1 Chronicles 14
1ဒီးစိၢ်အစီၤပၤဃံရၣ်မၢလီၤကလူးတဖၣ်ဆူစီၤဒၤဝံးအအိၣ်,ဒီးဟ့ၣ်ယုၢ်သ့ၣ်ဆှိအ့ရ့းတဖၣ်,ဒီးပှၤမၤတၢ်လၢလၢၢ်သ့,ဒီးပှၤမၤတၢ်လၢသ့ၣ်သ့,ဒီးအဝဲသ့ၣ်မၤစီၤဒၤဝံးအဟံၣ်တဖျၢၣ်လီၤ. 2ဒီးစီၤဒၤဝံးသ့ၣ်ညါဝဲလၢယွၤပာ်ဂၢၢ်ပာ်ကျၢၤအီၤလၢစီၤပၤလၢအံၣ်စရ့လးအဖီခိၣ်,ဒီးလၢအပာ်ထီၣ်ထီအဘီအမုၢ်လၢအံၣ်စရ့လးအပှၤဂီၢ်မုၢ်အဃိလီၤ. 3ဒီးစီၤဒၤဝံးဟံးန့ၢ်အမါတဖၣ်လၢယရူၤၡလ့ၣ်အပူၤ,ဒီးစီၤဒၤဝံးထီၣ်ဖိဒံးဖိမုၣ်တဖၣ်,ဒီးဖိခွါတဖၣ်လီၤ. 4ဒီးအအံၤမ့ၢ်အဖိလၢအအိၣ်ဖျဲၣ်လၢအဂီၢ်လၢယရူၤၡလ့ၣ်အပူၤတဖၣ်အမံၤ,စီၤၡးမူၤ,ဒီးစီၤၡိၤဘာ်,ဒီးစီၤနၤသၣ်,ဒီးစီၤၡလိၤမိၤ, 5ဒီးစီၤယံးဘဃၢ်,ဒီးစီၤအလံရှူၤ,ဒီးစီၤအ့လပၤလ့း, 6ဒီးစီၤနိကၤ,ဒီးစီၤန့ၤဖ့း,ဒီးစီၤယၤဖံ, 7ဒီးစီၤအလံၡမၤ,ဒီးစီၤဘဧ့ၤလယၤဒၤ,ဒီးစီၤအလံဖလ့းလီၤ. 8ဒီးတုၤပှၤဖလ့ၡသးဖိနၢ်ဟူဝဲလၢပှၤဖှူစီၤဒၤဝံးလၢစီၤပၤလၢအံၣ်စရ့လးခဲလၢာ်အဖီခိၣ်ဒီး,ပှၤဖလ့ၡသးဖိခဲလၢာ်ဟဲဃုစီၤဒၤဝံးလီၤ.ဒီးစီၤဒၤဝံးနၢ်ဟူဝဲဒီးလဲၤလီၤဝဲဆူအအိၣ်လီၤ. 9ဒီးပှၤဖလ့ၡသးဖိဟဲဝဲ,ဒီးသလၣ်ထီၣ်အသးလၢကစၢၢ်ကဆူးရဖံဒံၣ်အပူၤလီၤ. 10ဒီးစီၤဒၤဝံးသံကွၢ်တၢ်လၢယွၤ,ဒီးစံးဝဲဒၣ်,ယဘၣ်လဲၤထီၣ်ဆူပှၤဖလ့ၡသးဖိအအိၣ်န့ၣ်ဧါ,နကဟ့ၣ်လီၤကွံာ်အီၤလၢယစုပူၤဧါ,ဒီးယွၤစံးဝဲဒၣ်,လဲၤထီၣ်တက့ၢ်.အဂ့ၢ်ဒ်အံၤ,ယကဟ့ၣ်လီၤကွံာ်အီၤလၢနစုပူၤလီၤ. 11ဒီးအဝဲသ့ၣ်တဖၣ်န့ၣ်ဟဲဝဲဆူဘဧၤလးပရၤစံၣ်,ဒီးစီၤဒၤဝံးကျီကွံာ်အီၤဖဲန့ၣ်,ဒီးစီၤဒၤဝံးစံးဝဲဒၣ်,ယွၤဘၢၣ်ဖျိတၢ်လၢယဒုၣ်ယဒါအလိၤလၢယစုပူၤဒ်ထံဘၢၣ်ဖျိတၢ်အသိးန့ၣ်လီၤ.မၤသးဒ်န့ၣ်ဒီးယုၢ်ဝဲတၢ်အလီၢ်အမံၤဘဧၤလးပရၤစံၣ်လီၤ. 12ဒီးအဝဲသ့ၣ်တဖၣ်န့ၣ်လဲၤသဒၣ်အတၢ်ဂီၤဖဲန့ၣ်,ဒီးစီၤဒၤဝံးမၤလိာ်တၢ်,ဒီးပှၤဆူးထီၣ်ကွံာ်အီၤလၢမ့ၣ်အူလီၤ. 13ဒီးပှၤဖလ့ၡသးဖိဟဲထီၣ်ကဒီးတစု,ဒီးသလၣ်ထီၣ်အသးလၢကစၢၢ်ကဆူးလီၤ. 14ဒီးစီၤဒၤဝံးသံကွၢ်ကဒီးတၢ်လၢယွၤ,ဒီးယွၤစံးဘၣ်အီၤ,လဲၤထီၣ်ပိာ်အခံတဂ့ၤ.ဃၣ်ကပၤလၢအအိၣ်,ဒီးဟဲဆူအအိၣ်သဃီၤဒီးပံၢ်သလိဘကၤတဖၣ်တက့ၢ်. 15ဒီးတၢ်ကမၤအသးတုၤနနၢ်ဟူတၢ်အသီၣ်လၢပံၢ်သလိဘကၤအခံန့ၣ်ဒီး,နဘၣ်လဲၤဒုးတၢ်လီၤ.အဂ့ၢ်ဒ်အံၤ,အခါဖဲန့ၣ်ယွၤလဲၤတၢ်လၢနမဲာ်ညါဒ်သိးအကကျီကွံာ်ပှၤဖလ့ၡသးဖိအပှၤသုးမုၢ်န့ၣ်လီၤ. 16ဒီးစီၤဒၤဝံးမၤဝဲဒ်ယွၤမၤလိာ်အီၤအသိးန့ၣ်,ဒီးပှၤကျီကွံာ်ပှၤဖလ့ၡသးဖိအပှၤသုးမုၢ်လၢကံးဘိၣ်ပၢၢ်လၢက့ၤစ့ၢ်လီၤ. 17ဒီးစီၤဒၤဝံးအမံၤဟူထီသါလီၤလၢကီၢ်ကိးဘ့ၣ်ဒဲးအပူၤ,ဒီးယွၤဒုးပျံၤပှၤကလုာ်ခဲလၢာ်လၢအီၤလီၤ.
Copyright information for
KswSKMB