုးဖိလၢအကတဲာ်ကတီၤအသးခဲလၢာ်န့ၣ်ဟဲဝဲလၢအသးဒီဖျၢၣ်ဆူဃ့ဘြိၣ်,ဒ်သိးအကပာ်ထီၣ်စီၤဒၤဝံးလၢစီၤပၤလၢအံၣ်စရ့လးအဖီခိၣ်,ဒီးအံၣ်စရ့လးလၢအအိၣ်လီၤတဲာ်ခဲလၢာ်န့ၣ်အိၣ်ဝဲလၢအသးတဖျၢၣ်ဃီဒ်သိးအကပာ်ထီၣ်စီၤဒၤဝံးလၢစီၤပၤလီၤ.

39ဒီးအိၣ်ဝဲဒီးစီၤဒၤဝံးသၢနံၤ,ဒီးအီၣ်တၢ်,ဒီးအီတၢ်လီၤ.အဂ့ၢ်ဒ်အံၤ,အဒီပုၢ်ဝဲၢ်ကတဲာ်ကတီၤတၢ်လၢအဂီၢ်လီၤ. 40ဒီးပှၤလၢအအိၣ်ဝဲလၢအဃၢၤစ့ၢ်ကီးပၢၢ်လၢယံးစၣ်ကၢ်,ဒီးစဘူလိၣ်,ဒီးနးသၤလံန့ၣ်ဟဲစိာ်ကိၣ်လၢကသ့ၣ်ယီၤအလိၤ,ဒီးလၢကီၤလၤအူးအလိၤ,ဒီးလၢကသ့ၣ်လၤအလိၤ,ဒီးလၢဂီၤဖံးအလိၤ,ဒီးစိာ်တၢ်အီၣ်,ဒီးကိၣ်ကမူၣ်,ချၢၣ်ဒၢသၣ်ပာ်ဖှိၣ်ဃ့အဘ့ၣ်ဘၣ်တဖၣ်,ဒီးစပံးသၣ်အဃ့အကူၤတဖၣ်,ဒီးစပံးထံ,ဒီးသိ,ဒီးဂီၤဖံး,ဒီးသိအါအါကလဲာ်လီၤ.အဂ့ၢ်ဒ်အံၤ,တၢ်သူၣ်ခုသးခုအိၣ်ဝဲလၢအံၣ်စရ့လးအပူၤလီၤ.