1 Chronicles 19
1ဒီးတၢ်န့ၣ်အလီၢ်ခံတၢ်မၤအသးလၢပှၤဧၣ်မိၣ်ဖိအစီၤပၤနၤဃၣ်သံဝဲ,ဒီးအဖိခွါကဲထီၣ်စီၤပၤလၢအလီၢ်လီၤ. 2ဒီးစီၤဒၤဝံးစံးဝဲဒၣ်,ယကမၤဘျုးမၤဖှိၣ်စီၤနၤဃၣ်အဖိခွါစီၤဃၤနူၣ်လီၤ.အဂ့ၢ်ဒ်အံၤ,အပၢ်မၤဘျုးမၤဖှိၣ်ယၤလီၤ.ဒီးစီၤဒၤဝံးမၢကလူးတဖၣ်လဲၤမၤမုာ်ထီၣ်က့ၤအီၤလၢအပၢ်အဃိလီၤ.ဒီးစီၤဒၤဝံးအခ့အပှၤဟဲနုာ်လၢပှၤဧၣ်မိၣ်ဖိအကီၢ်ဆူစီၤဃၤနူၣ်အအိၣ်,ဒ်သိးအကမၤမုာ်ထီၣ်က့ၤအီၤလီၤ. 3ဒီးပှၤဧၣ်မိၣ်ဖိအခိၣ်တဖၣ်စံးလၢစီၤဃၤနူၣ်,မ့ၢ်စီၤဒၤဝံးမၢပှၤမၤမုာ်ထီၣ်က့ၤတၢ်တဖၣ်ဆူနအိၣ်သတးဒီး,မၤလၤမၤကပီၤနပၢ်လၢနမဲာ်န့ၣ်နဆိကမိၣ်စ့ၢ်ကီးဧါ.အခ့အပှၤဟဲဆူနအိၣ်ဒ်သိးအကဃုတၢ်,ဒီးမၤကဒံကဒါတၢ်,ဒီးကွၢ်ဟုၣ်ထံဧိၤကီၢ်ဧိၤ,တမ့ၢ်ဘၣ်ဧါ. 4ဒီးစီၤဃၤနူၣ်ဟံးန့ၢ်စီၤဒၤဝံးအခ့အပှၤ,ဒီးလူၤဝဲအခၣ်ဆူၣ်,ဒီးကူးတဲာ်ဝဲအဆ့လၢအဖးဖီ,ဖဲအခံကီၢ်,ဒီးပျၢ်အီၤလီၤ. 5ဒီးပှၤဟဲစံးဘၣ်စီၤဒၤဝံးလၢပှၤကညီန့ၣ်အဂ့ၢ်အကျိၤဒီးအဝဲဒၣ်မၢပှၤလဲၤသဂၢၢ်အီၤလီၤ.အဂ့ၢ်ဒ်အံၤ,ပှၤကညီန့ၣ်အမဲာ်ဆှးဒိၣ်မးလီၤ.ဒီးစီၤပၤစံးဝဲဒၣ်,အိၣ်လၢယရံၤဃိတုၤသုခၣ်ဆူၣ်ထီၣ်ဒီးဟဲက့ၤတက့ၢ်. 6ဒီးပှၤဧၣ်မိၣ်ဖိထံၣ်ဝဲလၢအမၤနၢလီၤအသးလၢစီၤဒၤဝံးအမဲာ်ညါ,ဒီးစီၤဃၤနူၣ်,ဒီးပှၤဧၣ်မိၣ်ဖိဟ့ၣ်ယုၢ်စ့အကံကၢ်တကထိ,ဒ်သိးအကငါလ့ၣ်ကဟၣ်,ဒီးကသ့ၣ်သုးဖိလၢမ့းစပတၤမံ,ဒီးလၢစူၤရံဘၣ်ဃးဒီးမၤကၤ,ဒီးလၢစိဘၤလီၤ. 7ဒီးငါဝဲလၢလ့ၣ်ကဟၣ်အဆိသၢကလးခံကထိ,ဒီးမၤကၤအစီၤပၤဒီးအပှၤဂီၢ်မုၢ်ဟဲဝဲ,ဒီးသူၣ်ဒဲလၢမ့ဒဘၤအမဲာ်ညါလီၤ.ဒီးပှၤဧၣ်မိၣ်ဖိဟဲလၢအဝ့ၢ်တဖၣ်အပူၤ,ဒီးအိၣ်ဖှိၣ်ရိဖှိၣ်,ဒီးဟဲဒ်သိးအကဒုးတၢ်လီၤ. 8ဒီးတုၤစီၤဒၤဝံးနၢ်ဟူဝဲဒီး,မၢလီၤစီၤယိၤအာ်,ဒီးပှၤသုးဖိပှၤအဆူၣ်ဂီၢ်မုၢ်ခဲလၢာ်လီၤ. 9ဒီးပှၤဧၣ်မိၣ်ဖိဟဲထီၣ်,ဒီးကတဲာ်ကတီၤတၢ်ဒုးသုးဖဲတၢ်လဲၤနုာ်လၢဝ့ၢ်ပူၤ,ဒီးစီၤပၤလၢအဟဲတဖၣ်အိၣ်ဝဲတပူၤဒၣ်လၢတၢ်ပျီပူၤလီၤ. 10ဒီးစီၤယိၤအာ်ထံၣ်ဝဲလၢတၢ်ဒုးသုးအလီၢ်အိၣ်ဝဲလၢအမဲာ်ညါ,ဒီးလၢအလီၢ်ခံ,ဒီးဃုထၢပှၤဃုထၢဖိခဲလၢာ်လၢအံၣ်စရ့လးအကျါ,ဒီးကတဲာ်ကတီၤအီၤထီဒါပှၤစူၤရံဖိလီၤ. 11ဒီးပှၤအိၣ်လီၤတဲာ်တဖၣ်န့ၣ်ပာ်ဝဲလၢအဒီပုၢ်ဝဲၢ်စီၤအဘံၡဲၤအစုပူၤဒ်သိးအကကတဲာ်ကတီၤအီၤထီဒါပှၤဧၣ်မိၣ်ဖိလီၤ. 12ဒီးစံးဝဲဒၣ်,ပှၤစူၤရံဖိမ့ၢ်ဆူၣ်န့ၢ်ယၤတက့ၢ်ဒီး,နဘၣ်မၤစၢၤယၤ,ဒီးပှၤဧၣ်မိၣ်ဖိမ့ၢ်ဆူၣ်န့ၢ်နၤတက့ၢ်ဒီး,ယကမၤစၢၤနၤလီၤ. 13တံးတဟီၣ်,ဒီးပာ်ဆူၣ်ထီၣ်သကိးပသးလၢပပှၤဂီၢ်မုၢ်အဂီၢ်,ဒီးလၢပကစၢ်အဝ့ၢ်တဖၣ်အဂီၢ်တက့ၢ်.ဒီးမ်ယွၤမၤတၢ်အဂ့ၤလၢအမဲာ်တက့ၢ်. 14ဒီးစီၤယိၤအာ်,ဒီးပှၤဂီၢ်မုၢ်အိၣ်ဒီးအီၤသုးဘူးအသးဆူပှၤစူၤရံဖိအမဲာ်ညါဒ်သိးအကဒုးတၢ်,ဒီးအဝဲသ့ၣ်ဃ့ၢ်လၢအမဲာ်ညါလီၤ. 15ဒီးပှၤဧၣ်မိၣ်ဖိထံၣ်ဝဲလၢပှၤစူၤရံဖိဃ့ၢ်သတးဒီး,ဃ့ၢ်စ့ၢ်ကီးဝဲလၢအဒီပုၢ်ဝဲၢ်စီၤအဘံၡဲၤအမဲာ်ညါ,ဒီးလဲၤနုာ်လၢဝ့ၢ်ပူၤလီၤ.ဒီးစီၤယိၤအာ်ဟဲက့ၤဝဲဆူယရူၤၡလ့ၣ်လီၤ. 16ဒီးတုၤပှၤစူၤရံဖိထံၣ်ဝဲလၢအဘၣ်တၢ်ကျီကွံာ်အီၤလၢအံၣ်စရ့လးအမဲာ်ညါဒီး,မၢလီၤကလူးတဖၣ်,ဒီးဒုးဟဲစိာ်ပှၤစူၤရံဖိလၢအအိၣ်ဝဲလၢထံမိၢ်ပှၢ်ဝၢ်ဘးခီ,ဒီးစီၤဟးဒၢ်ဧ့စ့ၢ်အပှၤသုးမုၢ်အခိၣ်စီၤၡိဖးလဲၤလၢအမဲာ်ညါလီၤ. 17ဒီးပှၤစံးဘၣ်စီၤဒၤဝံး,ဒီးအဝဲဒၣ်ဒုးအိၣ်ဖှိၣ်အံၣ်စရ့လးခဲလၢာ်,ဒီးခီဂာ်ယၢ်ဒ့ၣ်,ဒီးဟဲဆူအအိၣ်,ဒီးကတဲာ်ကတီၤတၢ်ထီဒါအီၤလီၤ.ဒီးတုၤစီၤဒၤဝံးကတဲာ်ကတီၤတၢ်ဒ်သိးအကလဲၤသဂၢၢ်ဒုးသုးဒီးပှၤစူၤရံဖိဒီး,အဝဲသ့ၣ်ဒုးတၢ်ဒီးအီၤလီၤ. 18ဒီးပှၤစူၤရံဖိဃ့ၢ်လၢအံၣ်စရ့လးအမဲာ်ညါ,ဒီးစီၤဒၤဝံးမၤသံပှၤစူၤရံဖိအလ့ၣ်ကဟၣ်အပှၤကညီနွံကထိ,ဒီးပှၤကသ့ၣ်သုးဖိလွံၢ်ကလး,ဒီးမၤသံပှၤသုးမုၢ်အခိၣ်စီၤၡိဖးလီၤ. 19ဒီးစီၤဟးဒၢ်ဧ့စ့ၢ်အခ့အပှၤတဖၣ်န့ၣ်ထံၣ်ဝဲလၢအဘၣ်တၢ်ကျီကွံာ်အီၤလၢအံၣ်စရ့လးအမဲာ်ညါ,ဒီးမၤတၢ်ဃူတၢ်ဖိးဒီးစီၤဒၤဝံး,ဒီးကဲထီၣ်အခ့အပှၤလီၤ.ဒီးပှၤစူၤရံဖိမၤစၢၤဒံးပှၤဧၣ်မိၣ်ဖိန့ၣ်အသးတအိၣ်လၢၤဘၣ်လီၤ.
Copyright information for
KswSKMB