1Cor 10 | KswSKMB | STEP | အဂ့ၢ်ဒ်အံၤ,ပုၢ်သ့ၣ်ဝဲၢ်သ့ၣ်ဧၢ,ယသးတအိၣ်ဘၣ်လၢသုတသ့ၣ်ညါဘၣ်,လၢပပၢ်သ့ၣ်ခဲလၢာ်အိၣ်လၢတၢ်အၢၣ်အဖီလာ်,ဒီးခီဂာ်ပီၣ်လဲၣ်,

‏ 1 Corinthians 10

1 အဂ့ၢ်ဒ်အံၤ,ပုၢ်သ့ၣ်ဝဲၢ်သ့ၣ်ဧၢ,ယသးတအိၣ်ဘၣ်လၢသုတသ့ၣ်ညါဘၣ်,လၢပပၢ်သ့ၣ်ခဲလၢာ်အိၣ်လၢတၢ်အၢၣ်အဖီလာ်,ဒီးခီဂာ်ပီၣ်လဲၣ်, 2 ဒီးဒိးဘျၢ ^{▼▼10:2 လၢဟ့းလ့ၣ်အကျိာ်"ဘးပတံစၢ်."}အသးခဲလၢာ်လၢတၢ်အၢၣ်ဒီးပီၣ်လဲၣ်အပူၤဆူစီၤမိၤရှ့အပူၤ, 3 ဒီးအီၣ်တၢ်အီၣ်ဘၣ်ဃးဒီးသးတမံၤဃီခဲလၢာ်,ဒီးအီတၢ်အီဘၣ်ဃးဒီးသးတမံၤဃီခဲလၢာ်လီၤ. 4 အဂ့ၢ်ဒ်အံၤၤ,အီတၢ်လၢလၢၢ်ဘၣ်ဃးဒီးသးလၢအပိာ်အခံ,ဒီးလၢၢ်န့ၣ်မ့ၢ်ခရံာ်လီၤ. 5 ဘၣ်ဆၣ်ဒီးပှၤအါတက့ၢ်တဖၣ်န့ၣ်,တဘၣ်ယွၤအသးဘၣ်.အဂ့ၢ်ဒ်အံၤ,တၢ်ကလ့ၢ်လီၤအီၤလၢပှၢ်မုၢ်ကနၢလီၤ.

6 ဒီးတၢ်တဖၣ်န့ၣ်ကဲတၢ်အဒိအတဲာ်လၢပဂီၢ်,ဒ်သိးပသုတသးကွံတၢ်အၢတၢ်သီ,ဒ်အဝဲသ့ၣ်သးကွံတၢ်အသိးန့ၣ်တဂ့ၤ. 7 ဒီးသုတကဲထီၣ်ပှၤဘါတၢ်ဂီၤဒ်အဝဲသ့ၣ်တနီၤနီၤအသိးတဂ့ၤ.ဒ်တၢ်ကွဲးအသးအသိးန့ၣ်,ပှၤဂီၢ်မုၢ်ဆ့ၣ်နီၤအီၣ်တၢ်ဒီးအီတၢ်ဒီး,ဂဲၤဆၢထၢၣ်လိာ်ကွဲတၢ်လီၤ. ^{▼▼10:7 ၂မိၤ.၃၂း၆} 8 ဒီးသုတမၤကမၣ်မုၣ်ကမၣ်ခွါ,ဒ်အဝဲသ့ၣ်တနီၤနီၤမၤကမၣ်မုၣ်ကမၣ်ခွါ,ဒီးလီၤဃံၤဝဲခံကလးသၢကထိလၢမုၢ်တနံၤဃီအသိးန့ၣ်တဂ့ၤ. ^{▼▼10:8 ၂မိၤ.၃၂း၆} 9 ဒီးသုတလ့ပစီခရံာ်ဒ်အဝဲသ့ၣ်တနီၤနီၤလ့ပစီတၢ်အသိး,ဒီးသံဝဲလၢဂုၢ်န့ၢ်တဖၣ်န့ၣ်တဂ့ၤ. 10 ဒီးသုတကဒူးကဒ့ၣ်တၢ်,ဒ်အဝဲသ့ၣ်တနီၤနီၤကဒူးကဒ့ၣ်တၢ်အသိး,ဒီးတၢ်မၤဟးဂီၤတၢ်န့ၣ်,မၤဟးဂီၤအီၤန့ၣ်တဂ့ၤ.

11 ဒီးတၢ်န့ၣ်တဖၣ်ခဲလၢာ်မၤအသးလၢအဝဲသ့ၣ်အလိၤ,ဒီးကဲလၢတၢ်အဒိအတဲာ်,ဒီးအိၣ်ကွဲးအသးလၢပဝဲဒၣ်,လၢတၢ်အစိၤကတၢၢ်ဟဲဘၣ်အီၤအဂီၢ်,ဒ်သိးပကဘၣ်တၢ်သိၣ်က့ၤသီက့ၤန့ၣ်လီၤ. 12 မၤသးဒ်န့ၣ်ဒီးပှၤလၢအဆိကမိၣ်လၢအအိၣ်ဆၢထၢၣ်န့ၣ်,ဒ်သိးအသုတလီၤဃံၤတဂ့ၤဒီး,မ်အပလီၢ်အသးတက့ၢ်. 13 တမ့ၢ်ဘၣ်သုဘၣ်တၢ်လ့ပစီလၢအတဘၣ်ဒံးဘၣ်ပှၤကညီဘၣ်.ဒီးယွၤမၤဝဲအကလုၢ်တီသတးဒီး,တၢ်လ့ပစီလၢအဆူၣ်ကဲၣ်ဆိး,လၢသုဒိးတကဲဘၣ်န့ၣ်,တဒုးဒိးဘၣ်သုဘၣ်.မ့မ့ၢ်လၢတၢ်လ့ပစီအပူၤ,ကမၤထီၣ်ကျဲဒ်သိးသုကပူၤဖျဲးလၢအီၤလီၤ.

14 မၤသးဒ်န့ၣ်ဒီးပှၤလၢယအဲၣ်အီၤသ့ၣ်ဧၢ,ဃ့ၢ်ဟးဆှဲးတၢ်ဘါတၢ်ဂီၤတက့ၢ်. 15 ယစံးဘၣ်တဲဘၣ်သုဒ်ပှၤကူၣ်တၢ်သ့တဖၣ်အသိးန့ၣ်လီၤ.တၢ်လၢယစံးတၢ်န့ၣ်,စံၣ်ညီၣ်သုဝဲတက့ၢ်. 16 တၢ်ဆိၣ်ဂ့ၤအလီခီလၢပဆိၣ်ဂ့ၤအီၤန့ၣ်,တမ့ၢ်ဘၣ်တၢ်ရ့လိာ်ဒီးခရံာ်အသွံၣ်ဘၣ်ဧါ.ကိၣ်လၢပစိၢ်ဘျဲးအီၤန့ၣ်,တမ့ၢ်ဘၣ်တၢ်ရ့လိာ်ဒီးခရံာ်အနီၢ်ခိဘၣ်ဧါ. 17 အဂ့ၢ်ဒ်အံၤ,ပဝဲဒၣ်ပအိၣ်အါဂၤဒီး,ပမ့ၢ်ကိၣ်တဖျၢၣ်ဃီ,ပမ့ၢ်နီၢ်တဂၤဃီလီၤ.အဂ့ၢ်ဒ်အံၤ,ပအီၣ်ကိၣ်တဖျၢၣ်ဃီခဲလၢာ်လီၤ.

18 ကွၢ်ပှၤအံၣ်စရ့လးဖိဒ်ပဖံးပညၣ်အသိးန့ၣ်တက့ၢ်.ပှၤလၢအအီၣ်တၢ်လုၢ်တဖၣ်န့ၣ်,မ့ၢ်အတဘၣ်ဃးဒီးတၢ်လုၢ်အလီၢ်ဘၣ်ဧါ.

19 မၤသးဒ်န့ၣ်ဒီးမ့ၢ်ယစံးဒ်လဲၣ်.လၢတၢ်ဂီၤမ့ၢ်တၢ်တမံၤမံၤဧါ.ဒီးတၢ်လၢပှၤလုၢ်လၢတၢ်ဂီၤမ့ၢ်တၢ်တမံၤမံၤဧါ. 20 တမ့ၢ်ဘၣ်.မ့ၢ်ယစံးလၢပှၤကလုာ်တဖၣ်န့ၣ်,တလုၢ်ထီၣ်တၢ်လၢယွၤဘၣ်.မ့ၢ်အလုၢ်ထီၣ်တၢ်လၢတၢ်နါတဖၣ်လီၤ. ^{▼▼10:20 ၅မိၤ.၃၂း၁၇}ဒီးယသးတအိၣ်ဘၣ်လၢသုကဘၣ်ဃးဒီးတၢ်နါဘၣ်. 21 သုအီကစၢ်အလီခီဒီးတၢ်နါအလီခီတသ့ဘၣ်.သုအီၣ်တၢ်လၢကစၢ်အမ့ၤလၣ်,ဒီးတၢ်နါအမ့ၤလၣ်တသ့ဘၣ်. 22 ပကထိၣ်ဂဲၤယွၤအသးက့ၣ်န့ၣ်ဧါ.မ့ၢ်ပဆူၣ်န့ၢ်အီၤတက့ၢ်ဧါ.

23 တၢ်ခဲလၢာ်မ့ၢ်အတီအလိၤ,ဘၣ်ဆၣ်ဒီး,တၢ်ခဲလၢာ်တမၤအါထီၣ်တၢ်ဘျုးတၢ်ဖှိၣ်ဘၣ်.တၢ်ခဲလၢာ်မ့ၢ်အတီအလိၤဘၣ်ဆၣ်ဒီး,တၢ်ခဲလၢာ်တမၤထီၣ်မၤထီဘၣ်တၢ်ဘၣ်. 24 မ်ပှၤသုတဃုအတၢ်ဒၣ်ဝဲနီတဂၤတဂ့ၤ.မ်အဃုပှၤဂၤအတၢ်ကိးအဂၤဒဲးတက့ၢ်. 25 ကယဲၢ်တၢ်လၢပှၤဆါကွံာ်လၢဖၠါပူၤန့ၣ်,အီၣ်ကၢ်နဲာ်,သံကွၢ်တၢ်လၢသးလၢအသ့ၣ်ညါဒၣ်တၢ်အဃိ,နီတမံၤတဂ့ၤ. 26 အဂ့ၢ်ဒ်အံၤ,

ဟီၣ်ခိၣ်ဒီးတၢ်လၢအမၤပှဲၤအီၤန့ၣ်,မ့ၢ်ယွၤအတၢ်လီၤ. ^{▼▼10:26 စံး.၂၄း၁}

27 ဒီးပှၤတဂၤဂၤလၢအတစူၢ်တနာ်ဘၣ်မ့ၢ်ကိးသု,ဒီးတၢ်မ့ၢ်မိၣ်လဲၤဘၣ်သုသးဒီး,ကယဲၢ်တၢ်လၢအပာ်လၢသုမဲာ်ညါ,အီၣ်ကၢ်နဲာ်,သံကွၢ်တၢ်လၢသးလၢအသ့ၣ်ညါဒၣ်တၢ်အဃိ,နီတမံၤတဂ့ၤ. 28 ဘၣ်ဆၣ်ဒီးပှၤတဂၤဂၤမ့ၢ်စံးဘၣ်သု,တၢ်အံၤမ့ၢ်ပှၤလုၢ်ထီၣ်အီၤလၢတၢ်ဂီၤလီၤန့ၣ်ဒီး,အီၣ်တဂ့ၤ,လၢပှၤဒုးနဲၣ်တၢ်အဃိ,ဒီးသးလၢအသ့ၣ်ညါဒၣ်တၢ်အဃိလီၤ. 29 သးလၢအသ့ၣ်ညါဒၣ်တၢ်ဒၣ်နဲန့ၣ်ယတစံးဘၣ်.မ့ၢ်အဝဲတဂၤအသးလီၤ.အဂ့ၢ်ဒ်အံၤ,ယတၢ်ထူၣ်ဖျဲးကဘၣ်တၢ်စံၣ်ညီၣ်ဃၣ်လၢပှၤဂၤအသးလၢအသ့ၣ်ညါဒၣ်တၢ်,ဘၣ်မနုၤလဲၣ်. 30 ယမ့ၢ်ဟံးန့ၢ်တၢ်,အိၣ်ဒီးတၢ်စံးထီၣ်ပတြၢၤအဘျုးအဖှိၣ်ဒီး,ဘၣ်မနုၤလၢယဘၣ်တၢ်ဒုၣ်ဒွဲၣ်လၢတၢ်လၢယစံးထီၣ်ပတြၢၤတၢ်အဘျုးအဖှိၣ်လၢအဃိန့ၣ်လဲၣ်.

31 မၤသးဒ်န့ၣ်ဒီးသုအီၣ်တၢ်မ့ၢ်ဂ့ၤ,သုအီတၢ်မ့ၢ်ဂ့ၤ,ကယဲၢ်တၢ်လၢသုမၤမ့ၢ်ဂ့ၤ,မၤတၢ်ခဲလၢာ်လၢယွၤအလၤကပီၤအဂီၢ်တက့ၢ်. 32 သုတကဲလၢတၢ်လီၤကမၣ်အလီၢ်လၢပှၤယူဒၤဖိမ့ၢ်ဂ့ၤ,ပှၤဟ့းလ့ၣ်ဖိမ့ၢ်ဂ့ၤ,ယွၤအတၢ်အိၣ်ဖှိၣ်မ့ၢ်ဂ့ၤန့ၣ်တဂ့ၤ. 33 ဒ်ယမၤယဲစ့ၢ်ကီးလၢတၢ်ခဲလၢာ်ဒ်သိးယကမၤဘၣ်ပှၤခဲလၢာ်အသး,ဒီးယတဃုဘၣ်ယဘျုးဒၣ်ယဲဘၣ်,မ့မ့ၢ်ပှၤအါဂၤအဘျုး,ဒ်သိးအကတုၤလၢတၢ်အုၣ်က့ၤခီၣ်က့ၤအီၤလီၤ.