1Cor 3 | KswSKMB | STEP | ဒီးယဲဒၣ်အံၤ,ပုၢ်သ့ၣ်ဝဲၢ်သ့ၣ်ဧၢ,ယကတိၤတၢ်ဒီးသု,ဒ်လၢပှၤဘၣ်ဃးဒီးသးအသိးန့ၣ်တသ့ဘၣ်.မ့ၢ်ဒ်လၢပှၤဘၣ်ဃးဒီးတၢ်ဖံးတၢ်ညၣ်,ဒ်ဖိဆံးလၢခရံာ်အပူၤအသိးန့ၣ်လီၤ.

‏ 1 Corinthians 3

1 ဒီးယဲဒၣ်အံၤ,ပုၢ်သ့ၣ်ဝဲၢ်သ့ၣ်ဧၢ,ယကတိၤတၢ်ဒီးသု,ဒ်လၢပှၤဘၣ်ဃးဒီးသးအသိးန့ၣ်တသ့ဘၣ်.မ့ၢ်ဒ်လၢပှၤဘၣ်ဃးဒီးတၢ်ဖံးတၢ်ညၣ်,ဒ်ဖိဆံးလၢခရံာ်အပူၤအသိးန့ၣ်လီၤ. 2 ယဒုးအီၣ်သုလၢတၢ်နုၢ်ထံ,ဒီးတမ့ၢ်ဘၣ်တၢ်အီၣ်ဘၣ်.အဂ့ၢ်ဒ်အံၤ,သုအီၣ်တၢ်တသ့ဒံးဘၣ်.ဒီးခဲကနံၣ်အံၤဒၣ်လဲာ်,သုတသ့ဒံးစ့ၢ်ကီးဘၣ်လီၤ. 3 အဂ့ၢ်ဒ်အံၤ,မ့ၢ်သုဘၣ်ဃးဒီးတၢ်ဖံးတၢ်ညၣ်ဒံးလီၤ.အဂ့ၢ်ဒ်အံၤ,မ့ၢ်တၢ်သးက့ၣ်,ဒီးတၢ်အ့ၣ်လိာ်ဆိးက့,ဒီးတၢ်လီၤမုၢ်လီၤဖးသ့ၣ်တဖၣ်အိၣ်ဝဲလၢသုကျါဒီး,သုမ့ၢ်ပှၤဘၣ်ဃးဒီးတၢ်ဖံးတၢ်ညၣ်,ဒီးသုလဲၤတၢ်ဒ်ပှၤကညီအသိး,တမ့ၢ်ဘၣ်ဧါ. 4 အဂ့ၢ်ဒ်အံၤ,လၢပှၤတဂၤစံးဝဲဒၣ်,ယဲဒၣ်အံၤ,ယမ့ၢ်ပှၤဘၣ်ဃးဒီးစီၤပီလူး,ဒီးလၢအဂၤတဂၤ,ယဲဒၣ်အံၤ,ယမ့ၢ်ပှၤဘၣ်ဃးဒီးစီၤအပီးလိၤဒီး,မ့ၢ်သုဘၣ်ဃးဒီးတၢ်ဖံးတၢ်ညၣ်တမ့ၢ်ဘၣ်ဧါ. 5 မၤသးဒ်န့ၣ်ဒီးစီၤပီလူးမ့ၢ်မတၤတဂၤလဲၣ်.ဒီးစီၤအပီးလိၤမ့ၢ်မတၤတဂၤလဲၣ်.မ့ၢ်တၢ်အခ့အပှၤလၢသုနာ်တၢ်လၢအဃိ,ဒ်ကစၢ်ဟ့ၣ်လီၤလၢပှၤတဂၤတဂၤစုာ်စုာ်အသိးန့ၣ်တမ့ၢ်ဘၣ်ဧါ. 6 ယဲဒၣ်အံၤ,ယသူၣ်တၢ်,ဒီးစီၤအပီးလိၤဖှိၣ်တၢ်,မ့မ့ၢ်ယွၤဒုးဒိၣ်ထီၣ်တၢ်လီၤ. 7 မၤသးဒ်န့ၣ်ဒီးပှၤလၢအသူၣ်တၢ်တမ့ၢ်ဘၣ်တၢ်ဘၣ်,ဒီးပှၤလၢအဖှိၣ်တၢ်တမ့ၢ်ဘၣ်တၢ်ဘၣ်,မ့မ့ၢ်ပှၤလၢအဒုးဒိၣ်ထီၣ်တၢ်ယွၤတဂၤန့ၣ်မ့ၢ်တၢ်လီၤ. 8 ဘၣ်ဆၣ်ဒီးပှၤလၢအသူၣ်တၢ်,ဒီးပှၤလၢအဖှိၣ်တၢ်,မ့ၢ်တၢ်တမံၤဃီလီၤ.ဒီးပှၤကန့ၢ်ဘၣ်အဘူးအလဲ,တဂၤဒီးတဂၤ,ဒ်အတၢ်မၤဒၣ်ဝဲအသိးန့ၣ်လီၤ.

9 အဂ့ၢ်ဒ်အံၤ,ပမ့ၢ်ယွၤအပှၤမၤသကိးတၢ်တဖၣ်န့ၣ်လီၤ.သုမ့ၢ်ယွၤအခုး,သုမ့ၢ်ယွၤအတၢ်သူၣ်ထီၣ်လီၤ. 10 ဒ်ယွၤအဘျုးအဖှိၣ်လၢအဟ့ၣ်ယၤအသိးန့ၣ်,ဒ်ပှၤမၤဟံၣ်တဖၣ်အခိၣ်လၢအကူၣ်တၢ်သ့တဂၤအသိးန့ၣ်,ယပာ်လီၤလံဟံၣ်အခီၣ်ထံးလံ.ဒီးပှၤဂၤသူၣ်ထီၣ်တၢ်လၢအဖီခိၣ်လီၤ.ဘၣ်ဆၣ်ဒီးမ့ၢ်အသူၣ်ထီၣ်တၢ်လၢအဖီခိၣ်ဒ်လဲၣ်ဒ်လဲၣ်န့ၣ်,မ်အပလီၢ်အသးစုာ်စုာ်တက့ၢ်. 11 အဂ့ၢ်ဒ်အံၤ,လၢတၢ်အခီၣ်ထံး,လၢအပာ်လီၤအသးဝံၤလံ,လၢအမ့ၢ်ယ့ၣ်ရှူးခရံာ်န့ၣ်အမဲာ်ညါ,ပှၤပာ်အခီၣ်ထံးလၢအဂုၤအဂၤတသ့ဘၣ်နီတဂၤဘၣ်. 12 ဒီးပှၤတဂၤဂၤမ့ၢ်သူၣ်ထီၣ်ထူဧိၤလွဲဧိၤ,ကျိၣ်ဧိၤစ့ဧိၤ,တၢ်မျၢ်ထးသံ,သ့ၣ်ဧိၤဝၣ်ဧိၤ,နီၣ်ဧိၤမံၤဧိၤ,လီၢ်ဧိၤဒံးဧိၤ,လၢတၢ်ခီၣ်ထံးအံၤအဖီခိၣ်ဒီး, 13 အတၢ်မၤကအိၣ်ဖျါထီၣ်စုာ်စုာ်လီၤ.အဂ့ၢ်ဒ်အံၤ,မုၢ်နံၤတနံၤန့ၣ်ကလီၣ်ဖျါထီၣ်အီၤလီၤ.အဂ့ၢ်ဒ်အံၤ,ကဘၣ်လီၣ်ဖျါထီၣ်အသးလၢမ့ၣ်အူ,ဒီးပှၤတဂၤဂၤအတၢ်မၤမ့ၢ်ဒ်လဲၣ်ဒ်လဲၣ်န့ၣ်,မ့ၣ်အူကအီၣ်ကွၢ်ကွၢ်ဝဲလီၤ. 14 ပှၤတဂၤဂၤအတၢ်မၤလၢအသူၣ်ထီၣ်ဝဲန့ၣ်,မ့ၢ်အိၣ်မ့ၢ်ဆိးဒီး,ကန့ၢ်ဘၣ်အဘူးအလဲလီၤ. 15 ပှၤတဂၤဂၤအတၢ်မၤန့ၣ်,မ့ၣ်အူမ့ၢ်အီၣ်ကွံာ်အီၤဒီး,အတၢ်ကဟါမၢ်လီၤ.ဘၣ်ဆၣ်ဒီးအကစၢ်ဒၣ်ဝဲကတုၤလၢတၢ်အုၣ်က့ၤခီၣ်က့ၤအီၤလီၤ.မ့မ့ၢ်ကမၤသးဒ်လၢမ့ၣ်အူအသိးလီၤ.

16 သုမ့ၢ်ယွၤအတၢ်လုၢ်ဟံၣ်,ဒီးယွၤအသးအိၣ်ဝဲဆိးဝဲလၢသုပူၤန့ၣ်,မ့ၢ်သုတသ့ၣ်ညါဘၣ်ဧါ. 17 ပှၤတဂၤဂၤမ့ၢ်မၤဟးဂီၤယွၤအတၢ်လုၢ်ဟံၣ်ဒီး,ယွၤကမၤဟးဂီၤအီၤလီၤ.အဂ့ၢ်ဒ်အံၤ,ယွၤအတၢ်လုၢ်ဟံၣ်မ့ၢ်တၢ်စီဆှံ,ဒီးသုမ့ၢ်အဝဲန့ၣ်လီၤ.

18 မ်ပှၤသုတလီလီၤအသးနီတဂၤတဂ့ၤ,ပှၤတဂၤဂၤလၢသုကျါမ့ၢ်ဆိကမိၣ်လၢအမ့ၢ်ပှၤကူၣ်တၢ်သ့လၢအအံၤတဃၣ်ဒီး,မ်အကဲထီၣ်ပှၤဟးဂီၤဖိ,ဒ်သိးအကကဲလၢပှၤကူၣ်တၢ်သ့န့ၣ်တက့ၢ်. 19 အဂ့ၢ်ဒ်အံၤ,တၢ်ကူၣ်သ့ဘၣ်ဃးဒီးဟီၣ်ခိၣ်အံၤ,မ့ၢ်တၢ်ကလီကလီလၢယွၤအမဲာ်ညါလီၤ.အဂ့ၢ်ဒ်အံၤ,တၢ်ကွဲအသး,ယွၤဖီၣ်န့ၢ်ပှၤကူၣ်တၢ်သ့လၢအတၢ်ကူၣ်တၢ်ဆးဒၣ်ဝဲအပူၤလီၤ. ^{▼▼3:19 ဘး.၅း၁၃} 20 ဒီးစံးကဒီးဝဲ,

ယွၤသ့ၣ်ညါပှၤကူၣ်တၢ်သ့အတၢ်ဆိကမိၣ်,
လၢအမ့ၢ်တၢ်ကလီကလီလီၤ. ^{▼▼3:20 စံး.၉၄း၁၁}

21 မၤသးဒ်န့ၣ်ဒီးမ်ပှၤသုတပာ်အသးကဖၢလၢလၢပှၤကညီအပူၤနီတဂၤတဂ့ၤ.အဂ့ၢ်ဒ်အံၤ,တၢ်ခဲလၢာ်မ့ၢ်သုတၢ်လီၤ. 22 စီၤပီလူးမ့ၢ်ဂ့ၤ,စီၤအပီးလိၤမ့ၢ်ဂ့ၤ,စီၤက့ၤဖးမ့ၢ်ဂ့ၤ,ဟီၣ်ခိၣ်မ့ၢ်ဂ့ၤ,တၢ်မူမ့ၢ်ဂ့ၤ,တၢ်သံမ့ၢ်ဂ့ၤ,တၢ်မၤအသးခဲကနံၣ်အံၤမ့ၢ်ဂ့ၤ,တၢ်ကမၤအသးဆူညါမ့ၢ်ဂ့ၤ,တၢ်ခဲလၢာ်မ့ၢ်သုတၢ်, 23 ဒီးသုမ့ၢ်ခရံာ်အတၢ်,ဒီးခရံာ်မ့ၢ်ယွၤအတၢ်လီၤ.