‏ 1 Chronicles 6

1ဒီးစီၤလ့ၤဝံအဖိခွါန့ၣ်မ့ၢ်စီၤက့ရၡိၣ်,ဒီးစီၤကဃး,ဒီးစီၤမရၤရံၤလီၤ. 2ဒီးစီၤကဃးအဖိခွါမ့ၢ်စီၤဧၤမရၣ်,စီၤယံးစဟၢ်,ဒီးစီၤဃ့ဘြိၣ်,ဒီးစီၤဧူးစံၤအ့လးလီၤ. 3ဒီးစီၤဧၤမရၣ်အဖိမ့ၢ်စီၤအၤဟရိၣ်,ဒီးစီၤမိၤရှ့,ဒီးနီၢ်မံးရယၣ်လီၤ.ဒီးစီၤအၤဟရိၣ်အဖိခွါမ့ၢ်စီၤနဒး,ဒီးစီၤအဘံဟူၤ,စီၤအလၤဧစၢ်,ဒီးစီၤအံသမၢ်လီၤ.

4စီၤအလၤဧစၢ်ထီၣ်ဖိစီၤဖံၤနဃၣ်လီၤ.စီၤဖံၤနဃၣ်ထီၣ်ဖိစီၤအဘံၤရှူ, 5ဒီးစီၤအဘံၤရှူထီၣ်ဖိစီၤဘူးကံၤ,ဒီးစီၤဘူးကံၤထီၣ်ဖိစီၤဧူၤစံ, 6ဒီးစီၤဧူၤစံထီၣ်ဖိစီၤစရၤဃယၤ,ဒီးစီၤစရၤဃယၤထီၣ်ဖိစီၤမရၤယိး, 7ဒီးစီၤမရၤယိးထီၣ်ဖိစီၤအမၤရယၤ,ဒီးစီၤအမၤရယၤထီၣ်ဖိစီၤအဃံတူာ်, 8ဒီးစီၤအဃံတူာ်ထီၣ်ဖိစီၤစၤဒိး,ဒီးစီၤစၤဒိးထီၣ်ဖိစီၤအဃံမၤဧး, 9ဒီးစီၤအဃံမၤဧးထီၣ်ဖိစီၤဧစၤရယၤ,ဒီးစီၤဧစၤရယၤထီၣ်ဖိစီၤယိဃၤနၤ, 10ဒီးစီၤယိဃၤနၤထီၣ်ဖိစီၤဧစၤရယၤ,(အဝဲဒၣ်န့ၣ်မ့ၢ်ပှၤလၢအမၤပှၤလုၢ်တၢ်အဒိၣ်အတၢ်မၤလၢဟံၣ်ပူၤလၢစီၤၡလိၤမိၤမၤဝဲလၢယရူၤၡလ့ၣ်အပူၤ,) 11ဒီးစီၤဧစၤရယၤထီၣ်ဖိစီၤအမၤရယၤ,ဒီးစီၤအမၤရယၤထီၣ်ဖိစီၤအဃံတူာ်, 12ဒီးစီၤအဃံတူာ်ထီၣ်ဖိစီၤစၤဒိး,ဒီးစီၤစၤဒိးထီၣ်ဖိစီၤၡၤလူၣ်, 13ဒီးစီၤၡၤလူၣ်ထီၣ်ဖိစီၤဃံးလကံယၤ,ဒီးစီၤဃံးလကံယၤထီၣ်ဖိစီၤဧစၤရယၤ, 14ဒီးစီၤဧစၤရယၤထီၣ်ဖိစီၤစရါယၤ,စီၤစရါယၤထီၣ်ဖိစီၤယဃိၤစါဒး, 15ဒီးတုၤယွၤစိာ်မၢကဲကုၢ်ယူဒၤ,ဒီးပှၤယရူၤၡလ့ၣ်ဖိလၢစီၤနဘူၤကးန့စၢ်အစုပူၤဒီး,စီၤယဃိၤစါဒးန့ၣ်လဲၤဝဲလီၤ.

16စီၤလ့ၤဝံအဖိခွါတဖၣ်မ့ၢ်စီၤက့ရၡိၣ်,စီၤကဃး,ဒီးစီၤမရၤရံၤလီၤ. 17ဒီးအအံၤမ့ၢ်စီၤက့ရၡိၣ်အဖိခွါအမံၤ,စီၤလံးဘနံၤ,ဒီးစီၤၡံမံၤလီၤ. 18ဒီးစီၤကဃးအဖိခွါမ့ၢ်စီၤဧၤမရၣ်,ဒီးစီၤယံးစဟၢ်,ဒီးစီၤဃ့ဘြိၣ်,ဒီးစီၤဧူးစံၤအ့လးလီၤ. 19ဒီးစီၤမရၤရံၤအဖိခွါမ့ၢ်စီၤမၤဃလံ,ဒီးစီၤမူၡံၤလီၤ.ဒီးအဝဲသ့ၣ်မ့ၢ်ပှၤလ့ၤဝံဖိအဒူၣ်တဖၣ်ဒ်အပၢ်သ့ၣ်တဖၣ်အသိးန့ၣ်လီၤ. 20လၢစီၤက့ရၡိၣ်န့ၣ်အဖိခွါစီၤလံးဘနံၤ,အဖိခွါစီၤယၤဃး,အဖိခွါစီၤစံးမၤ, 21အဖိခွါစီၤယိအၤ,အဖိခွါစီၤဧံးဒိၤ,အဖိခွါစီၤစ့ရၤ,အဖိခွါစီၤယအးတရဲလီၤ.

22စီၤကဃးအဖိခွါမ့ၢ်အဖိခွါစီၤဧၤမံၤနဒး,အဖိခွါစီၤကိၤရးအဖိခွါစီၤအးစံၢ်, 23အဖိခွါစီၤအ့လကါနၤ,ဒီးအဖိခွါစီၤအဘံယၢ်စာ်,ဒီးအဖိခွါစီၤအးစံၢ်, 24အဖိခွါစီၤတၤဃး,အဖိခွါစီၤအူရံၤအ့လး, 25အဖိခွါစီၤဧူးစံယါ,ဒီးအဖိခွါစီၤစီလူးလီၤ. 26ဒီးစီၤအ့လကါနၤအဖိခွါမ့ၢ်စီၤဧမၤစဲ,ဒီးစီၤအဃံမိးလီၤ. 27စီၤအ့လကါနၤန့ၣ်အဖိခွါတဖၣ်မ့ၢ်အဖိခွါစီၤစိၤဖဲ,အဖိခွါစီၤနၤဃး,အဖိခွါစီၤအလံအာ်,အဖိခွါစီၤယရိဃၣ်,အဖိခွါစီၤအ့လကါနၤလီၤ. 28ဒီးစီၤၡမူၤအ့လးအဖိခွါမ့ၢ်အဖိဝဲၢ်ကိစီၤဝၤၡနံၤ,ဒီးစီၤအဘံယၤလီၤ.

29ဒီးစီၤမရၤရံၤအဖိခွါမ့ၢ်စီၤမးဃလံ,အဖိခွါစီၤလံးဘနံၤအဖိခွါစီၤၡံမံၤ,အဖိခွါစီၤဧူးစး, 30အဖိခွါစီၤၡံမၤ,အဖိခွါစီၤဃးကံယၤ,အဖိခွါစီၤဧစံယၤလီၤ.

31ဒီးအဝဲသ့ၣ်တဖၣ်အံၤမ့ၢ်ပှၤလၢစီၤဒၤဝံးပာ်ဝဲလၢပှၤသးဝံၣ်တၢ်အခိၣ်လၢယွၤအဟံၣ်ပူၤလၢတလါန့ၣ်အိၣ်ဘှံးအလီၢ်ခံလီၤ. 32ဒီးအဝဲသ့ၣ်မၤတၢ်ဒီးတၢ်သးဝံၣ်လၢတၢ်အိၣ်ဖှိၣ်အဒဲအအိၣ်အဆိးအလီၢ်အမဲာ်ညါတုၤလီၤလၢစီၤၡလိၤမိၤမၤယွၤအဟံၣ်လၢယရူၤၡလ့ၣ်အပူၤလီၤ.ဒီးအိၣ်ဝဲဒ်တၢ်စံၣ်ညီၣ်အတၢ်မၤအသိးန့ၣ်လီၤ.

33ဒီးအအံၤမ့ၢ်ပှၤလၢအအိၣ်ဝဲတဖၣ်ဒီးအဖိခွါ.လၢပှၤကဃးဖိအဖိခွါတဖၣ်အကျါန့ၣ်,ပှၤသးဝံၣ်တၢ်ဖိစီၤဟ့မၣ်,စီၤယိၤအ့လးအဖိခွါ,စီၤၡမူၤအ့လးအဖိခွါ, 34စီၤအ့လကါနၤအဖိခွါ,စီၤယရိဃၣ်အဖိခွါ,စီၤအလံၤအ့လးအဖိခွါ,စီၤတိအးအဖိခွါ, 35စီၤစူာ်အဖိခွါ,စီၤအ့လကါနၤအဖိခွါ,စီၤမၤဃးအဖိခွါ,စီၤဧမၤစဲအဖိခွါ, 36စီၤအ့လကါနၤအဖိခွါ,စီၤယိၤအ့လးအဖိခွါ,စီၤဧစၤရယၤအဖိခွါ,စီၤစဖါနယၤအဖိခွါ, 37စီၤတၤဃးအဖိခွါ,စီၤအးစံၢ်အဖိခွါ,စီၤအဘံယၤစာ်အဖိခွါ,စီၤကိၤရးအဖိခွါ, 38စီၤယံးစဟၢ်အဖိခွါ,စီၤကဃးအဖိခွါ,စီၤလ့ၤဝံအဖိခွါ,စီၤအံၣ်စရ့လးအဖိခွါလီၤ.

39ဒီးအဒီပုၢ်ဝဲၢ်စီၤအၤစာ်လၢအဆၢထၢၣ်လၢအစုထွဲတခီတဂၤန့ၣ်,စီၤအၤစာ်,စီၤဘရ့ကံယၤအဖိခွါ,စီၤၡံမၤအဖိခွါ, 40စီၤမံၤက့လးအဖိခွါ,စီၤဘၤစ့ယၤအဖိခွါ,စီၤမၤလကံယၤအဖိခွါ, 41စီၤအ့ၤသနံအဖိခွါ,စီၤစ့ရၤအဖိခွါ,စီၤဧဒါယၤအဖိခွါ, 42စီၤအ့သၣ်အဖိခွါ,စီၤစံးမၤအဖိခွါ,စီၤၡံမံၤအဖိခွါ, 43စီၤယၤဃးအဖိခွါ,စီၤက့ရၡိၣ်အဖိခွါ,စီၤလ့ၤဝံအဖိခွါလီၤ.

44ဒီးအဒီပုၢ်ဝဲၢ်စီၤမရၤရံၤအဖိခွါတဖၣ်လၢစုစ့ၣ်တခီန့ၣ်,စီၤအ့သၣ်,စီၤကံၡံၤအဖိခွါ,စီၤဧၤဘ့းဒံအဖိခွါ,စီၤမးလူးအဖိခွါ, 45စီၤဃၡၤဘယၤအဖိခွါ,စီၤအမၤစယါအဖိခွါ,စီၤဃံလကံယၤအဖိခွါ, 46စီၤအးမစံအဖိခွါ,စီၤဘၤနံအဖိခွါ,စီၤၡၤမ့ၢ်အဖိခွါ, 47စီၤမးဃလံၤအဖိခွါ,စီၤမူၡံၤအဖိခွါ,စီၤမရၤရံၤအဖိခွါ,စီၤလ့ၤဝံအဖိခွါလီၤ. 48ဒီးအဒီပုၢ်ဝဲၢ်ပှၤလ့ၤဝံဖိန့ၣ်တၢ်ပာ်အီၤလၢတၢ်မၤအကကလုာ်ကလုာ်ဘၣ်ဃးဒီးယွၤအဟံၣ်အအိၣ်အဆိးအလီၢ်န့ၣ်လီၤ.

49ဒီးစီၤအၤဟရိၣ်ဒီးအဖိခွါတဖၣ်လုၢ်တၢ်လၢတၢ်လုၢ်လီၢ်မ့ၣ်အူအဖီခိၣ်,ဒီးလၢတၢ်လုၢ်လီၢ်ဆိၣ်ကဲၤတၢ်နၢမူအဖီခိၣ်,ဒီးအိၣ်ဝဲလၢတၢ်မၤဘၣ်ဃးဒီးတၢ်အလီၢ်စီဆှံကတၢၢ်ခဲလၢာ်အဂီၢ်,ဒ်သိးအကမၤတၢ်ပူၤဖျဲးလၢအံၣ်စရ့လးအဂီၢ်,ဒ်ကယဲၢ်တၢ်လၢယွၤအခ့အပှၤစီၤမိၤရှ့မၤလိာ်ဝဲအသိးန့ၣ်လီၤ.

50ဒီးအအံၤမ့ၢ်စီၤအၤဟရိၣ်အဖိခွါ.

အဖိခွါစီၤအလၤဧစၢ်,အဖိခွါစီၤဖံၤနဃၣ်,အဖိခွါစီၤအဘံၤရှူ, 51အဖိခွါစီၤဘူးကံၤ,အဖိခွါစီၤဧူၤစံ,အဖိခွါစီၤစရၤဃယၤ, 52အဖိခွါစီၤမရၤယိး,အဖိခွါစီၤအမၤရယၤ,အဖိခွါစီၤအဃံတူာ်, 53အဖိခွါစီၤစၤဒိး,အဖိခွါစီၤအဃံမၤဧးလီၤ.

54ဒီးအဝဲအံၤမ့ၢ်အအိၣ်အဆိးအလီၢ်လၢအတိာ်ပူၤခဲလၢာ်လၢအကီၢ်ဃၢၤတဖၣ်အပူၤ,လၢစီၤအၤဟရိၣ်အဖိခွါအဂ့ၢ်,လၢပှၤကဃးဖိအပှၤဟံၣ်ဖိတဖၣ်အဂ့ၢ်လီၤ.အဂ့ၢ်ဒ်အံၤ,တၢ်အဖးန့ၣ်မ့ၢ်အဝဲလီၤ. 55ဒီးတၢ်ဟ့ၣ်လီၤအီၤလၢဃ့ဘြိၣ်လၢကီၢ်ယူဒၤအပူၤ,ဒီးအတၢ်အီၣ်ဆၣ်အလီၢ်လၢအအိၣ်ဝးတရံးအီၤလီၤ. 56မ့မ့ၢ်ဟီၣ်ခိၣ်အကဝီၤတဖၣ်ဘၣ်ဃးဒီးဝ့ၢ်န့ၣ်,ဒီးအတဝီတဖၣ်န့ၣ်ဟ့ၣ်ဝဲလၢစီၤယဖူန့ၤအဖိခွါစီၤကၤလ့းလီၤ.

57ဒီးဟ့ၣ်ဝဲလၢစီၤအၤဟရိၣ်အဖိခွါတဖၣ်လၢယူဒၤအဝ့ၢ်ဃ့ဘြိၣ်,ဝ့ၢ်တူၢ်လိာ်တၢ်,ဒီးလံးဘနၤ,ဒီးအတၢ်အီၣ်ဆၣ်အလီၢ်,ဒီးယးတံၢ်,ဒီးအ့ၡတမိး,ဒီးအတၢ်အီၣ်ဆၣ်အလီၢ်,ဒီးဃံလ့ၣ်,ဒီးအတၢ်အီၣ်ဆၣ်အလီၢ်, 58ဒီးဒဘံၢ်,ဒီးအတၢ်အီၣ်ဆၣ်အလီၢ်, 59ဒီးဧၤၡၣ်,ဒီးအတၢ်အီၣ်ဆၣ်အလီၢ်,ဒီးဘ့ၤသရှ့မ့ၣ်,ဒီးအတၢ်အီၣ်ဆၣ်အလီၢ်လီၤ.

60ဒီးလၢဘံၣ်ယၤမံၣ်တကလုာ်အကျါန့ၣ်က့ဘၤ,ဒီးအတၢ်အီၣ်ဆၣ်အလီၢ်,ဒီးဧၤလ့မ့း,ဒီးအတၢ်အီၣ်ဆၣ်အလီၢ်,ဒီးဧၤနသိး,ဒီးအတၢ်အီၣ်ဆၣ်အလီၢ်လီၤ.အဝ့ၢ်ခဲလၢာ်လၢအဒူၣ်တဖၣ်အကျါန့ၣ်အိၣ်တဆံသၢဝ့ၢ်လီၤ.

61ဖးတၢ်သတးဒီးပှၤဟ့ၣ်ပှၤကဃးဖိလၢအအိၣ်လီၤတဲာ်လၢပှၤတဒူၣ်အဟံၣ်အကျါလၢဝ့ၢ်ဆံဆဲၣ်ဝ့ၢ်လၢပှၤတခီဒူၣ်မနၤရှ့ၤအကျါလီၤ.

62ဒီးဟ့ၣ်ဝဲလၢပှၤက့ရၡိၣ်အဖိဒ်အပှၤဟံၣ်ဖိတဖၣ်အသိးလၢဝ့ၢ်တဆံသၢဝ့ၢ်လၢယံးစၣ်ကၢ်တဒူၣ်အကျါ,ဒီးလၢအၤရှ့ၢ်တဒူၣ်အကျါ,ဒီးလၢနးသၤလံတဒူၣ်အကျါ,ဒီးလၢမနၤရှ့ၤတဒူၣ်အကျါ,လၢဘၤၡၣ်အပူၤလီၤ.

63ဖးတၢ်သတးဒီး,ပှၤဟ့ၣ်ပှၤမရၤရံၤဖိလၢဝ့ၢ်တဆံခံဝ့ၢ်,ဒ်အပှၤဟံၣ်ဖိတဖၣ်အသိးန့ၣ်လၢရူၤဘ့ၣ်တဒူၣ်အကျါ,ဒီးလၢကးတဒူၣ်အကျါ,ဒီးလၢစဘူလိၣ်တဒူၣ်အကျါလီၤ.

64ဒီးပှၤအံၣ်စရ့လးဖိဟ့ၣ်ပှၤလ့ၤဝံဖိအဝ့ၢ်တဖၣ်,ဒီးအတၢ်အီၣ်ဆၣ်အလီၢ်တဖၣ်လီၤ. 65ဒီးဖးတၢ်သတးဒီး,ဟ့ၣ်လၢပှၤယူဒၤဖိတဒူၣ်အကျါ,ဒီးလၢပှၤစူၤမ့းအိၣ်ဖိတဒူၣ်အကျါ,ဒီးလၢပှၤဘံၣ်ယၤမံၣ်ဖိတဒူၣ်အကျါလၢဝ့ၢ်တဖၣ်န့ၣ်လၢအမံၤကိးအသးလီၤ.

66ဒီးပှၤဘၣ်ဃးဒီးစီၤကဃးအပှၤဟံၣ်ဖိတဖၣ်အိၣ်ဒီးဝ့ၢ်တဖၣ်လၢအကီၢ်ဃၢၤတဖၣ်အပူၤလၢအ့ဖရဲၣ်တဒူၣ်အကျါလီၤ. 67ဒီးဟ့ၣ်ဝဲလၢအီၤလၢဝ့ၢ်တူၢ်လိာ်တၢ်တဖၣ်,လၢၡက့ၣ်လၢကစၢၢ်အ့ဖရဲၣ်အလိၤ,ဒီးအတၢ်အီၣ်ဆၣ်အလီၢ်,ဒီးက့စ့ၢ်,ဒီးအတၢ်အီၣ်ဆၣ်အလီၢ်, 68ဒီးယၤကမၣ်,ဒီးအတၢ်အီၣ်ဆၣ်အလီၢ်,ဘ့ၤသဃိရိၣ်,ဒီးအတၢ်အီၣ်ဆၣ်အလီၢ်, 69ဒီးအးယၤလိၣ်,ဒီးအတၢ်အီၣ်ဆၣ်အလီၢ်,ဒီးကၤသရံးမိၣ်,ဒီးအတၢ်အီၣ်ဆၣ်အလီၢ်, 70ဒီးလၢပှၤတခီဒူၣ်မနၤရှ့ၤအကျါန့ၣ်လၢဧၤန့ၢ်,ဒီးအတၢ်အီၣ်ဆၣ်အလီၢ်,ဒီးဘံးလၣ်,ဒီးအတၢ်အီၣ်ဆၣ်အလီၢ်လၢပှၤကဃးဖိလၢအအိၣ်လီၤတဲာ်လၢအပှၤဟံၣ်ဖိအဂီၢ်လီၤ.

71ဒီးပှၤဟ့ၣ်ပှၤက့ရၡိၣ်ဖိလၢကိလၣ်,ဒီးအတၢ်အီၣ်ဆၣ်အလီၢ်လၢဘၤၡၣ်အပူၤ,လၢပှၤတခီဒူၣ်မနၤရှ့ၤအပှၤဟံၣ်ဖိအကျါ,ဒီးဧၤၡတြိး,ဒီးအတၢ်အီၣ်ဆၣ်အလီၢ်လီၤ. 72ဒီးလၢယံးစၣ်ကၢ်တဒူၣ်အကျါန့ၣ်ကၤဒ့ၣ်,ဒီးအတၢ်အီၣ်ဆၣ်အလီၢ်,ဒၤဘြး,ဒီးအတၢ်အီၣ်ဆၣ်အလီၢ်, 73ဒီးရၤမိး,ဒီးအတၢ်အီၣ်ဆၣ်အလီၢ်,ဒီးဧၤန့ၣ်,ဒီးအတၢ်အီၣ်ဆၣ်အလီၢ်, 74ဒီးလၢအၤရှ့ၢ်တဒူၣ်အကျါန့ၣ်မၤၡလးဒီးအတၢ်အီၣ်ဆၣ်အလီၢ်,ဒီးဧးဘဒိၣ်,ဒီးအတၢ်အီၣ်ဆၣ်အလီၢ်, 75ဒီးဃူးကိး,ဒီးအတၢ်အီၣ်ဆၣ်အလီၢ်,ဒီးရဃိာ်,ဒီးအတၢ်အီၣ်ဆၣ်အလီၢ်, 76ဒီးလၢနးသၤလံတဒူၣ်အကျါန့ၣ်က့ဒ့ၣ်လၢကၤလံၤလါအပူၤ,ဒီးအတၢ်အီၣ်ဆၣ်အလီၢ်,ဒီးဃမိၣ်,ဒီးအတၢ်အီၣ်ဆၣ်အလီၢ်,ဒီးကံရယးသၣ်,ဒီးအတၢ်အီၣ်ဆၣ်အလီၢ်လီၤ.

77ပှၤဟ့ၣ်ပှၤမရၤရံၤဖိလၢအအိၣ်လီၤတဲာ်န့ၣ်လၢရံးမိၣ်,ဒီးအတၢ်အီၣ်ဆၣ်အလီၢ်,တၤဘိၢ်,ဒီးအတၢ်အီၣ်ဆၣ်အလီၢ်လၢစဘူလိၣ်တဒူၣ်အကျါလီၤ. 78ဒီးလၢယၢ်ဒ့ၣ်ဝၢ်ဘးခီလၢယရံၤဃိအဃၢၤလၢယၢ်ဒ့ၣ်မုၢ်ထီၣ်တခီလၢရူၤဘ့ၣ်တဒူၣ်အကျါန့ၣ်ပှၤဟ့ၣ်ဘ့စ့ၢ်လၢပှၢ်လၢ်ကျါ,ဒီးအတၢ်အီၣ်ဆၣ်အလီၢ်ဒီးယးဟစၤ,ဒီးအတၢ်အီၣ်ဆၣ်အလီၢ်, 79ဒီးကဒ့မိး,ဒီးအတၢ်အီၣ်ဆၣ်အလီၢ်,ဒီးမ့ဖၤ,ဒီးအတၢ်အီၣ်ဆၣ်အလီၢ်, 80ဒီးလၢကးတဒူၣ်အကျါန့ၣ်ရၤမိး,ဒီးအတၢ်အီၣ်ဆၣ်အလီၢ်လၢကံးလဧးအပူၤ,ဒီးမၤဃန့ၤ,ဒီးအတၢ်အီၣ်ဆၣ်အလီၢ်, 81ဒီးဃ့ၡဘိၣ်,ဒီးအတၢ်အီၣ်ဆၣ်အလီၢ်,ဒီးယၤစ့ၢ်ဒီးအတၢ်အီၣ်ဆၣ်အလီၢ်လီၤ.