1Ch 20 | KswSKMB | STEP | ဒီးတုၤနံၣ်ဆၢအလီၢ်ဒီး,အဆၢအကတီၢ်ဘၣ်လၢစီၤပၤတဖၣ်လဲၤထီၣ်ဒီး,တၢ်မၤအသးလၢစီၤယိၤအာ်ဆှၢထီၣ်ပှၤသုးမုၢ်အဆူၣ်,ဒီးမၤဟးဂီၤပှၤဧၣ်မိၣ်ဖိအထံအကီၢ်,ဒီးဟဲကဝီၤဃာ်ရးဘး,ဒီးစီၤဒၤဝံးအိၣ်ဝဲလၢယရူၤၡလ့ၣ်အပူၤလီၤ.ဒီးစီၤယိၤအာ်ကျီကွံာ်ရးဘး,ဒီးမၤဟးဂီၤကွံာ်အီၤလီၤ.

‏ 1 Chronicles 20

1 ဒီးတုၤနံၣ်ဆၢအလီၢ်ဒီး,အဆၢအကတီၢ်ဘၣ်လၢစီၤပၤတဖၣ်လဲၤထီၣ်ဒီး,တၢ်မၤအသးလၢစီၤယိၤအာ်ဆှၢထီၣ်ပှၤသုးမုၢ်အဆူၣ်,ဒီးမၤဟးဂီၤပှၤဧၣ်မိၣ်ဖိအထံအကီၢ်,ဒီးဟဲကဝီၤဃာ်ရးဘး,ဒီးစီၤဒၤဝံးအိၣ်ဝဲလၢယရူၤၡလ့ၣ်အပူၤလီၤ.ဒီးစီၤယိၤအာ်ကျီကွံာ်ရးဘး,ဒီးမၤဟးဂီၤကွံာ်အီၤလီၤ.

2 ဒီးစီၤဒၤဝံးဟံးန့ၢ်အစီၤပၤအခိၣ်သလုးလၢအခိၣ်,(လီၤသယၢၢ်ထူတကံကၢ်,ဒီးအိၣ်ဝဲဒီးတၢ်မျၢ်လီၤ.)ဒီးပှၤပာ်ဝဲလၢစီၤဒၤဝံးအခိၣ်လီၤ.ဒီးဟဲစိာ်ဝဲ,ဝ့ၢ်အတၢ်ဖိတၢ်လံၤလၢအဂုာ်န့ၢ်ဝဲန့ၣ်အါအါကလဲာ်လီၤ.

3 ဒီးဟဲစိာ်ထီၣ်ပှၤဂီၢ်မုၢ်လၢအအိၣ်ဝဲလၢအပူၤ,ဒီးဘူးဝဲလၢလွး,ဒီးထးကြဲ,ဒီးကွါလီၤ.ဒီးမၤပှၤဧၣ်မိၣ်ဖိအဝ့ၢ်ခဲလၢာ်ဒ်န့ၣ်အသိးလီၤ.ဒီးစီၤဒၤဝံးဒီးပှၤခဲလၢာ်န့ၣ်ဟဲက့ၤဝဲဆူယရူၤၡလ့ၣ်လီၤ.

4 ဒီးလၢတၢ်န့ၣ်တဖၣ်အလီၢ်ခံတၢ်မၤအသးလၢတၢ်ဒုးလိာ်အသးဒီးပှၤဖလ့ၡသးဖိလၢက့စ့ၢ်အပူၤလီၤ.တုၤနုၤတဘျီပှၤဃူၡသးဖိစီၤစၤဘကဲကျီကွံာ်စီၤစးဖဲၤလၢအအိၣ်လၢပှၤနီၢ်ဒိၣ်ဖိအဖိခွါအကျါ,ဒီးဃၣ်ဝဲလီၤ.

5 မၤကဒီးတစုတၢ်ဒုးလိာ်အသးဒီးပှၤဖလ့ၡသးဖိ,ဒီးစီၤယၤအံၢ်အဖိခွါစီၤအ့လဃၤနၣ်ကျီကွံာ်စီၤလၤဃမံ,ဒီပုၢ်ဒီဝဲၢ်ဒီးပှၤကံးတံးဖိစီၤကၤလယၤ,လၢအဘီတိၢ်မၤသးဒ်ပှၤထါထၣ်ဖိအနီၣ်ဘိအသိးန့ၣ်လီၤ.

6 မၤကဒီးတစုတၢ်ဒုးလိာ်အသးလၢကၤသးအပူၤ,ဖဲပှၤအနီၢ်ဒိၣ်အိၣ်ဝဲဒီးအစုမုၢ်ဘိ,ဒီးအခီၣ်မုၢ်ဘိအိၣ်ဝဲဃုဘိဃုဘိ,ခဲလၢာ်ခံဆံလွံၢ်ဘိ,ဒီးအဝဲဒၣ်အိၣ်ဖျဲၣ်စ့ၢ်ကီးဝဲလၢပှၤနီၢ်ဒိၣ်လီၤ. 7 ဒီးတုၤအမၤတရီတပါအံၣ်စရ့လးဒီး,စီၤဒၤဝံးအဒီပုၢ်ဝဲၢ်,စီၤၡံမၤအဖိခွါစီၤယိနၤသၣ်ကျီကွံာ်အီၤလီၤ.

8 အဝဲသ့ၣ်တဖၣ်န့ၣ်အိၣ်ဖျဲၣ်လၢပှၤနီၢ်ဒိၣ်ဖိအဂီၢ်,လၢကၤသးအပူၤ,ဒီးလီၤဃံၤဝဲလၢစီၤဒၤဝံးအစုပူၤ,ဒီးလၢအခ့အပှၤအစုပူၤန့ၣ်လီၤ.